2 SAMWEL 3 - PIPÏLIA

¹ Kimito poryot nyo wow ka Saulö nko ka Daudi, wölo kitasa tya owesyo Daudi kïmïnïngit tya nyo pö ka Saulö.

Werpö Daudi

² Chï kï werpö Daudi cho le mut nko akonga cho kikïyichï Epron, Poretye kï Amnon yonyi kï Ainoam nyay pö kanasyanta Yesrel

³ nko Kilyap yonyi kï Apikail nyay kimïl kile koko Napal nyo pö kanasyanta Karmel nko Apsolom yonyi kï Maaka chepö Talmay pöytoghinto Kesyur

⁴ nko Adonicha yonyi kï Akit nko Syepatia yonyi kï Apital

⁵ nko Itream yonyi kï Ekla. Kikïyichï monechete löwïr kanasyanta Epron.

Ketang Apner okumpö Daudi

⁶ Otini kimi lïko Saulö nko lïko Daudi kïporyot, kï kitasa owesyo Apner ompö ka Saulö.

⁷ Kitïng Saulö chemïnïngwö* nyo kikïkuro Rispa chepö Aya. Kïlenchï Isposyet Apner, “Kalïkwï ne techenganyi chemïnïngweto paponyan?”

⁸ Kïnarek Apner ompö ngalechay kamwa Isposyet akïlö, “Inonenyi so lö owïktenan paponyu? Tomitan ye oporchine köromnyö koto papongu Saulö nko werkökwa pipö Yuda nko kongotichi, angarakakwa tömörïntakwa Daudi, anyï ye kelenyi otïngetan lelut akwompö korka?

⁹ Nya kïtïghanïn Tororöt asete atomoghchanye Daudi le ato kiwolwolchï ECHOTYON nyinte lö,

¹⁰ chengo paytagh Saulö, akutö nyinte kïlïkwï pöytoghinto pipö Israel nko Yuda, kïngata Dan nyo mi okumpö löt ntökwit Persyepa nyo mi okumpö tagh.”

¹¹ Kimöwöghökyïnye Isposyet Apner ngölyon anka ompöwölo kiwagh nyinte.

¹² Kuyoktö Apner pich kïpa Epron wölo mi Daudi akïlenchï, “Ngo nyo pöytoy koronï? Ama muma nko ani, atangarakïn kïpka pipö Israel löwïr okuntöngu.”

¹³ Kïlö Daudi, “Karam nyoman, oman muma nko nyi, wölo omökan ighwaninyi kïgh akonga, nyoni kï mïtwaninyi Mikal chepö Saulö, atesïwanïn.”

¹⁴ Kuyoktö Daudi pich wölo mi Isposyet wero Saulö akïlenchï, “Omökan korkenyan Mikal, nyo kyataran roloni pipö Pilisti 100.”

¹⁵ Kïyonta Isposyet pich kumïtuna Mikal wölo mi pontenyi Paltiel wero Lais.

¹⁶ Wölo kïrïp pontenyi löt akïlokotoy ntökwit Paurim. Kïlenchï Apner nyinte, “Mïlena katangu.” Kïmïla chichay.

¹⁷ Kuryam Apner nko poyi Israel akïlenchï, “Kyomökekwa Daudi ompö osis cho kiwer kïlïkwï pöytoghintenkwa.

¹⁸ Agha ye nyu lenyoni, ompöwölo kikuyomis ECHOTYON lö, ‘Osörunan pikachu pö Israel ompö owesyo mötworintenyan Daudi kïngetunö mori pipö Pilisti nko mori pungkökwa löwïr.’ ”

¹⁹ Kingalan Apner nko pipö ara Penchamen tïkwïl, atolapay kïwö Epron wölo mi Daudi akïmwochï ngal löwïr cho kimwa pipö Israel nko pipö ara Penchamen lö mïchini kegh.

²⁰ Otini kingwïn Apner Epron wölo mi Daudi nko pich cho le tömönut odeny, kwighchï Daudi ichon Apner nko pich cho kimi tïkwïl.

