APAKUK 1 - PIPÏLIA

¹ Anyï ngölyon nyo kingongchï ECHOTYON werkoyon Apakuk.

Köngwïrngwïrön Apakuk lö puryö man

² Oriran nko oyï nya ECHOTYON, otini otepinyi kingarakat amelö ichömenyi tere? Anta arirunyi lö, “Rïmö,” wölo mesörunyinye.

³ Ompö ne tekanyanyi asïwan tïkwïn cho ghach cho ighisyot aikany asïwan kömpölelyö? Mito tawunyan kiwurata nko köromnyö akïmi poryot nko kanyanyighos.

⁴ Kikepörchoch nyu kirurut ompö, amökeghönye man ompöwölo kewit mwokïyis pipö man nka nyoni nyu kirwoköy nyo masta.

Kömölyöngchï ECHOTYON Apakuk

⁵ Otopöne koros tatanganya amïghyö! Ompöwölo oghan ighisyö ompö osiswekwa, nyo moghönekwanye, kïrkegh kemwowokwa.

⁶ Ompöwölo ongetan pipö Papilonia, pipö punton cho köromöch akukelöy tökïcheng koros cho melö chikwa.

⁷ Ighöy chane mïkulis pö pich kïmïghyö akïpotonchö akïkwol kegh ntökunan lö möminye kïgh nyo ighöy chane nyo lelate.

⁸ Pïrtït angoletinekwa kïtïl möril cho sutyote akï ghach kïtïl suyï cho köromöch, komtoy angoletinekwa ompö anisa siwu askarin cho kötöy angoletinechoni cho pkono wölo low, pilu chane le sichtin cho nömöy kïgh.

⁹ Pkonöy löwïr ompö köromnyö meghsot pich mïkulis akïmïghyö ompö woptin löwïr otini karikwï chane. Ghömïtöy naman cho makïrar.

¹⁰ Meyitöcha pöytoghï lö kïgh, sösöy kintöghoghï. Metimönye nayatu kanasyan, ompöwölo tïkumöy nyïngwïny akïpar kanasyante.

¹¹ Atolapay kïwïchtö kegh le yomat akulet tagh, akwigh owesyengwa kegh kïlïkwï tororöt!

Köngwïrngwïronchï Apakuk ECHOTYON ngat

¹² Melö so iponyi kokay nko kokay, we ECHOTYON Tororötïnyan nyo Tïlil? Melö kïmeghocha nyonikïny. We ECHOTYON, keghanyi pipö Papilon kïparecha, nyi nyo ichï Ghatyencha, keghanyi chane kïlïkwï sitencha.

¹³ Tïlilöch konyiku tya cho mötopönöcha ghöyityö, amöchömönye kïsïwa pich cho le lelï. Ompö ne nyu tesisenyi otinö mi mwokïyis kuwongöy pich cho tïlilöch kïtïl chane?

¹⁴ Ompöwölo kepïsyinyi kïkarkegh chane nko kaghagh pat anta kongityö nko pïrech cho mötïng kintöghoghintengwa.

¹⁵ Nömöy pipö Papilon pich ompö moyontin le ato kaghagh chane chuto moyontinekwa akuteghyö ompö ngörekyö ompö namatengwa.

¹⁶ Ropchini amörostin ompö akïpel körösyon nyo konyïto moyontinekwa le ato kö tororötin chane.

¹⁷ Letöy so nyu tagh kïlölököy moyontinekwa akïpar kokay pipö punton kïpuryö kisyonöt?