AYUPU 13 - PIPÏLIA

¹ “Kyasïweghan konyichan tïkuchoni löwïr, kyalïman yitichan akïpköchanïn.

² Kïyinö onkïtökwa, onkïtön tïkwïl melö ochan kïyo le chi le kwïle ompö akwa.

³ Wölo omökan ongölonchine Kimuktoghin amökan omwochine Tororöt ngalechu.

⁴ Wölo ochikwa kitongi putintön. Ochikwa löwïr chepsakïtis cho pö putïntön.

⁵ Opï kosisyekwa lasay! Kötölïku nyoni ana ngöghomnyö ompö akwa.

⁶ Atere nyu omwowan ngalechu aköpchï yit lokechan.

⁷ Ayo, mïchini kemwaytegha Tororöt putintön, akemwaytegha ngala lïs nyinte?

⁸ Osöröpunekwa so nyinte? Orompörekwa so Tororöt ompö ka kirwok?

⁹ Köromitu so ompö akwa ato kïtokwa Tororöt? Anta omukekwa olïse nyinte le ptangengmöt?

¹⁰ Pkongokwa nyinte nyo mötïny kïrkegh apartenakwa kwölöt ompö wïngat.

¹¹ Motyeghonekwanye so wowïntanyi? Mönömokwanye so ristanyi?

¹² Karkegh ngalekwa cho pö ngötïnyö nko aren akïkarkegh tiyenkwa nko longa nyo kikigha mönö.

¹³ “Osisyene, angalanan ante onkït kwigha kïgh nyo kegha.

¹⁴ “Omitan kïpsach atö kegh ngatalat amitan kïpsach achalta söpenyu.

¹⁵ Ato paranïn nyinte, kïparanïn ne nyo kötötokönan, wölo kïrkegh kölenyoni oghetan kegh ongölonöy ompö tawunyi.

¹⁶ Lïku nyoni sörunötenyan ompöwölo möwetönye mwokïyon ntökwit tawunyi.

¹⁷ Atera ngalechan lasiny akany kïlïtöy yitikwo mwatïtagh.

¹⁸ Kyatatan kirwokenyu lasiny onkïtön lö motïngetanye kigheghchin.

¹⁹ Ngo nyo tïng kirwok nko ani? Nyo kötö asis lasay ameghchï kegh.

²⁰ Ato ichömwaninyi tïkuchï le odeny, kïmowïngoninyinye kegh.

²¹ Nateghena ewungu nyo munganïn amekany kïkonanïn otyogh ristöngu.

²² Atolapay ikursyö atongïtönön antaikany angalanan ateyokwante.

²³ Ekï tya köny lelutköchan nko ngokichan? Ighante onkïtï lelutyenyu nko ngokichu.

²⁴ Ompö ne tewïnyenaninyi kegh, aiyitaninyi le punyontengu?

²⁵ Yoteghonenyi so sökon nyo ipöy yomat aipïrpïr morïryon nyo kiyam?

²⁶ Ompöwölo kekiranyi ngal cho ngwonöch ompö ani aighanyi akasan ngokiko mïnïngityenyu.

²⁷ Keratenyi kelyechan sïrïmtin, aikïtönyi ortïnechan löwïr aighchinyi rotyot wölo tïköy kelyechan.

²⁸ Pïyïsöy ptangengmöt le kïgh nyo kanïn lenye sïra nyo kam rirïm.”