AMOS 7 - PIPÏLIA

¹ Kïlenyona kuporwanïn Echotyon TORORÖTsïwïygh. Kyasïwan nyinte kwighöy talam ato tenö kikel suswo kyaki pöytoghin. Akökikusïl ngat soswon atoni.

² Kyam nyu talamechay susechay ompö kore kïmïkul, akwotini kimuchö, olan, “Löstoghchinö piköku, we Echotyon TORORÖT! Sopchot lö ne piköku nya? Ompöwölo nyörkölöl chane nyoman.”

³ Kiwaghak nyu ECHOTYON kinonutyenyi akïlö, “Melö tökwigho cho lenye nyete ngat.”

Sïwïyaghpa ma

⁴ Kuporwanïn Echotyon TORORÖT sïwïyagh asïwan Echotyon TORORÖT kïkuru ma nyo lïku sitöt kuwany nanam nko wölo le sany.

⁵ Atolapay osoghinyi lö, “We Echotyon TORORÖT, söpchot nyu lö ne pipö Yakopo? Ngorï nyoman chane!”

⁶ Kiwaghak nyu ECHOTYON kinonutyenyi akïlö, “Melö tökwigho anka nyo lenye nyete.”

Sïwïyagh nyo pö kipimat

⁷ Asïwan Echotyon kughyongö nayat nko kipimöwon,

⁸ kïlenchanïn, “Amos kesïwenyi ne?” Olenchan, “Kipimöwon.” Kïlö, “Rosa, otöninan kipimöwon kwenu piköchan pipö Israel, nyo melö olöstoghchinan chane asïyech kokay.”

⁹ Kinyoröy wölo sogho pipö Isak körkeyïntin kïlïkwï kïratis, kinyoröy wölo tïlil ompö koro Israel, aparan kö pö Yeropoam lömïs.

Amos nko Amasya

¹⁰ Atolapay kïyonta kut Amasya tïsinto Petel wölo mi Yeropoam pöytoghinto Israel kïlenchï, “Kikichaminyi Amos ompö pipö Israel. Wulyot pich ngalechoni.

¹¹ Lentöy Amos meghöy Yeropoam nyo mötïny akïpetöy pipö Israel pïnotön ompö koronï.”

¹² Kïlenchï Amasya Amos, “Wi we werkoyon, wïyö koro Yuda aingorsyö akepaghenin wölini.

¹³ Wölo ikïr mengorsyenö ompö Petel ngat, ompöwölo tïlil akï Kö pö Tororöt* nyo pö pöyunöte kïmïkul.”

¹⁴ Kuyokyï nyu Amos Amasya kïlenchï, “Melö ochan werkoyon amelö werkoyon paponyan, wölo ochan mösöwon achan ngorinto makany.

¹⁵ Kïngwïsenanïn ECHOTYON achey wölo kyomitan, akïlenchanïn, ‘Wïyö ngora ngal akwompö piköchan Israel.’

¹⁶ Tera nyu ngölyonto ECHOTYON nyi nyo ilentöy mekany kïngor möt Israel. Amantegha pipö Isak.

¹⁷ Kïlenyona lentöy ECHOTYON lïku korkengu chepkartayan ompö kanasyan akepöröy moneku lömïs werko nko tipi. Akechaghachagh korengu kïpöyit pich walaka. Imeghonyi nyinte kor nyo le sïmnyon, petöy nyu pipö Israel pïnotön ompö koronï nyo mötïny.”