3 YOANA 1 - PIPÏLIA

¹ Kakirunyi Yoana nyo ochï poyon. Ompö kongenyan Kayo nyo ochöman:

² Kongenyu, osoghan lö teten tïkwïn lapay ompöwölo imitenyi ompö otöp nyo pö por, le ato onkïtön lö itïngetenyi perur.

³ Kyangarakan nyoman ato kipkana tupchenicho walaka korengu cho kimwowanïn wölo iwetïtonenyi ompö man, le wölo kewetïtonyi su ngat ompö man.

⁴ Möminye kïgh nyo konanïn ngörekyö nyo wow kïsir alïman lö tïpisot monechan ompö man.

Kakïsal Kayo

⁵ Ichinyi chi nyo ghanate nyoman kongenyu, ompö pöghisyö nyo ighchinenyi pipö Kristo,* kïpïr tya to.

⁶ Kisowintönchï chane chomnyengu ompö kanisa. Ighenyi nyu nyo karam ato ngarakanyi chane kulet tagh ompö rutoghtöngwa ompö or nyo mïlöy Tororöt.

⁷ Ompöwölo kipa chane rutoghtöngwa kïpöghisyeghchï Kristo, akimayarcha kingörokut pich cho puryö kighanat ompö Tororöt.

⁸ Nyo mïchinecha cho kïchï pipö Kristo kengaraka chane, atökechagha pöghisyengwa ompö ngala man.

Diotrepes nko Demetrio

⁹ Kyokirchan kanisa palalyan nyo tangogh, wölo melö kicham Diotrepes nyo kigh kegh lö ochï kintöghoghintengwa kïkonyït ngalechan.

¹⁰ Kïlenyona ato angwïnan, ongwïnan omwowu kïgh anka tïkwïl nyo kigh nyinte, tökïmïr tïkwïn cho pö putintön cho mwoghtoghenecha. Amelö choni opïn, anyï melö toköy ngat pipö Kristo ato rutowï, akïtögho pikö walaka cho kömököy kïtoköy to akutulö chane kanisa!

¹¹ Kongenyu, memustö kegh kïgh nyo gha, wölo irïp nyo karam. Anka tïkwïl nyo ighöy nyo karam, kïpo nyinte Tororöt, akwanka tïkwïl nyo ighöy nyo gha kïtomönye kunkïtï Tororöt.

¹² Ngölono chi anka tïkwïl karam Demetrio nyo, akïngölono nyo karam man tïkwïl nyinte. Akesowintönchinecha tïkwïl ainkïtönyi lö man söwintönencha.

Takwes nyo pö söröm

¹³ Chang cho komökan omwowunyi, wölo momökanye omwowuno palalyantanï.

¹⁴ Okönan lö tomönye kite kenyoryö atökengalana kesïwïye kegh.

¹⁵ Nya kïtöpö kalya nko nyi. Ketokwesï kongotiku löwïr. Itokwesï kongoticha löwïr.