DANIEL 11 - PIPÏLIA

¹ “Ompö könyi tagh nyo pö Daryas nyo pö Mede.

² Omwowunyi ye nyu man. “Pkonöy pöytoghï walaka cho le sömök ompö Pasya, atolapay kïrip akong nyo pö angwan nyo lïku sïkön kïtïl chane löwïr. Nyini nyu kawesit ompö sïkönötenyi kwigh pich löwïr kiporyeghö pöyunöto Krik.

Pöyunöto Misri nko Sirya

³ “Atolapay kungwïn nyu pöytoghintö nyo awes akïpayta kor nyo wow akwigh kïrïp kegh nko machatenyi.

⁴ Wölo kïchöghöy pöyunötononi kïlïkwï angwan, amelö pöytoy pöytoghï cho pö orenyi amönyorucha owesyö nyo kitïng nyinte.

⁵ “Owesitu pöytoghinto Misri, wölo yetu wowïntö akong kïtïl nyinte akïghetu akwawesit pöyunötenyi nyoman.

⁶ Nyini kiwer könyiswö cho te, kwam mis pöytoghinto Misri nko nyo pö Sirya akuyilchï cheptanyi kukïninio mis, wölo melö kitöpö misnoni nyo kogh. Kepar chepay nko kwanta nko mötworichi nko pontenyi.

⁷ Lïku nyu pöytoghin chi nyo pö ara ompö kokononi ompö osiswechoni. Poryegho lïko pöytoghinto Sirya akïlït nïyetwechay kikïtek akïrïnta chane.

⁸ Ipöy kutang Misri tororötinekwa nko körkeyïntin cho kikipat nko kari silpa nko koltin cho pö olyot nyo wow. Töpo nyu könyis cho te amelö poryegho pöytoghinto Sirya.

⁹ Atolapay kupokyï pöytoghinto Sirya koro Misri wölo kïrïntoy nyinte, kïmïla nyu korenyi.

¹⁰ “Petöy nyu werpö pöytoghinto Sirya kïporyot, ghömïtöy pipö lïk cho chang. Pkonöy akïmölöl pich le puseryon akïporyotö ntökwit nïyet cho kikïtek.

¹¹ Kïwö nyu pöytoghinto Misri ompö nörekyö kïporyeghö pöytoghinto Sirya nyini kisïwa kungwïnöy kïghamït pikachi pö lïk cho chang, wölo kerïnta.

¹² Nyini nyu kiwany kïrïnta pïchay chang kïkwol kegh ompö rïntaghtanyi akïtas tagh kïpar pich cho makïrar, wölo melö rïntoy nyo kogh.

¹³ “Kïghamït ngat pöytoghinto Sirya lïk nyo wow kïtïl nyay pö tagh. Otini kikwigh kegh lasiny ompö könyis cho te, kungwïn nyu.

¹⁴ Penyöy pich cho chang osiswechoni pöytoghinto Misri, akïnget piköku cho köromöch, we Daniel kïporyeghö nyinte atökïpïntö ngala sïwïyagh, wölo kïrïntoy chane.

¹⁵ Kïlenyona kurik nyu pöytoghinto Sirya kanasyantanay kikïtekyï nayat akïpar, makumïcha lïko Misri ntökïporyö ata chini le nyökon.

¹⁶ Kwigh nyu pöytoghinto Sirya kïrïp kegh nko machatenyi akimöminye chi nyo kiköngöy nyinte. Ghyongo nyinte koro Ayomis akïnömunö kegh.

¹⁷ “Kitat nyu pöytoghinto Sirya nko lïkenyi atökïporyö, kimach kwam mis nko punyontenyi akuyilchï cheptanyi kukïninio mis, wölo melö kimukta.

¹⁸ Ato mi löt kïset kïpar koros cho kimi sörömu nanam akïrïnta cho chang wölo rïntoy wowïn pö lïk akuwany otöptanyi nyo gha, kïmïla nyu otöptanyi nyo gha wölo mi nyinte.

¹⁹ Kuyokyï kegh nyu kanastina korenyi cho kiketek nïyet, wölo kerïnta nyinte akïlïkwï nyoni sörömunyi.

²⁰ “Ngetu pöytoghintö anka nyo chengo pich surï atökïnyorï pöyunötenyi ororyö wölo kïpöröy nyinte ompö osis cho ngörï, melö ompö nörekyö anta poryot.

Pöytoghinto Sirya nyo le mwokïyon

²¹ “Atolapay kïrïpta nyinte pöytoghintö anka nyo le mwokïyon nyo melö kimïchini kïlïkwï pöytoghin. Miröy pich akïcheng paytagh ompö lïs.

²² Pöröy nyinte söpïchis pö lïkos lömïs ata ompö nyini le Tïsin nyo Wow.*

²³ Nyini kam mis nko punton, kïpöghisyeghö lïsut akwawesit kïrkegh kingorï pich cho kirïpöy nyinte.

