AYUPU 28 - PIPÏLIA

¹ “Mi pïrïm nyo kïwöso silpa akïmi wölo kïmwöto koltin.

² Kïwöso karïn ngwïny yinuno taghoy koghïn cho kiloyö.

³ Ipöy pich cho wösöy koltin kitömöwon wölo tuw akïpïpïlotö kïröytö ngwïny. Yörotoy koghïn cho mi to wölo tuw lömïs.

⁴ Pölöy pich pïrïmpot wölo le siriron, puryö möngot, wölo low mötïkönye kelyo pich. Rötoy kegh pölï angwoy akureytegho kegh kïwïs.

⁵ Ngwïno omisyö nyïngwïtyan, wölo kikïkwangkwang ompö ma, kïgh anka tïkwïl ompö wölnö le ori.

⁶ Köchöy koghichi ato mi köghi sapire akïtïng pïlölös pö koltin.

⁷ “Möminye sirörö nyo nkït aranoni wetöy wölo kïwöso koltin akïtomönye kïsïwa kompa mötony.

⁸ Tomöcha kïtïkata tïpö wudïn cho nisonchot aranoni, akïtomönye kuwer ngötïny aranoni.

⁹ “Kölöngo chi köghin cho ongeröch ewunyi akïwïnïk pchörino kutïngkot.

¹⁰ Köreröy ghatoy cho echön, akïsïwa kïgh anka tïkwïl nyo pö olyot nyo wow.

¹¹ Köröy sïrumpoti pögh cho kosu kïminy akwipï kïgh nyo wïngate kungwïn wölo löpo.

¹² “Wölo kïnyorchini onö ngöghomnyö? Akwonö wölo möngöy pköchin?

¹³ Möminye chi nyo nkït lö tya olyenyi, amelö kïnyorchini ngwïnyinï möngöy pich.

¹⁴ Lentöy toyo pögh, ‘Möminye ngöghomnyö wölï,’ kïlö nanam, ‘Möminye orinyan.’

¹⁵ Melö kimuköy kyolo koltin akïmemukonye olyenyi ketötegho silpa

¹⁶ Melö kimuköy kekongityot ngöghomnyö nko koltino Opir anta köghïn cho pïchighöch nko köghi sapire.

¹⁷ Melö karkegh nko koltin nko sanay cho kwerkwersot, amelö kimuköy kewöghöko tïkwïn cho kikigha koltin cho pïchighöch.

¹⁸ Melö kimustoy ngöghomnyö söker anta sanay cho pïchighöch, tïlöy olyo kapïlpong nyo pïrir nyo mi nanam ori.

¹⁹ Melö kikongityot olyenyi nko topas nyo pö Etopya anta kikongityö nko olyo koltin cho pïchighöch.

²⁰ “Onö nyu wölini ngwïno ngöghomnyö? Akwonö wölo möngöy pköchin?

²¹ Kikïwïnga konyi tïkwïn löwïr cho söpsot akeyentö tömasïwa ompö töritwö cho pilyot.

²² Lentöy ngwen nko meghat, kikïwisecha yitïn ngalechi löwil.

²³ “Nkït Tororöt wölo kïnyorchini ngöghomnyö akï nyinte onkït nyo nkït wölo töpo.

²⁴ Ompöwölo sïwïyi nyinte söremwok pö ngwïny akïsïwïyi kïgh anka tïkwïl nyo mi ngwïnyi yïm.

²⁵ Otini kitö nyinte yomat nïkisyenyi akukongityö wölo teno pögh

²⁶ otini kirur nyinte ilat wölo ropöntoy akwighchï kiryal or,

²⁷ atolapay kïsïwa nyu Tororöt ngöghomnyö akïmwatïta kipintit akuror.

²⁸ Atolapay kïlenchï ptangengmöt, ‘Kekonyït Echotyon kï ngöghomnyö, kekïrö kegh ghöyityö kï pköchin.’ ”