APAKUK 3 - PIPÏLIA

¹ Kuröto werkoyon Apakuk, kïrïp kegh nko kuröto Syikionot.

² Kyalïman tïkwïn cho kighanyi, we ECHOTYON nka nyoni ighanïn awaghinyi tya. Igha ye nyu ngat ompö osiswecha tïkuchoni kighanyi könyisyok. Inan kisyonchin, we ECHOTYON ompö nörekyengu.

³ Kingwïna Tororöt koro Edom, kingwïna Nyinte nyo Tïlil kutïng pö Paran kulum ororyenyi wölnö le yïmwöy, akïghömï salatenyi ngwïny.

⁴ Otini kechumï, kulïwï löpoyïntanyi le kiryal, nyo ngwïno ewunyi wölini kikiwïnchï owesyenyi.

⁵ Yonu chepköröngwö nyo ngwïno wölo mi nyinte, akïyonï amal kïrïpï kösotyononi.

⁶ Potönöy ngwïnya otini mökïwestonye nyinte, kïkany ato topöntö nyinte kïpotonchö pipö ngwïny löwïr. Ighöy nyinte kutïngkoti könyisyok kusyewsyewisyö akwigh komos kechïchïn, komos cho kiwestegho nyinte könyisyok.

⁷ Kyasïwan pipö Kusyan lö kyotyö tya ompö emenikwa, akimi pipö Midyan kïpotonchot ompö mïghöt ompö kestonikwa.

⁸ Kichö so lalwatïn, ECHOTYON cho kighinyi nareka anta ighinyi sïngirenö? Anta nanam nyo kinörekyinyi, atanye kighanyi piköku kïrïnta pungkökwa.

⁹ Kiratanyi kïwantingu aitöpö kïpsach atewutïtenö kotiku aikarerenyi kor lalwatïn.

¹⁰ Kiwöghisyö kutïngkotï otini kisïwinyi, kughum nanam, kutïkumisyö mirtino pögh.

¹¹ Kughyö asis nko arawa ompö möngengwa, otini kirot kotiku cho kiryölsot nko ngotïngu nyo kwerkweröy.

¹² Kisïngirenyi nka nyoni kiwenyi iwer ngwïny, ainyaknyakata pipö ngwïny kïmïkul.

¹³ Kiwenyi atesörunö kïlanköku ategheta pöytoghintengu nyo kikïlanyi, ainganganyi pörko kö pö mwokïyon lö wanka.

¹⁴ Kiwut kotiku kintöghoghinteto lïkengwa nyo kingwïn kughum le chepkïrïri akutoytoyecha, le pich cho ngöreksot ato nyïkwïdoy mey le tïpö wudïn.

¹⁵ Kinyaknyakenyi angoletineku nanam akwigh pögh cho owesöch kutïkumisyö.

¹⁶ Kyalïman choni löwïr, amïghön kïpotananïn kut ompö kiwaghat, kunyulnyulisyanïn ko ompö orinyan, wölo oköngan asisoni pö nyarïl ompö sison, otini ngwïnöy Tororöt kuchopöy kong pungköcha.

^17-18 Kïrkegh puryö akwa keti makany akïtïryolöch keti sapipun, kïrkegh puryö kïgh nyo kakïnyorunö keti arol, amömicha pagh paren, akïrkegh kömeghö kechirye lömïs akï puryö tïch piway, kïtongörökan ompö ECHOTYON, ongörökyinan Tororöt nyo le sörunintenyan.

¹⁹ Echotyon TORORÖT nyo le owesyenyan. Ngörokanïn nyinte apus kutïngkot, cho koghöch amelö opïtan, le wölo rïptoy korinya.