²⁴ Miru nyinte kïwetöy kor wölo le sïkön akwigh kïgh nyo kimegh papotïnechi, kïwechï kïngatar pöröw nko pikachi. Akïset kïpar kanastin cho kikïtekyï nïyet, wölo ompö osis cho ngörï.

²⁵ “Atolapay kuset lïkenyi kïporyeghö pöytoghinto Misri ompö owesyö nko nyakanat, kutomtö mi kïpsach nyinte tïkwïl nko lïkenyi nyo wow, wölo kïlïsöy pöytoghinto Misri akerïnta.

²⁶ Wongöy nyinte pikachi pich cho kiruröy nyinte, kïpöröy piko lïkenyi cho chang kuwonyö lömïs.

²⁷ Tuyot pöytoghichoni kwodeny ompö mesa akonga atolapay kïlïs kegh ompöwölo ghach kinonutkökwa amöminye kinyiwutyö nyo nyoru, ompöwölo tomönye kwitïta pöroyïntanyi.

²⁸ Mïlo nyu pöytoghinto Sirya nko pöröwechi löwïr cho kipörï, wölo kunan kïwö kïpar Kö pö Tororöt* ompö Yerusalem. Akwigh kïrïp kegh nko machatenyi atolapay kïmïla korenyi.

²⁹ “Ngwïnöy nyu ngat akïpar Misri otini ketïta asis nyo kikekïl, wölo sisitu ngala cho pö ye ompö nyinte, ompö cho kipö tagh.

³⁰ Kïkany kupokï nyinte melino Kitim, kïmïgh nyoman akuyoda kegh nyu ompö nörekyö, akumukyï kïpar ngat pipö Tororöt akïwaghaka kïrïp ngala pich cho kipeny muma* nyo tïlil.

³¹ Sïmnyonöy pipö lïkenyi Kö pö Tororöt nko nïyetkö akïtagh amörostin cho kïpelöy kïnomnyö. Akutö körkeyïn nyo pö otyogh.

³² Köperöy nyinte pich ompö lïs cho kipeny muma ECHOTYON, wölo ghyongo man pich cho nkït Tororötïngwa.

³³ Akunet pich cho ngöghomöch pikökwa cho chang kïpköchï ngalechï, kïrkegh kepar walaka, akïmeghö walaka ompö ma akerang walaka kïlïkwï pïnot. Ighisyot lenyoni ompö osis cho ngörï.

³⁴ Otini nyu kimi kepöröy pipö Tororöt, kïnyorï kingörokut kite, kïpka cho chang kïrïp chane ompö lïs.

³⁵ Potyot nyu pïchay ngöghomöch walaka atöketïlil pich akemwat akegh chane kïrelachitu ntökwitïta asispa söröm ompöwölo tomönye kwitïta asisini kikekïl.

³⁶ “Ighöy nyu pöytoghinto Sirya kïrïp kegh nko machatenyi. Kwolöy kegh akïsït kegh parak kïtïl tororötin löwïr. Akïtagh Tororöt pö tororötin kïngalana nyo gha. Sïkönonöy ntökwitïta asisoni, itïtoy nörekyo Tororöt.

³⁷ Möyongönye nyinte tororötino papotïnechi anta cho chömöy korï. Möyongönye tororöt anka tïkwïl ompöwölo sïtöy kegh parak nyinte kïtïl löwïr.

³⁸ Konyïtöy nyinte tororöt nyo ripöy nïyetwo kanastin kïtïl chï löwïr. Ropchini tororöt nyo melö kinkït papotïnechi koltin nko silpa nko koghïn cho pö olyot nyo wow nko ropöw cho pö olyot.

³⁹ Pokyini nyinte ompö owesyo tororöt nyo le ton kanastin cho kikitek nïyet, akï konyït chane cho chömöy nyinte. Ighöy chane kïlïkwï yetïntino pich cho chang akutö koros kïlïkwï ropöwekwa.

⁴⁰ “Otini ketïta osiswo söröm kupokyï pöytoghinto Misri pöytoghinto Sirya, wölo nyu ryöpöy pöytoghinto Sirya nyinte le pïchpïch ompö nkarinechi nko pich cho pegho angoletin nko melin cho chang. Lïtu nyinte kor akïmölöl le puseryon akuwer.

⁴¹ Itu koro Ayomis akïpar pich cho makïrar, wölo kïsöru koroswo Edom nko Moap nko koro Amon kareran.

⁴² Nyini kaset kïpar koroswechoni, kïmöchïwïtönye koro Misri,

⁴³ chengöy nyinte kaplawachtina silpa nko koltin nko tïkwïn löwïr cho pö olyot cho pö Misri akïpar Lipya nko Etopya.

⁴⁴ Otyegho nyinte ngal cho pkono kongasis nko okumpö ewu löt, wölo wetöy ompö nörekyö nyo wow akïpar chane cho chang.

⁴⁵ Akïparta emenichi cho pö paytagh kwenu nanam nko kutïng nyo mi Kö pö Tororöt, wölo meghöy akï möminye nyo ngöroköy nyinte.