AYUPU 6 - PIPÏLIA

Ayupu

¹ Kuyokyï Ayupu lö,

² “Opï kakipim wölo tenö nïkisyeto kisusutköchan aketö nyörilwoköchan löwïr ratilin.

³ Kötönïkisitu kïtïl ngayama nanam, nka nyoni kangalanan ompö sirmoy.

⁴ Ay, köwutanïn pemtina Kimuktoghin, kölïtanïn por ködöwengwa. Kötorchanïn Tororöt mïghö kupokyanïn kïnomnyö.

⁵ Ayo, woköy sïkïryö ato omöy suswechi, anta ghïtöy tany ato oketïyi?

⁶ Ayo ngo nyo muköy kwomöy omisyö nyo tadagh, nyo puryö partin? Anta tïng onyïniö ne adösyontö wölay rel?

⁷ Momchinanïnye mïnyas omisyewut choni lata choni ompö ani omisyewut cho kösïnö.

⁸ “Opï konyorwan somötenyu akughönwon Tororöt machatenyu!

⁹ Kosomön lö opï keghïtö ewunyi, akïtïghanïn nyinte.

¹⁰ Kötö pïranïn nyoni mïkulögh, kötö ompö ongörökyinan kichïr nyo mötïny kwanta ompöwölo mataghanye ngala Nyinte nyo Tïlil.

¹¹ Motïngönye owesyö nyo oköno söpon. Monkïtönye lö tya osiswechan nyo kötö omïkukönöy.

¹² Ayo lenye so ongeryenyan nyo pö koghïn? Anta karïn portönyan nya?

¹³ Melö totïngetan wölo ongöroktoy kegh, amelö tökïmi karerana wölo onyorunonan kingörokut.

¹⁴ “Pïchona töghöy kusyonchini kongengwa kïmökonyïtöcha Kimuktoghin.

¹⁵ Kalïsanïn kongotichan le lalwatïn cho yintoy pengat, le puser cho wiru akïteny.

¹⁶ Cho kiyen takarasen, akulum lapay,

¹⁷ wölo otini kalalangit kupotyö, otini kula, kïteny lö kake.

¹⁸ Potyot pich cho rutoy cho wutöy lö kïyöröy pögh, tompöroryegho chane wölo le surkwen tökïtenö kïmeghö.

¹⁹ Yöroyöröy rutoghot cho pö Tema kukönisïyi lïkos pö Syepa.

²⁰ Meghsot chane mutïnö akulï achakopi, kilentöy kïnyoru pögh ompö lalwatïn cho kitenyö.

²¹ Alatekwa lalwatïnechoni ompö ani otini kasïwekwa nyörilwoköchan owöghisyekwa.

²² Ayo mi so ato kosomokwa kïgh? Anta osomokwa lö otöteghwante asoya kïngetunö sïkönötenkwa?

²³ Anta osomokwa lö, ‘Aghetante achïwïta mori punyon,’ anta, ‘Osörunenante mori pich cho le pïrï.’

²⁴ “Anetante atasisan aporwante wölo kyaleltan.

²⁵ Wechï nömöy pich ngala man! Wölo ngengu ne chilatenkwa?

²⁶ Ayo ononekwa so lö omukekwa opkonye ngal? Le ato karkegh ngala chi nyo kima mu nko yomat.

²⁷ Omukekwa ompö omoyone pönon, alta ompö chini le kongotikwo.

²⁸ “Wölo, arosanïn ye lasiny, molïsokwanye.

²⁹ Osoghokwa wechara lö omïlisyene atömörumï lö ochikwa lïsï. Amale kegh köny, ongölonan ngala man.

³⁰ Ayo mi so lïsata ngalechan? Ayo alentekwa so möpköchinanïnye nyaril?”