AYUPU 35 - PIPÏLIA

¹ Kulet tagh Eliu kïmwa lö,

² “Inonenyi so lö man mwaghanyi lö, ochï tenate ompö tawu Tororöt?

³ Aitepenyi nyinte lö, ‘Töswanïn ne? Ochan ngwangwa lö ne, kïtïl antökyaghan ngokï?’

⁴ Omölyöngunyi nko kongotiku cho omitekwa tïkwïl.

⁵ Topöne yïm tesïwena, airos poltoy cho mi parak kïtïlinyi.

⁶ Ato ighanyi ngokï, ilentenyi kada ne nyinte? Ato chang lelutköku, ilentenyi kada ne nyinte?

⁷ Ato ichinyi chi pö man, ilentenyi kotösï ne nyinte? Anta nyoruno ne nyinte wölo imïtenyi?

⁸ Nömöy kegh ghöyityengu pich cho lata nyi, akutöni pat mantangu kinyiwut ptangengmöt le nyi.

⁹ “Riryot pich ato kïghapghap tya yöroy kong chane kingörokut, ompöwölo kecho kong pich cho owesöch.

¹⁰ Wölo möminye chi nyo lentöy, ‘Mi onö Tororöt Ighintenyan, nyo konu tumwöy oghö

¹¹ nyo netecha kïtïl tïpö wudïn akwighecha kengöghomitunö kïtïl törit?’

¹² Riryot nyu, wölo meyokyininye Tororöt ompöwölo menöto pich cho ghach.

¹³ Nyoman möterönye Tororöt rirat nyo pö kwïle amöyongönye Kimuktoghin riranoni,

¹⁴ kïrkegh kelenyi, ‘Mesïwïyenyinye nyinte,’ mi kirwokö tawunyi, kanya nyinte kwïle!

¹⁵ Akwompöwölo pöpeköy nörekyenyi amörïpönye tya ghöyityö.

¹⁶ Nka nyï ngölonöy Ayupu ngal cho le kwïle akuchongitöy ngal cho puryö chïreryö.”