AMOS 3 - PIPÏLIA

¹ Atera ngölyontonï mwowokwa ECHOTYON we pipö Israel Akwa löwïr cho kyamïtunan koro Misri.

² “Ochikwa pich opïn ompö punton löwïr ompö ngwïny cho onkïtön. Kïlenyona omungokwa ompö ngokikwa löwïr.”

Ighisyo Werkoyon

³ Rutoy so pich odeny ameyomis kegh?

⁴ Tïlöy so ngötïny ompö wuw ato möminye tyony nyo karïng. Akïriröy wawa ngötïny ompö köpönenyi ato mi kïgh nyo kam?

⁵ Ayo, nömöy ngöghöp tarit ompö ato möminye ngöghöp? Akï chörtoy kegh ngöghöp ato manamnye kïgh nya?

⁶ Ayo, chöghöy konti poryot ompö kanasyan, amotyonye pich? Akwityini nyarïl kanasyan ato metyorchïnye ECHOTYON?

⁷ Melö ighöy Echotyon TORORÖT kïgh ameporchï mötworichi werkoy.

⁸ Ngo nyo mewöghisïyi ato tïl ngötïny? Ato ngalan Echotyon TORORÖT, kïngo nyo mömwotïtoy ngölyontenyi?

Kiwonyogh pö Samaria

⁹ Omwochinö pich cho möngöy kori pöytoghi Asirya nko Misri, olenchinö, “Oghömïtyinö kegh kutïngkoti Samaria, atasïwena ngal cho echön cho ighisyegho ori.”

¹⁰ Lentöy ECHOTYON, “Melö nkït pïchï kwighöy kïgh nyo karam, kenyïghit karikwa tïku chorsyö nko pörsyö.”

¹¹ Kïlenyona lentöy Echotyon TORORÖT, “Riköy ye pung koronï akunyarnyar wölo gheto kegh pich akïpar korenkwa wölo aghïgh.”

¹² Lentöy nyu ECHOTYON, “Melö ato sörunö mösöwonto kelyo kech anta motït kuti ngötïny, kesöru nyu pipö Israel cho möngöy Samaria cho kedukyeghö luchtina pïrïnta ompö korikwa cho echön.”

¹³ Lentöy Echotyon, TORORÖT Kimuktoghin, “Atera, arirchï pipö ara Yakopo.

¹⁴ Asisini komungön pipö Israel ompö ngalekwa onyoran ato kïpelo amöros ompö Petel aketörotör yiti köchïntoy.

¹⁵ Ongonyan kari pengat nko kömöy akenyar korïn cho kikïteka kela pelöw nko karïn löwïr cho echön.” Mwoghöy ECHOTYON.