AYUPU 4 - PIPÏLIA

Ngalana tagh 4:1–14:22 Elipas

¹ Kuyokyï Elipas chi pö Teman nyinte lö,

² “Einörekenyi ato tepinyi chi ngölyon nya? Akï ngo nyo muköy kïsï amöngalan?

³ Rose lö kinetanyi pich cho chang aikil ewuno pich cho nyörkölöle.

⁴ Kikïtigh ngaleku chi nyo kipitöy akuchïchim kelyön cho potonchot.

⁵ Wölo ketunyi ye ngalechoni kïmeghinyi mu, ketuyeghenyi ye nyu imïghönyi.

⁶ Kïchï melö so imontonenyi kegh kiwaghata Tororöt, anta melö so itïngetenyi kikönöt ompö tïlilyo otöptöngu?

⁷ “Nane lö ngo nyo puryö lelut nyo kikuwongwï, anta lö onö wölo kiketagha chi pö man?

⁸ Kyasïwan pich cho ngoröy pareni ghöyityö, akïkatkat kösïgho rïmö, ilöy ye nyu chane ghöyityö nko rïmö.

⁹ Mungo Tororöt chane kimïnytanyi kupotyö, akuwanga chane owesyo nörekyenyi.

¹⁰ Muköy mwokïyis kïtïlyot akï pororyö le ngötuny, wölo wiröy Tororöt kelekwa kwilyö.

¹¹ Meghöy ngötïny nyo awes ato mönyorunönye kïgh nyo kanam akï toyö wara ngötïny kïyasta.

¹² “Kikïchorwanïn nyu ngölyon, akechomchï yitïnyan.

¹³ Pkonöy kinonut ompö sïwïyaghtina oghö otini ketung pich rïwöntö,

¹⁴ kungwïnchanïn nyu otyogh nko mïghöt nyo kigh koyechan löwïr kïpotonchö.

¹⁵ Kuweranïn nyu yomöt konyïn kwigh kughyonganïn putö ompö por.

¹⁶ Kughyö kïgh lasay, wölo melö kipköchanïn wölo kilata. Kimi kïgh nyo kighyongo tawunyan. Atolapay alïman kut nyo kilïtuno sisatanoni nyo kilö,

¹⁷ Ekumuköy ptangengmöt ntökuten kïtïl Tororöt nya? Akumuköy chi kïtïlilitu kïtïl Ighintenyi?

¹⁸ Melö ghönöy Tororöt ompö chini le mötworichi akïnyorchini lelut ompö chini le malaykenichi.

¹⁹ Itep ne nyu ptangengmöt nyo kikigha mönö nyo kingwïna terït, nyo kinyirkitöy le tapïrpur?

²⁰ Kïtïghotïghöy chane kïngeta kiwasan ntökwimön akupotyö kokay amelö mi chi nyo rirchini.

²¹ Kïchengöy kïgh anka tïkwïl nyo tïng chane, akïmeghot kïpuryö ngöghomnyö.”