AYUPU 26 - PIPÏLIA

Ayupu

¹ Kuyokyï Ayupu lö,

² “Wechï kingarakanyi chi nyo puryö owesyö! Wechï kisörunyi chi nyo nyarkalal!

³ Wechï kirurönyi chi nyo puryö ngöghomnyö, aiparta kinkïtöt nyo pö man kïyasta!

⁴ Ngo nyo kengarakinyi mwagha ngalechï akï mïkulöwu ngo nyo kingalana kutingu?”

[Pildad]

⁵ “Potonchot chane cho kimeghö, potonchot pögh cho mi ngwïny ori nko cho möngöy wöloni.

⁶ Möwïngatnye wölo le ngwen ompö tawu Tororöt akïmötïngnye köröwon nyo körtoy.

⁷ Ighöy Tororöt okumpö löt kïrumï yïmö nyo karkarate akuwusö ngwïny wölo puryö kïgh nyo nömöy.

⁸ Ighöy pögh poltoy cho tuwöch kïtökögh pögh amelö körerisyot poltochoni ompö kisiköt.

⁹ Yenöy arawa akukorkorchï poltoykachi kïghömï.

¹⁰ Kiwach nanamtin kuwit lö tïlkwïch, wölo le rotyo löpoyïn nko tuwïn.

¹¹ Potonchot pchörino yïm akïtöngönchï kipkongötenyi.

¹² Ighöy Tororöt nanam kïsï ompö owesyenyi akïtörotör ompö ngöghomnyenyi, tyompö nanam nyo kïlentöy Raap.

¹³ Kikigh yïmwöy kïpïchighöchitu ompö kimïnytanyi, kïtora ewunyi moroy nyo pïrtït.

¹⁴ Wölo chete pat kï cho ngörï ompö ighisyewutkachi wölo choni kelïmonecha chamat nyo le kite ngalechi! Wölo ngo nyo muköy kïpköchini tïlöteto owesyenyi?”