2 TESALONIKE 3 - PIPÏLIA

¹ Nyo pö löt nyu tupchenicho, osoghwecha atökumï ngölyonto Echotyon kïyasta akwororit le wölo lata ompö kwenunkwa.

² Asoghwecha tïkwïl Tororöt kïsörunenech pich cho ghach akï mwokïyis, ompöwölo melö kikughan pich löwïrï Lökoyechete.

³ Wölo ghanate Echotyon nyo ighokwa achïchïma akïripenokwa Mwokïyontonay.

⁴ Akï nyinte Echotyon nyo kökonecha kikönöt ompö akwa aketïngetecha man ompö Echotyon lö, omitekwa oghöy aletöy tagh orïpöy ngalechay kikïmwowokwa.

⁵ Nya kuntöghoghchï Echotyon mïkulöwekwa ompö chomnyo Tororöt nko ompö mïkukönöt nyo konecha Kristo.*

Mïchini chi anka tïkwïl kwigh ighisyö

⁶ Kisikyinokwa, tupchenicho ompö kaynata Echotyontenyo Yeso Kristo lö, olowitenö kegh chi anka tïkwïl nyo ochï kighönin lentöy kikesörwech akï sosö amelö rïpöy kinetutköcha cho kikïmwowokwa.

⁷ Onkïtökwa lasiny lö mïchinokwa oghe le nyanye kikighecha ompöwölo melö kikïlïkucha soson ompö kwenunkwa.

⁸ Melö kikyamacha omisyo chi anka tïkwïl amökïghaktecha. Nyinö kitökyomecha kwïle, kesïngacha nangat nko pöghet atömökitö nïkisïn chi anka tïkwïl ompö kwenunkwa.

⁹ Kikighacha lenyoni melö ompöwölo kimökïtïngetechanye man nyo kikïsïko akwa kingarakat, wölo kikighacha lenyoni tökïlïkwï körkeyïn nyo orïpekwa.

¹⁰ Kikïmwowokwa atanye kitökemitenöcha nko akwa lö, “Makany kwomisyö chi anka tïkwïl nyo melö chomöy kwighöy kïgh.”

¹¹ Kakïmwaghacha lenyoni ompöwölo kïlïmecha lö mi pich cho omitekwa tïkwïl cho tïpisot otöp nyo pö sosönöt cho melö tïng kïgh nyo ighöy nyonikïny kïpoto kikoröt nyo koro ngaleko pikö walaka.

¹² Kisikyinecha pïchoni akechilöy chane ompö kaynata Echotyontenyo Yeso Kristo kwip kegh chane ngwïny akïpöghisyeghö ewunekwa atökïnyorï kïgh nyo söpcheghö chane.

¹³ Wölo moghochö cho le akwa, tupchenicho agha ighisyewut cho karamach.

¹⁴ Töptoy omitekwa nko chi nyo melö rïpöy ngal cho kakikirchicha palalyantanï. Ato lenyoni, onkïtï lö ngo chichoni amapesïta tïkwïl nko nyinte atökïsïch nyinte arasï.

¹⁵ Wölo magh nyinte le punyon, wölo orirchï nyinte le tupchengwo.

Ngala söröm

¹⁶ Nya kïkonokwa ye nyu nyinte Echotyonto kalya kïteno osis ompö or anka tïkwïl. Nya kïtöpö Echotyon nko akwa lapay.

¹⁷ Kakiran ewunyu ante Paulö lö, Katakwesakwa! Nka nyete wölo okirtonan kaynenyu ompö sörömuto palaltinechan löwïr.

¹⁸ Nya kïtöpö pöropcho Echotyontenyo Yeso Kristo nko akwa lapay.