AYUPU 8 - PIPÏLIA

Pildad

¹ Kïlenchï Pildad Ayupu,

² “Ingölonenyi tïkuchï nkoyï aiyitïtonyi ngaleku le yomöt nyo weröy nkoyï?

³ Ilentenyi so kwötöy Tororöt man? Inonenyi lö mi ato meghönye Kimuktoghin man?

⁴ Ato kikwighchï moneku Tororöt ngokï kunka nyoni kegh nyinte chane kwam ngokikwa.

⁵ Ato iyaranyi Tororöt aisaghanyi Kimuktoghin

⁶ ato ichinyi kïltït aichï tenate kungwïnöy nyu Tororöt kungörokinyi akuperur möngengu nyo mïchininyi.

⁷ Kïrkegh kiporporyö sïkönötengu ompö tagh, wowitu nyu sïkönötö nyo koninyi Tororöt asïyech.

⁸ “Kaykay tepa pïnwöy cho kikuwer tenyorunö ngal cho kinkït papotïnekwa.

⁹ Ompöwölo kichicha mïnkech amelö kinkïtöcha kïgh nyonikïny ompöwölo weröy osiswecha ompö ngwïny le rurwö polta.

¹⁰ Wölo mwowunyi akunetinyi pipö köny, ompö ngala ngöghomnyö cho kinyorï chane.

¹¹ “Muköy so soghywon kïpito wölo melö nyonyön, anta pita awawatina wölo mömicha pögh?

¹² Kï nyoghöy kïyomsot kïtomö sus walaka otini tökïngwïrngwïr akïtomönye kwïtïta kemut.

¹³ Lenye nyoni nyu pich cho ghach, wetöy lö weng kikönöto mwokïyis,

¹⁴ Montoy kegh chane kïgh nyo ngötongötöy, le pörköyo kö pö kapamporö.

¹⁵ Tigho kegh sïkönötenyi wölo, meghyongönye? Lentöy onömöy, kïngat lö tyar.

¹⁶ Nyaril latïl, kïrkegh kila asis woytoy sökechi kïghömï par.

¹⁷ Nonoghöy ighinkachi koghïn cho supote akïlït ghat anka tïkwïl tökïtenö kïkarera.

¹⁸ Ato kinyara nyinte möngenyi kïtityot mönge kïlentöy, ‘Tomönye asïwinyi nyonikïny.’

¹⁹ Ngörekyenyi nyoni kïpoto pusu nyu pikö walaka kukeröy nyinte.

²⁰ “Möpïstonye Tororöt chi nyo tenate kokay amelö ngöroköy mwokïyis.

²¹ Ighokwa Tororöt ororyenö ngat apironchö ompö ngörekyö,

²² wölo töni nyinte arasï pich cho wöchokwa akwigh wölo möngöy mwokïyis kupot.”