2 TIMOTEO 3 - PIPÏLIA

¹ Inkïtï lö itu osiswö cho pö kömpölelyö ato le söröm.

² Lïku pich osiswechoni cho yongöy kegh opïn nko cho pïrchini ropïyen nko pich cho kwolöy kegh nko cho wulö kegh nko cho mwosïyi nko cho mötekönye yiyikwa nko cho meyokucha sörö nko cho mökonyïtöcha Tororöt,

³ nko cho melö chömöy piko walaka nko cho puryö kisyonöt nko cho swömöy pikö walaka nko cho le chepomutïn nko cho sïngiröch nko cho lilöy kïgh nyo karam.

⁴ Lïku pich wïchtoghï nko cho möyongöy kïgh nko cho kwolöy kegh nko cho chömöy ngörekyo ngwïny kïsir kïcham Tororöt.

⁵ Lïku pich cho, ato kiros ompö sany kïlentöy pich kighönï, wölo ompö oringwa töghöy owesyö nyo kïnyoruno kighanat. Ilowit kegh ompö pich cho lata choni.

⁶ Ompöwölo leptoy kegh pïchoni walaka kïlïtöy kori pich atolapay kulï mötöwöy akïpayta kor cho le sölwöy cho kösönöy nïkisïntino ngokï akï cho mi kïrïpöy pïrchinogh anka tïkwïl.

⁷ Mi koruchoni kïtenö osis kumukyini, kinetöy kegh, wölo memuköcha kïnyorï wölo mi man.

⁸ Mölöy pïchoni ngala man kïle wölanya kimölöy Yane nko Yampre Musa, akï pich cho kiwïryö mötöwö akupïtyeghö ara kighanat.

⁹ Wölo itöy onö? Ompöwölo sïwïyi lawel chi anka tïkwïl sölwontönengwa le nyaye kïsïwa pich sölwontöno Yane nko Yampre.

Kirurut cho pö söröm

¹⁰ Wölo nyi Timoteo, olentan kinkïtunyi kinetutköchan nko otöptönyan nko kerötenyan ompö möngot nko kighanatenyan nko mïkukönötenyan nko chomnyenyan nko kamaghatenyan.

¹¹ Kinkïtunyi tïkwïl wölo kikichoptanïn kong owongwï, ainkïtönyi ngalechanye löwïr kipkonchanïn ompö okumpö Antiokia, Ikonio nko Lustra. Akï ngwonïn nyo tya nyaye kyakamaghan. Wölo kisörunenanïn Echotyon choni lapay.

¹² Nyoman Kichopöy kong chi anka tïkwïl nyo kamach kïmöngisyö kïkonyïtöy Tororöt, otini kikïlinyö nko Kristo* Yeso.

¹³ Tösöy tagh kïghochitu tya pich cho ghach cho le lïsï cho lïsöy pikö walaka akelïs kegh chane tïkwïl.

¹⁴ Wölo nyo le nyi, tasa tagh rïpa ngalechoni pö man kikinetinyi akeghananyi lasiny. Inkïtönyi nyinte lö ngo choni kinetïnyi.

¹⁵ Inkïtönyi tïkwïl lö kïngeta otini kichinyi monïng, kinkïtunyi Kikirut cho Tïlilöch cho muköy kwipunyi ngöghomnyö nyo ipu sörunöt ompö chi nyo ghönöy Kristo Yeso.

¹⁶ Tororöt nyinte nyini kintöghoghchï kekir Kikirut löwïr, akï cho mïchini keneta pich man akïripö kegh ghöyityö akuporchini pich cho kötosonchö ompö ara man. Netöy tïkwïl kïmöngisyö ompö or nyo pö tïlilïn,

¹⁷ atökumï lasiny chi nyo pöghisyechini Tororöt, kwigh pöghisyö anka tïkwïl nyo karam.