AYUPU 29 - PIPÏLIA

Ayupu

¹ Kuyokyï kegh Ayupu ngat kïngalan lö,

² “Opï komitan le köny, osis cho kitö kïripanïn Tororöt

³ atakinya kitökulïwchini mötïnyan töpewenyi awesteghan tuwïn ompö löpoyïntanyi,

⁴ osiswechoni kyomitan adwarnan otini kimi kongotnön nyo pö Tororöt konyan

⁵ akïtökïmi Kimuktoghin nko ani atanya kimi monechu kuwitanïn,

⁶ atanya kiyotïkotonan chö nko mwowöy, akïpkana ghatoy mwowöy cho rotöy le pögh!

⁷ Otini kyowan kokwo poy ompö kuka kanasyan, atöpchan kegh ngacharunyu,

⁸ kïsïwanïn karachïna akïmal kegh akïngetwanïn poyï ompö konyït.

⁹ Kïkany kïsïwanïn pöytoghï, kïsisyö akïnam kutïwekwa tökïsï kokwö.

¹⁰ Kimangalancha ompö chönökopïrtinö, kinam kïgh ngölyepwekwa kïsisyö lasay.

¹¹ “Kisoyönanïn chi anka tïkwïl nyo kiter ngalechan akïcham pich cho kisïwanïn lö pö man ngalechan,

¹² ompöwölo kyosörwan meywon nyo kinyörïlöy nko panan nyo kipuryö chi nyo kingöroköy.

¹³ Kingwïnchanïn kisoyönöto chi nyo kikirich kïma aghan mïkulöwu mïsïk kïserön ompö ngörekyö.

¹⁴ Kyalakan man le sïra kyalakan kirwoko man le kalacha nko syolöp.

¹⁵ Kyochan kompa chepkarot alïkwï kel pö chi nyo ngwolöy.

¹⁶ Kyochan papo ompö mey angarakan chi nyo kimonkïtönye ompö kirwok.

¹⁷ Kyanyaran owesyo mwokïyis tökïpïstö pich cho kinyörilöy kong.

¹⁸ “Atolapay ananan lö, omeghchinan konyu atasan osiswechu kïchangit le sïpöpö siran.

¹⁹ Kitorta kegh ighinköchan ntökwit wölo mi pögh kumpï sökeko morichan ompö röyön kïyech.

²⁰ Tochan oror chik, akïmi owesyenyan atö le kïwang nko kotöt.

²¹ Kiyötchinanïn pich yitïn akïsisyö atökïlïm kirurötenyan.

²² Nyini kyangalanan kumuchö, mökïngalannye ngat, kirök chane ngalechan le kanïsan.

²³ Kikanganïn le ato köngöy rop, le ngori paren cho köngöy ropö arupe.

²⁴ Kyonyimnyimchan chane ato kitomtomön, kukil chane ngörekyö nyo kisïwechï tokochunyan.

²⁵ Kyakïlan arengwa atöpan le kirwokin amang le pöytoghin nyo mi lïkenyi kwen le chi nyo soghsoghöy pich cho mi nyarïl.”