AYUPU 42 - PIPÏLIA

Ayupu

¹ Kuyokyï nyu Ayupu ECHOTYON lö,

² “Onkïtön lö imukenyi ighe tïkwïn löwïr amöminye kïgh nyo körtoy kïgh ketatanyi möpïntö.

³ Kitepaninyi lö, ‘Imukenyi swome ngöghomnyenyan lö ne, akwanyï möpköchininyinye kïgh?’ Ompöwölo kamwaghan ngal cho möpköchanïnye ngal cho pö töngönchin cho pölanïn cho kimonkïtönye

⁴ Kilenchaninyi, ‘Tera ongölonun atepinyi ngölyon, aiyokwante.’

⁵ Kikyalïman ngaleku alïma yit wölo kasïwegheninyi ye konyichu.

⁶ Kïlenyona kolïmchan kegh arasï ompö ngalechan, akötan ompö terïtyon nko aren.”

Ngala söröm

⁷ Otini kiwany ECHOTYON kïmwochini Ayupu ngalechoni, kïlenchï ECHOTYON Elipas nyo pö Teman, “Konörekyinyi nko kongotiku kwodeny, ompöwölo melö kyangalanakwa ngala man ompö ani, le mötworintenyan Ayupu.

⁸ Kïlenyona, aranga ye nyu eghin mut nko odeny nko mökol mut nko odeny apa wölo mi mötworintenyan Ayupu aropta ropöw cho kïpelöy lömïs, atökïsoghwokwa mötworintenyan Ayupu, ompöwölo ochömchinan nyinte sowutkachi, tömaghwakwa kïrïp kegh nko sölwontönenkwa, ompöwölo kimamwaghakwanye ngal cho pö man ompö ani, le wölo kimwayta mötworintenyan Ayupu.”

⁹ Kïpa nyu ompö Elipas nko Pildad nko Sopar akwigh lenyini kimwochï Echotyon chane, kïcham nyu ECHOTYON saghata Ayupu.

¹⁰ Otini kisoghchï Ayupu kongotichi, kuyokyï ECHOTYON Ayupu ngat mökosyö kïtïl cho kitïng ato le tagh.

¹¹ Kïpkonchï nyinte werkökwa nko tipikwa löwïr nko chi anka tïkwïl nyo kinkït nyinte kïpka, kwomisyö nko nyinte ompö konyi. Kusyonï nyinte akïsaghsagh ompö kömpölelut löwïr cho kironkyï ECHOTYON nyinte. Kutö chi anka tïkwïl ompö chane ropïyen nko kaymoris cho pö koltin.

¹² Kusoyön nyu ECHOTYON osiswo Ayupu cho pö löt kïtïl cho kipö tagh. Kitïng kechir 14,000 nko tamasay 6,000 nko eghin cho kïngortoy 2,000 nko sïkïröy 1,000.

¹³ Kitïng ngat wor mut nko odeny nko tipïn sömök.

¹⁴ Kïkuro cheptö nyo tagh Yemima, kekuro nyo pö odeny Kesiya, kekurö nyo pö sömök Keren Apuk.

¹⁵ Kimöminye korka korononi kïmïkul nyo kipïchigh kïtïl tipö Ayupu, kïropchï papongwa tipichoni tïkwïn nko werkökwa.

¹⁶ Otini kighisyö ngalechoni kïmöngisyö Ayupu könyis 140, kïmöngisyö tökïsïwa monechi nko moneko monechi tökurel pïn nyo pö angwan.

¹⁷ Kïrapas nyu Ayupu, otini kikikïyosit nyoman.