AYUPU 11 - PIPÏLIA

Sopar

¹ Kuyokyï Sopar lö,

² “Möminye so chi nyo mölyöngu ngalechï chang tenö chï? Lïku so chi pö man ompö ngal cho chang cho kangalan

³ Ilentenyi so, Ayupu ighöy pich ngalanatengu kïsisyö? Akwotinö ingemïsïyenyi kïmöminye chi nyo töninyi arasï?

⁴ Ompöwölo imwoghenyi lö, ‘Kïltïte kinetutköchan nyo ochan lïpop ompö tawu Tororöt.’

⁵ Opï kangany kutinyi Tororöt, opï kangalan kïmölyongunyi!

⁶ Nyo kötö mwowun wïngut pö ngöghomnyö ompöwölo pköchini nyinte kïgh löwïr! Ainkïtï ngat lö mayanye ompö Tororöt kïrïp ngokiku löwïr.

⁷ “Imukenyi ntenkïtï tïpö Tororöt cho pö wïngotï? Imukenyi ntenkïtï sörömu Kimuktoghin?

⁸ Lowöch kïtïl yïm, ichengenyi ne? Kiwö to kïtïl ngwen, inkïtönyi ne?

⁹ Kogh kipimatenyi kïtïl ngwïny akïtapes kïtïl nanam.

¹⁰ Ato naminyi Tororöt akurwokyinyi, ngo nyo muköy kupöpeköy nyinte?

¹¹ Ompöwölo nkït Tororöt pich cho puryö kingörokut. Ato sïwa Tororöt ngokï kïpïstoy put kupotyö lenyini?

¹² Aghïgh kïpköchï kïgh sölwö le ato aghïgh keyakwïy tyompö wuw.

¹³ “Ato ighanyi mïkulöwungu kuten, isyolchinenyi nyinte ewuneku.

¹⁴ Ato itïngetö ngokï, ilasta amepïsyï ghöyityö kïmang kongu.

¹⁵ Iwetenyi itöngöy tagh ompö nyïkanat. Ighyongtonenyi amewöghisïyenyinye.

¹⁶ Iwutyeghonenyi nyu nyörïlwoköku inonenyi le puseryon nyo kikuwer.

¹⁷ Löpoyitu söpontöngu kïtïl kilïwunöto asis pöghet kwen, wöghöku tuwïntanyi kïlïku yekon,

¹⁸ isïkenyi nyakanat ompöwölo mi kikönötö kïripinyi airïwönyi ompö kalya.

¹⁹ Irïwenyi amöminye kïgh nyo otyeghoninyi yöröy pich cho chang kingörokutyengu.

²⁰ Wölo nuksot konyi mwokïyis, pötyini chane or anka tïkwïl nyo chïwïtyegho, akïlïku könötengwa nyo pö söröm meghat.”