2 SAMWEL 7 - PIPÏLIA

¹ Otini kökimöngisyö Daudi katanyi akutö ECHOTYON nyinte kalya ompö pungkachi cho kimang kuwit nyinte,

² kïlenchï pöytoghintö werkoyon Natan, “Rose köny lö, omöngan kö nyo kikïteka tarakit, kïmi Santuku Muma* ema.”

³ Kïlenchï Natan pöytoghin, “Wïyö igha löwïr cho inonenyi, ompöwölo mi ECHOTYON nko nyi.”

⁴ Wölo kïlenchï ECHOTYON Natan aghononi,

⁵ “Wïyö mwochinö mötworintenyan Daudi lö, ‘Kölö ECHOTYON, melö nyi nyo itekwanïn kö nyo omöngan.

⁶ Tomönye amangan kö kïngata otini kyamïtunan pipö Israel koro Misri nko ye, wölo kyomitan omöngöy ema.

⁷ Kimatepanye poyi Israel cho kyotönön kïpayta piköchan ompö wop anka tïkwïl nyo kyowestan nko chane lö, “Ompö ne tömotekwanïkwa kö nyo pö tarakit?” ’

⁸ “Ye nyu imwochinenyi mötworintenyan Daudi lö, kölö ECHOTYON Kimuktoghin, ‘Kyamïtuneninyi wuw pö achey ato kiyokwïyenyi kechir, atelïkuna pöytoghinto piköchan Israel.

⁹ Akyomitan nko nyi ompö wop anka tïkwïl wölo kiwetenyi ayonan punköku, aghinyi ororitunö le pich cho ororöch ompö ngwïny.

¹⁰ Oyörchinan piköchan Israel kor atökïmang chane korengwa atömökïmi pich cho le pkatis cho susöy chane le tagh

¹¹ kïngata otini kyokïlchan chane kirwokï, okonokwa nyu kalya ompö pungkökwa. “ ‘Akïlö ngat ECHOTYON, oghwokwa wölo omöngöy.

¹² Otini kewonyö osiswekwa aruyekwa le papotïnekwa, okïlan akonga ompö monekwa kïlïkwï pöytoghin aghan kughyö paytaghtanyi.

¹³ Tekwanïn nyinte kö ayomisan lö töpo ngacharunyi pö paytagh kokay.

¹⁴ Olïkunan paponyi, kïlïkwï nyinte werïnyan. Ato igh ngokï, omungan le atay mungöy papo montanyi.

¹⁵ Wölo mochenganye chomnyenyan le ato kyachengan Saulö nyo kyanateghan atelïkunanyi pöytoghin.

¹⁶ Ghyongöy kongu nko paytaghtangu kokay akuletöy ngacharu pö paytaghtangu kokay.’ ”

¹⁷ Kïmwochï Natan Daudi ngalechï löwïr pö sïwïyaghnï.

Saghata Daudi nyo pö sörö

¹⁸ Kïwö Daudi Ema nyo mi ECHOTYON* akïlö, “Ochan ngo anta ne konyan nya, we Echotyon TORORÖT ompö kïyï keghwaninyi?

¹⁹ Akwanyï ye iminyi ighwanïn cho echön tya, we Echotyon TORORÖT. Keyomisönyi köromnyö ompö koto mötworintengu ompö pïn nyo tökungwïnöy we ECHOTYON Tororöt.

²⁰ Omwowunyi ne ye kïtïl atoni nya, we Echotyon TORORÖT? Akwanyï inkïtaninyi mötworintengu.

²¹ Keghanyi ngalechï echön ompö ayomistöngu nko machatengu le nyï atökunkïtï mötworintengu.

²² Kïlenyona, ichinyi wow tya, we Echotyon TORORÖT, ompöwölo möminye anka nyo lata nyi amöminye Tororöt anka kïpoto nyi ompö tïkwïn löwïr cho kikelïmacha.

²³ Mömicha puntonï walaka cho lata pipö Israel ompö ngwïny kïmïkul cho kisörunenyi koro Misri atökïlïkwï piköku kegh, atökwororit kaynengu. Kighchinyi chane tïpö töngönchin otini kiyonenyi pich walaka nko tororötinekwa akwompö piköku.

²⁴ Keghanyi Israel kïlïkwï piköku kokay ailïkunyi ECHOTYON Tororötïngwa.

²⁵ “Puntenö ye nyu we ECHOTYON Tororöt, lö ighenyi kïgh nyo kemwaghanyi lö oghchini mötworintengu nko konyi.

²⁶ Kïsölöy kaynatengu kokay lö, ‘ECHOTYON Kimuktoghin kï Tororöt pö Israel,’ akïtöpo kö pö mötworintengu Daudi kokay.

²⁷ Konyorwan nyakanat asaghan soghutyonï, we ECHOTYON Kimuktoghin, Tororöt pö Israel, ompöwölo kengongwaninyi nyo ochï mötworintengu ngalechï, aimwowaninyi lö, ‘Otekunyi kö nyo töpo.’

²⁸ “Ichinyi Tororöt we Echotyon TORORÖT, akï pö man ngaleku akeyomiswaninyi ye kïyï karam.

²⁹ Soyönö ye nyu kö pö mötworintengu atökulet kokay, ompöwölo ato kemwaghanyi, we Echotyon TORORÖT, kusoyöno kokay kö pö mötworintengu.”