AYUPU 38 - PIPÏLIA

Kangalan ECHOTYON nko Ayupu ECHOTYON

¹ Atolapay kuyokyï ECHOTYON Ayupu ompö chepkïrïri lö,

² “Ngo nyï tïntïröy kirurut nya, ompö ngal cho puryö ngöghomnyö?

³ Igha kegh lasiny le mïrön otepinyi ngal, amökan yokwaninyi.

⁴ “Kimitenyi onö nya otini kyapintitan pchörino ngwïny? Mwowante ato itïngetenyi pköchin.

⁵ Ngo nyo kitat kiyitutkachi? Olentan inkïtönyi lasiny! Anta ngo nyo kikongityeghö pörköyö parakunyi?

⁶ Kikïpölchï onö pchörinechi anta ngo nyo kitor kadanyi pö luch

⁷ ato kitumöy kokelya tökwoghö akïseronchö kurur ompö yïm, ighan pö Tororöt ompö ngörekyö?

⁸ “Anta ngo nyo kikara tekech kukoti nanam otini kawirï pögh

⁹ aluman poltoy kïkarta ananagha poltoy cho tuwöch lömïs,

¹⁰ atönön rotyotïn aghchï möröw nko kukot.

¹¹ Kyolechan, ‘Ingatenyi yete amenokenyinye akïyete ato ngötisyegho mirtineku cho owesöch.’

¹² “Mi ato kimwochinyi yekon kïyech kïngeta keyiyinyi aigh kiwasan kunkïtï otinö ngwïnöy,

¹³ atömanyïl kïnam söremwok pö ngwïny akutulunö mwokïyis wölo wïngo kegh?

¹⁴ Wöghököy ngwïny le macheypa mönö akepel le sïra nyo kakichuda munyan nyo pïrir.

¹⁵ Kïmulöy mwokïyis löpoyïntöngwa kirörököy egh nyo kowkow.

¹⁶ “Kilïtönyi nanam wölo kosuno pögh kiwesteghenyi tïtïka nanam wölo le siriron?

¹⁷ Kikengongunyi so kukoti meghat anta kisïwenyi so kukoti wölo tuw lö yïk?

¹⁸ Kikarkaranyi wölo teno töpesïn pö ngwïny? Mwowunö ato inkïtönyi choni lakaw.

¹⁹ “Nko or nyo wetöy wölo möngöy löpoyïn akwonö wölo le koro tuwïn

²⁰ atömanyïl ip ntökurel otini töpo ainkïtï ortïn cho töngöy katanyi.

²¹ Inkïtönyi, ompöwölo kikeyiyinyi atoni akï chang ompö könyisweku!

²² “Kilïtönyi wölo kïrorchini powöy anta kisïwenyi wölo kïrorchini takarïs

²³ cho kyaroran kïpöyit asispa nyarïl, kïpöyit asispa ryöpö nko poryot?

²⁴ Mi onö or nyo wetöy wölo kipköngo löpoyïn anta onö ato kïkutïtegho yomo kongasis kïghömï ngwïny?

²⁵ “Ngo nyo kichal ara puseryon anta ara kiryal

²⁶ kïropönchï kor wölo le siriron nko wölo le surkwen mömöngönye chi

²⁷ kunyörkil kor nyo mïlote akï kïratyan akwigh ngwïny kïpita suswö.

²⁸ “Tïngeto rop paponyi anta ngo nyo kiyï röyön?

²⁹ Pkono muyo ngo pögh cho lölote ngo nyo köyiyï powöy nyo ngwïno yïm?

³⁰ Oghïghitu pögh le kögh akïwaghach pögho nanam kïlölö ompö kaghïtan.

³¹ “Imukenyi ghomitone Kaghis airat ighïch anta ityak syonginy pö Kakoretaran?

³² Imukenyi porchine or Tapogh kïtenö osis anta imuch intöghoghchï koko tapogh nko warechi?

³³ Inkïtönyi kirurut cho rïpöy ompö yïmwöy? Aimukenyi pintite paytaghtanyi ompö ngwïny?

³⁴ “Imukenyi ngölone tya kïlïm poltoy kïmïlï kegh pögh kuluminyi?

³⁵ Imukenyi temwochï kiryal kuwöch akïlenchinyi, ‘Achï acha kïmitö yi?’

³⁶ Ngo nyo kitö ngöghomnyö poltoy kurörokwï pögh ngo nyo kitö pköchin kapuret kwighön?

³⁷ Ngo nyo tïng ngöghomnyö nyo muköy kuyitoy poltoy anta ngo nyo opïköy soghyöyi yïm kïsururu pögh,

³⁸ kwigh terïtyon kïlïkwï nyarkwat akïnam kegh kïlïkwï norayon?

³⁹ “Imukenyi tesökosyï ngötïny? Ata ipagh wara ngötïny kïpïghyö,

⁴⁰ otini rusot korikwa anta otini mi chane kusyepisïyi?

⁴¹ Ngo nyo töni omisyö chepkïrak otini mi warechi kïlokyini Tororöt, akuteghyotö ompöwölo puryö kïgh nyo omöy.”