2 SAMWEL 11 - PIPÏLIA

¹ Kikany ato kile towunöto köny, ato kisetöy pöytoghï, kïyonta Daudi Yoap nko mötworichi nko lïko Israel kïpa kïpar pipö Amon, akurich kanasyanta Rapa. Wölo kimpur Daudi Yerusalem.

² Kïngeta Daudi kö nyo kimungo ato kile mönon akïwesteghö konyi wölo le parak, kïsïwa korka nyo pïchigh nyo kiwunöy kegh.

³ Kïtep Daudi lö, “Ki Ngo kokononi?” Kïlö chi, “Patsyepa nyoni chepö Eliyam koko Uriya nyay pö pipö Ititi.”

⁴ Kïyonta Daudi pich kïpa kumïtï wölo mi nyinte, kïrï tïkwïl. (Kökikuwonyö osiswo kokonini cho kitöpo yona.) Atolapay kïmïla kokonay konyi.

⁵ Tomönye kite kïsöwï kokonay lö kyosïkisyö, kïmwatïta kemwochï Daudi.

⁶ Kuyoktö Daudi chi wölo kimi Yoap akïlenchï, “Yonunö Uriya nyay pö pipö Ititi kungwïn wölo omitan.” Kïyonta Yoap Uriya wölo mi Daudi.

⁷ Otini kit Uriya, kïtep Daudi pöghisyö nyo pö Yoap nko nyo pö pich nko wölo kilata poryot.

⁸ Kïlenchï Daudi Uriya, “Wïyö tanga katangu aimungchï kegh.” Kïweghö Uriya kö pö pöytoghin, kuyoktö pöytoghintö chi kwipchï nyinte omisyö.

⁹ Wölo kïrï Uriya wölo kiruyot mötwori echotyontenyi ompö kuka pöytoghin amöwönye kutang katanyi.

¹⁰ Kemwochï Daudi lö, “Möwönye Uriya katanyi.” Kïtep Daudi Uriya lö, “Olentan kengwïnenyi rutogh? Ompö ne tömewenyi katangu?”

¹¹ Kïlenchï Uriya Daudi, “Mi pipö Israel nko Yuda kïporyot akïmito nko Santuku Muma.* Kïmito echotyontenyan Yoap nko mötwori echotyontenyan pöytoghin kïmöngöy wölnö mi poryot, owetan nyu lö ne katanyan omisïyi agheghsyö arï nko korkenyu? Momukanye ntagh kïgh nyo lata nyoni kokay.”

¹² Kïlenchï Daudi Uriya, “Töpenö wölete asete atewïyö asïyech.” Kïtöpö Uriya Yerusalem asisoni.

¹³ Kïtak Daudi nyinte asisto odeny kwomisyö tïkwïl akïgheghsyö nko nyinte, kïkany kïtamas nyinte tya, ato mi mönon kïwö kïrï ngat wölo mi mötwori echotyontenyi, mökïwönye katanyi.

¹⁴ Kukirchï Daudi palalyan Yoap tökwoghö akutö Uriya kwip.

¹⁵ Kukir ompö palalyantanay lö, “Tönö Uriya tagh wölo ngwan poryot, amïlisyö löt cho le akwa atökepar nyinte.”

¹⁶ Otini kimi Yoap nko pikachi kuriköy kanasyan, kutö Uriya wölo kinkït lö kimi pung cho le nyökon.

¹⁷ Kïpka sany pipö kanasyan akïporyö nko chane, kepar mötwori Daudi walaka, akepar Uriya tïkwïl.

¹⁸ Kïyonta Yoap chi wölo mi Daudi kïmwochï nyinte paraku poryot

¹⁹ akïlenchï nyinte, “Ato kemwochinyi pöytoghin ngalechï pö poryot lapay,

²⁰ töptoy nöreköy pöytoghintö akïlenchinyi, ‘Ompö ne tarikakwa kanasyan tya otini koporyokwa? Kömonkïtökwanye so lö muköy chane kïwutokwa ompö nayat?

²¹ Mononekwanye lö kikïpar lö ne Apimelek wero Kidyon? Kipar korka nyinte ompö Tepes nyo kichïnuna koghpa pagh nayat kïwir nyinte kïma. Ompö ne nyu tarikakwa nayat?’ Ilenchï nyinte, ‘Kakïpar tïkwïl mötworintengu Uriya chichay pö Ititi.’ ”

²² Kïwö chichay akïmwochï Daudi ngalechay löwïr cho kömwochï Yoap.

²³ Kïlenchï chichay Daudi, “Kisïch nyakanat pungköcha, akïpka sany kïporyeghenecha, wölo keyonacha chane ntökwit kuka kanasyan.

²⁴ Kiwutecha chane ompö nayat, kepar yetïntineku, kepar mötworintengu tïkwïl Uriya chichay pö Ititi.”

²⁵ Kïlenchï Daudi chichay, “Ichïchim Yoap ailenchï, ‘Mesus kegh ompö ngölyontonï, ompöwölo menkïtunye chi lö ngo nyo meghöy ompö poryot, kilö kegh ainoghyö ntenam kanasyante.’ ”

²⁶ Otini kilïm koko Uriya lö kikïpar pontenyi, kïrir akwompö nyinte.

²⁷ Nyini kiwonyö osiswo rirat, kuyoktö Daudi chi kumïtï Patsyepa kungwïn katanyi kïlïkwï korkenyi, kïyichï nyinte worö. Wölo melö kicham ECHOTYON kïgh nyo kigh Daudi.