DANIEL 10 - PIPÏLIA

¹ Kikïngongchï Daniel nyo kikïkuro kaynate anka Peltesyasar ngölyon ompö könyi sömök nyo pö paytaghpa Sayras nyo pö Pasya. Kipö man ngölyontononi aki pö poryot nyo wow nyo kikïngongchï nyinte ompö sïwïyagh.

² Kyosönönön wïkin sömök ompö osiswechoni.

³ Mamanye omisyewut cho onyïn anta peny amagheghanye dipay* anta agh kegh ompö wïkinechoni le sömök.

⁴ Otini kyoghyongonan sörömu lalwa Tikris ompö asispa 24 nyo pö arawa tagh,

⁵ asïwan chi nyo kilach sïra katani akirata muyenyi angwa koltin nyo pïchigh.

⁶ Kiköryol portanyi le koghi olyot nyo wow, kirel tokochunyi le kiryal akinöghsot konyïn le ma kikwörkwöre morïn nko kelyön le tay nyo kakïsit kïrelit lönga akïngölonöy nyinte le söpïch nyo wow.

⁷ Kyasïwan ante onkït sïwïyaghta. Melö kisïwa pich cho kimi nko ani, wölo kipotonchö nyoman akïryagh kïpa kïwïny kegh.

⁸ Kyongötwan nyu onkït nyo kyorosöy sïwïyaghnoni pö töngönchin. Omïghön lö chïrïm akuwonyeghenanïn owesyö, kiwaghaka tokochunyan kighaghit akïsisit.

⁹ Nyini kyalïman kutinyi, kïnamanïn rïwöntö nyo nïkis aköpïghtan mu.

¹⁰ Kinamanïn ewu chi akïtighanïn okïtïngan morïn nko kelyön, apotönöy.

¹¹ Kïlenchanïn chichay, “Daniel ichinyi chamat nyoman, ngeta aighyong aiter ngalechï amwowunyi ompöwölo kakiyokwanïn wölo imitenyi.” Otini kimwoghöy ngalechoni, angetan oghyong apotönöy.

¹² Kïlenchanïn, “Daniel, mewöghisyö ompöwölo kikelïm ngaleku kïngata otini kichamanyi kïpköchinyi ngala, aimïnïngit kegh ompö wölö mi Tororöt, kangwïnan ye akwompö saghatengu.

¹³ Kipöpekanïn malaykayan nyo le ripinto koro Pasya osis 21. Wölo kingwïn kungarakanïn Mikael nyo wow ompö malayken, ompöwölo kyomitan onkït Pasya.

¹⁴ Kangwïnan omwowunyi kïgh nyo igho ompö piköku ompö osis cho pkonöy, ompöwölo pö sïwïyaghta osis cho pkonöy.”

¹⁵ Nyini kimwa lenyoni, arosan ngwïny akïnamanïn kïgh kut.

¹⁶ Atolapay kïswanganïn kut akong nyo karkegh nko chi, angalanan nyu ngat, olenchan nyinte, “We echotyon, keghanïn ngala sïwïyagh akasan akuwonyeghenanïn owesyö.

¹⁷ Melö muko kïngalana sekeyonta nko echotyontenyi. Akwanyï kiwonyeghenanïn owesyö akupot kimïny.”

¹⁸ Kïswanganïn chichay ngat akuchïchimanïn

¹⁹ akïlö, “Daniel, ichinyi chamat nyoman, mewöghisyö, inyorï pöghisyö, aichïchïm, ainyakanitï.” Nyini kiwany kïngalan achïchïman, alenchan, “Ngalana echotyon, ompöwölo kechïchimaninyi.”

^20-21 Kïlö, “Inkïtönyi lö ompö ne tongwïnchinyi? Kangwïnan omwowunyi ngal cho kirote kitapu man. Omïlenan ye owetan oporyot nko malaykayan nyo le ripinto koro Pasya. Nyini kewanta kegh kungwïn malaykayan nyo le ripinto koro Krik. Akï möminye chi nyo ngörokanïn kïpoto Mikael onkït malaykayan nyo le ripinto koro Israel nyo kyangarakan achïchim.