AMOS 2 - PIPÏLIA

Moap

¹ Lentöy ECHOTYON, “Melö oyodeghonan Moap sitöt ompö ghöyitwokachi cho pö kïnomnyö ompöwölo kipit koyo pöytoghinto Edom lökïr.

² Kïlenyona oyokyinan ma Moap tökïpel kuwany wölo gheto kegh ompö kanasyanta Keriot. Meghot pipö Moap ompö kighïmöto poryot otini teghyot pipö lïk nko chöghöto kontin.

³ Otïghan pöytoghinte ompö kwenungwa nko yetïntinechi löwïr.” Mwoghöy ECHOTYON. Yuda

Yuda

⁴ Lentöy ECHOTYON, “Melö oyodeghonan Yuda sitöt ompö ghöyitwokachi cho pö kïnomnyö ompöwölo kitagh chane kirurut pö ECHOTYON amelö kitökïrïp ngalechi. Wölo kipot chane tororötino putintön, tororötin cho kipöghisyechï papotïnekwa.

⁵ Kïlenyona oyokyinan ma Yuda tökuwany nïyet pö Yerusalem.”

Kirwoko Tororöt ompö pipö Israel

⁶ Lentöy ECHOTYON, “Melö oyodeghonan sitöt Israel ompöwölo kalta pipö man kïlïkwï sekey akwalta pönon kwegh.

⁷ Pich cho pïröy pich cho memuktocha kegh, atolapay kïmas mey mönyorï mantangwa. Ghömechini chi nko werïnyi kurïwotoy korka nyo le mötworin, akusïmnyon kaynenyan nyo tïlil.

⁸ Ompö wop tïkwïl wölo kïpelo amöros, sïsïnöy pich sïro cho kasara mey, akepöghisyeghö kemanga pösönut. Gheghsyegho Kö pö Tororötïngwa* dipay* cho kichenga pich cho kitïng pösöntinekwa.

⁹ “Wölo kawanyan pipö Amori ompö tawungwa, pïchï koghöch le tarakit akwowesöch le ket cho ongeröch. Kyanyaran akwechi ompö yïm, adïngön tikitkö ompö ngwïny.

¹⁰ Kyopunekwa koro Misri, antöghoghwokwa könyis tömönut angwan ompö surkwen tachenga koro Amori kïlïkwï nyingwo.

¹¹ Kyaghan monekwa walaka kïlïkwï werkoy, kïlïkwï karachïnekwa walaka nasirin.* Mölenye nyini nya we pipö Israel? Mwoghöy ECHOTYON.

¹² “Wölo aghakwa nasirin kïgha dipay, amwochikwa werkoy lö, mongorsyö.

¹³ Arosa nyu opïrchinokwa ngwïny ompö wöloni omitekwa le nkari nyo kitungchï pögh ngwïny.

¹⁴ Wonyegho nyinte nyo rïpöy kirïpötö akupotö owesyo nyakanat amemukönye chi nyo awes tökïnyorï kegh.

¹⁵ Amelö tökumuköy tökughyongtö chi pö kotï amelö söru chi kegh nyo pïrtït anta sörï chi nyo wegho angole.

¹⁶ Rïpöy kïchïrut asisoni ompö kwenu nyökon chi nyo aghïgh mïkulögh.” Mwoghöy ECHOTYON.