AYUPU 24 - PIPÏLIA

¹ “Ompö ne tömötat Kimuktoghin ato kirwokyini mwokïyis? Kölö ne pich cho rïpöy Tororöt tömösïwïyi osiswechoni?

² Notegho pich koghi rotyotïn, choröy kechir akuyakwï.

³ Söroy chane pönon sïkïryikwa akïkata mïsïktin eghinekwai ompö ghosyö.

⁴ Yumtoy chane mey ompö ara or wïnyo kegh meyi ngwïny löwïr tawungwa.

⁵ “Petöy meyï woyengwa le chemormor cho yörotoy omisyö ompö siriron atökïnyorï.

⁶ Petöy chane kulungöy pareni pich kïkösöy pagh akï kwaghata sapipun ompö pareni mwokïyis.

⁷ Rusot chane kïchïrutöch kïyech kïpuryö sïro akï möminye kïgh nyo körtegho kegh kaghïtan.

⁸ Nïrsot chane ompö pögho kutïngkot cho köghït akudap ghatoy ompöwölo yöröy wölo ghïmo.

⁹ Mi pich cho chengo mnyarkil nyo le panan kame akïcheng kïnama pösöntanyi.

¹⁰ Pestoy kïchïrutöch puryö sïro, kïrkegh kwipöy pagh, kwomöy kömöy.

¹¹ Ighöy mwowöyi arol akïpïr pögho sapipun kuyinta, wölo omöy maral chane.

¹² Kiriryö pich kuwongwï cho meghyot ompö kanasyan, kuteghyö cho kikikotön kïyöröy kingörokut, wölo melö terchini Tororöt chane.

¹³ “Mi pich cho töghöy löpoyïn, cho menkïtcha ortïnechi, amörïpöcha ortïnechi.

¹⁴ Ngetöy pörin kïtökïtuw atökïpar mey nko cho le chopot akïchorsyö ato le oghö.

¹⁵ Köngöy tïkwïl cheporesyan tuwïn, akïlentöy, ‘Möminye chi nyo sïwïyanïn,’ atolapay kuyen konyichi tömökïsïwa.

¹⁶ Wiröy chorï korïn oghö, akïkörchï kegh korïn pöghet amenkïtcha löpoyïn.

¹⁷ Ompöwölo tuwïn nyo tuw lömïs kïlenye yekon omö chane löwïr, kikïnaghta otyeghtino tuwïn.

[Sopar]

¹⁸ “Omwoghekwa lö, chutöy puser chane lawel, akïchïpote korengwa, amökïminye nyo tökïmïlo pareni sapipun.

¹⁹ Le wölo chimtoy kömöy nko kilayat pögho takarasen kïlenye nyoni wölo wokyini ngwen chane cho ighöy ngokï.

²⁰ Wutyegho chane mutïneko kamati, yinöy nkut chane mïnchïrisyot.

²¹ Ompöwölo kichop kong chane kor cho le sonon akïtagh kusyonchï koru mamötin.

²² Wongöy Tororöt pich cho owesöch ompö charutenyi, wölo nyini kanget kupotö mwokïyis kikönöto söpon.

²³ Töni Tororöt chane kïlïmchï kegh lö kïmi ato tume, wölo mi konyichi kïtopönöy ortïnekwa.

²⁴ Kitöroröy chane nyo tangogh, wölo nyo matya kupotyö, silonchot akïyomö le suswon kïkösöy chane le mötöwo matay.

²⁵ Kïkany ato mölenyoni, kï ngo nyo lentöy ochan putin, anta mwa lö kwïle ngalechan?”