DANIEL 1 - PIPÏLIA

Ngala Daniel nko kongotichi 1:1–6:28 Mïrön cho kimi Kö pö kirwoko Nepukadnesa

¹ Kingwïn Nepukadnesa pöytoghinto Papilon kurich Yerusalem ompö könyi sömök nyo pö Yeoyakim pöytoghinto Yuda.

² Kutö nyu Echotyon Yeoyada pöytoghinto Yuda mori Nepukadnesa akïpïsyï kïcheng kari Kö pö Tororöt.* Kip nyu kutang koro Papilonia akutö kaplawachpa kö pö tororötïnyi.

³ Atolapay kïmwochï pöytoghintö Aspenas nyo kiwowö yetïntinechi kïkïl ompö pipö Israel pich cho pö ara pöytoghï nko cho pö pich cho echön,

⁴ mïrön cho lïpopöch nko cho pïchighöch, akïtïng ngöghomnyö ompö kïgh anka tïkwïl, cho chïreröch akïpköchini kinetut, atökïpöghisyö ompö kö pö kirwoko pöytoghin. Atolapay inet chane kunkïtï kusomön akukir kuti pipö Papilonia.

⁵ Kïmwatïta pöytoghintö kepagha chane omisyö nyo kyomöy nyinte nko dipaykö* ompö osis löwïr. Kikinetöy chane könyis sömök, nyini kiwonyö könyiswechoni kemït chane tawu pöytoghin.

⁶ Pich cho kimi nko pïchoni kikïkïl kï: Daniel nko Anania nko Misyael nko Asaria cho kipö ara Yuda.

⁷ Kïmïnchï nyu Aspenas nyo kiwowö ompö yetïntin chane kaynötutchï: Kikurö Daniel Peltesyasar, kïkurö Anania Syadrak, kïkurö Misyael Mesyak, kïkuro Asaria Apedneko.

⁸ Wölo kunan Daniel lö melö mïchini kusïmnyon kegh ompö omisyewut cho le kïlan cho pö ka pöytoghin anta dipayka, kïlenyona kïtep Aspenas kungarak nyinte atömesïmnyon kegh.

⁹ Kwigh Tororöt Aspenas kïcham kusyonchï Daniel.

¹⁰ Wölo kïlenchï Aspenas Daniel, “Owöghan echotyontenyan pöytoghin nyini kimwa lö omekwa omisyewutchï nko dipayka, atosïwa asïyech lö kyokoryekwa kïtïl kongotikwa chï walaka, kï keghaninyi kïparanïn pöytoghintö.”

¹¹ Kïlenyona kïwö Daniel kïlenchï ripin nyo kimwochï Aspenas kïrip nyinte nko Anania nko Misyael nko Asaria,

¹² “Ghotecha mötworiku osis taman, kanya kekonecha onkïy kyama nko pögh keghegha.

¹³ Atolapay irosecha, aikongityecha nko kongoticha cho omöy omisyewut cho le kïlan cho pö pöytoghin, ato melö kïkörecha kegh nko chane, idecha wölo keda.”

¹⁴ Kïlenyona kïterchï yetïnay chane lenyoni akïghot ompö osis taman.

¹⁵ Nyini kiwonyö osiswechay, kïlö kiros chane karamach tya akï okwoghöch kïtïl kongotikwa löwïr chay kyomöy omisyewut cho le kïlan cho pö pöytoghin.

¹⁶ Kïlenyona kïpïsyï nyu kighyongtoghinto omisyewut chane kwam onkïy mökutönye omisyewutchay le kïlan pö pöytoghin.

¹⁷ Kutö Tororöt mïrönchay kwangwan chïreryö ompö kinetut nko kisomönöt nko ngöghomnyö. Atolapay kutö Daniel ngöghomnyö nyo muköy ntökïmwowï sïwïyagh nko kirwotïtogh.

¹⁸ Nyini kiwonyö könyiswechay le sömök kimwa pöytoghintö, kumïtï Aspenas mïrönchay löwïr kïpka tawu Nepukadnesa.

¹⁹ Kïngölonchï pöytoghintö chane löwïr, wölo kimöminye ompö akong nyo lata Daniel nko Anania nko Misyael nko Asaria, kïlenyona kumpur nyu kö pö kirwoko pöytoghin kïpöghisyö.

²⁰ Kïsïwa nyu pöytoghintö lö kaykay pïchoni kïnyïl taman ompö pköchin nko ngöghomnyö ompö kïgh anka tïkwïl nyo tepöy nyinte chane kïtïl pich löwïr cho le chemowostin nko ngorï ompö pöyunötenyi.

²¹ Kitöpö nyu Daniel kö pö kirwoko pöytoghin ntökurel könyi tagh nyo pö Sayras pöytoghinto Pasya nyo kingwïn kïpar Papilon akïpayta.