²¹ Kïlenchï Apner Daudi, “Owetan onyoryot pipö Israel löwïr atökïpka wölo iminyi we pöytoghin, atökwam mis nko nyi atepaytenanyi nyu le ato kemököy.” Kuyoktö Daudi Apner kïwö ompö kalya.

Kakïpar Apner

²² Kïmïlisyeghö mötwori Daudi poryot nko kintöghoghintengwa Yoap akwipï pöröw cho chang. Akimöminye Apner Epron nko Daudi, ompöwölo kökikuyoktö Daudi nyinte kïwö ompö kalya.

²³ Nyini kitï Yoap nko pikachi pö lïk löwïr, kemwochï lö, “Kengwïn Apner wero Ner wölo mi pöytoghintö akikuyoktö nyinte kïwö ompö kalya.”

²⁴ Kïwö Yoap wölo mi pöytoghintö akïlenchï, “Ne kitö nyï keghanyi, otï kengwïn Apner wölo iminyi aipïstenyi nyinte kïwö?

²⁵ Kengwïn nyinte kïlïsinyi, atökunkïtï tötutköku nko kïgh anka tïkwïl nyo ighenyi.”

²⁶ Nyini kingwïna Yoap wölo mi Daudi, kïyonta pich kïrïp Apner, keyokunö nyinte kö pö pögh nyo pö Sira akimenkïtnye Daudi.

²⁷ Nyini kit Apner Epron, kumït Yoap Apner kamas ompö kukat, le ato kimököy kïngölonöy nko nyinte onkït, kïpar mu ompö atoni kïma, kutak werïngwa Asael.

²⁸ Ato mi lötï kïlïm Daudi kïlö, “Motïngetanye lelut nko paytaghtanyan ompö kisön pö Apner wero Ner.

²⁹ Nya kïlïkwï paraku Yoap nko koto paponyi. Nya kïmito chi kayoni nyo chöko pïrutït anta nyo tïng psenkwet anta nyo wegho sökömit anta nyo kïpöröy anta nyo chopöy kïgh nyo omöy!

³⁰ Ompöwölo kipar Yoap nko werïngwa Apisyay Apner nyo kipar werïngwa Asael ompö poryo Kipyon.”

Kakïtïp Apner

³¹ Kïlenchï Daudi Yoap nko pikachi, “Akarera sïrokökwo alak sarankwachtin ariryö ompö Apner.” Kimi Daudi kïrïpöy santuku mïntïrich.

³² Ketïpchï Apner kanasyanta Epron, kuta Daudi akïrir tya ompö pïrïmpo Apner, kïriryö pich löwïr.

³³ Kïtum pöytoghintö tumï ompö Apner lö, “Ompö ne tökïma Apner le ato kama sölwö?

³⁴ Melö kirötote morichi, melö kirötote kelyechi, kama le chi nyo kapar pkatis.” Kïriryö pich ngat ompö nyinte.

³⁵ Kïpka pich kïsaghsagh Daudi atökwam omisyö, wölo kuwalwal Daudi lö, “Nya kïtïghanïn Tororöt ato aman makatyan anta kïgh anka tïkwïl kïtomö kïröytö asis!”

³⁶ Kïcham pïchay löwïr akïngörekyö, ompöwölo kicham chane kïgh anka tïkwïl nyo kigh pöytoghintö.

³⁷ Kunkïtï nyu pïchay nko pipö Israel asisoni lö, melö ki machata pöytoghin kïpar Apner wero Ner.

³⁸ Kïlenchï Daudi mötworichi, “Monkïtökwanye so lö kama kintöghoghintö nyo wow asete ompö koro Israel?

³⁹ Tomönye onyorwan owesyö lasiny, kïrkegh kochan pöytoghin nyo kikekïl. Kowesöchitu wechï pö Seruya ompö ani nyoman. Nya kwighchï ECHOTYON chane kïrïp kegh nko ghöyityengwa!”