2 SAMWEL 12 - PIPÏLIA

¹ Kïyonta ECHOTYON Natan wölo mi Daudi. Kïwö Natan wölo mi nyinte akïlenchï, “Kimito pich odeny ompö kanasyan, ki monkoryon anka, kï meywon anka.

² Kitïng monkoryonta tïch nko kechir nko ngaror cho chang,

³ wölo kitïng nyay le meywon wawa kech akonga nyo kyal. Kipagh chichay, kiyetï akumpur nko monïngo chichay. Kitöni omisyenyi akighegho kikompenyi akirïwöy kïpesöyichi. Kilata cheptanyi ompö nyinte.

⁴ Kïrutochï ton monkoryontonay, wölo kitagh nyinte kïyengchï tontonay tetanyi anta kechenyi, anta artenyi wölo kïcheng kechanay pö meywontonay akïyengchï tontonay.”

⁵ Kïngwanit nörekyo Daudi lakat ompö chichay akïlenchï Natan, “Owolwolan ompö kaynata ECHOTYON lö, mïchini kïma chichoni kegh lenyoni.

⁶ Akïmïchini kuyokyï chichoni kechenyi kïnyïl angwan, ompöwölo kigh kïgh nyo lata nyoni akimötïngnye kisyonchin.”

⁷ Kïlenchï Natan Daudi, “Nyi chichoni. Kölö ye nyu ECHOTYON Tororöt pö Israel, ‘Kyakïlinyi lïkuna pöytoghinto pipö Israel asöruneninyi mori Saulö.

⁸ Okoninyi paytaghpa echotyontengu nko koru, aghinyi paytena pipö Israel nko Yuda, ato melö kimïchinyi choni, kötötotösunyi walaka.

⁹ Ompö ne tesasanyi ngölyonto ECHOTYON, otï keghchinyi nyinte kïgh nyo gha. Keparanyi Uriya nyay pö pipö Ititi aichenga korketö aighanyi kïpar pipö Amon nyinte.

¹⁰ Möngetonye megha chok kongu kokay, ompöwölo kesasaninyi aicheng koko Uriya kïlïkwï nyengu.’

¹¹ Kïlenyona kölö ECHOTYON, ‘Oghan chi nyo pö kongu kwipunyi ghöyityö, achengan koruku atönön pöröryengu, akurïwotö nko chane pöghet kulïwu asis.

¹² Kighanyi ompö wïngat, wölo oghan pöghet kïsïwïyi pipö Israel.’ ”

¹³ Kïlenchï Daudi Natan, “Koghchan ngokï ECHOTYON.” Kïlenchï Natan Daudi, “Kikïlasta ECHOTYON ngokiku melö imeghenyi.

¹⁴ Keghanyi ECHOTYON kïnarek ompö kïyoni keghanyi, kïlenyona tïghöy monïngoni nyo mötïny.”

¹⁵ Atolapay kïwö Natan katanyi. Kwigh ECHOTYON monïngay kiyichï koko Uriya Daudi kïkasa.

Kama wero Daudi

¹⁶ Kïsagh Daudi Tororöt ompö monïngay akïkïrur, kiwö nangat anka tïkwïl konyi akumelmel kïyech.

¹⁷ Kïpka yetïntino katanyi kïsaghsagh nyinte lö tökïnget, wölo kïtagh kïnget anta omisyö nko chane.

¹⁸ Kïma monïngay ompö asispa mut nko odeny. Kuwagh yetïntinechay kïmwochï Daudi lö, “Kikïma monïngay,” ompöwölo kilö, “Kikïngölonchicha nyinte atay kitökïsöpöy monïngay amöterwechanye, kïmwochini nyu lö ne, lö kima montö? Töptoy muköy ntökïpar kegh.”

¹⁹ Nyini kilïm Daudi kïchomchini kegh yetïntinechi, kïpköchï nyinte lö kikïma monïngay, kïtep yetïntinechi lö, “Kikïma montö so?” Kelenchï nyinte, “Kikïma.”

²⁰ Kïngeta Daudi ngwïny akuwun kegh akïwaghach sïrokachi. Atolapay kïwö kutang Kö pö ECHOTYON akïsagh akïwö kutang konyi akïtep omisyö, ketö nyinte kwam.

²¹ Kïtep yetïntinechi nyinte lö, “Ne kitö nyï keghanyi? Kilokanyi aitagh omisyö ato kisöpöy monïngay, wölo nyini kima montö ingetanyi aiyomisyö.”

²² Kïlö Daudi, “Kyalokan akïruran ato kisöpöy monïngay alan, ‘Nkït ngo töptoy muköy ECHOTYON ntökusyonchanïn akusop montö?’

²³ Wölo kikïma ye nyu, tokïruran nyo pö ne? Amomuköy oyokune nyinte ngat kïsöp. Owetan wölo mi nyinte, wölo mengwïnönye nyinte wölo omitan.”

Kakïyï Solomon

²⁴ Kïsaghsagh Daudi korkenyi Patsyepa akïrï nko nyinte, kïsïch monïng nyo le worö, kïkurö kaynenyi Solomon. Kïcham ECHOTYON monïngay

²⁵ akïmwochï werkoyon Natan kïkurö kaynata monïngoni Yedidiya, ompöwölo kicham ECHOTYON nyinte.

Kanam Daudi kanasyanta Rapa

²⁶ Kïporyeghö Yoap Rapa kanasyanta pipö Amon akïnam kareran.

²⁷ Kïyonta pich kïpa wölo mi Daudi akïlenchï, “Koporyeghan Rapa akanaman koto pögh.

²⁸ Ghamïta nyu pich löwïr, atoporyeghenö kanasyante acheng, tömanaman akurteghö kaynenyan.”

²⁹ Kïghamït Daudi pich löwïr cho kingötï akïpa kïporyeghö Rapa akïnam.

³⁰ Kïcheng Daudi tenta karïn nyo kimi mötïto pöytoghintengwa. Kitenö nïkisyenyi kilen 35 akimito ori koghïn cho pö olyot nyo wow akikitö möt pö Daudi. Kipunö pöröw kanasyantanoni cho chang.

³¹ Akïnam pikö cho kimi kanasyante akutö kwigh ighisyo mïsïmenö akutang kapempoy nko oywöy akwigh mataparen ompö owesyö, kighchï lenyoni tïkwïl kanastina pipö Amon. Atolapay kïmïla Daudi nko pikachi Yerusalem.