2 SAMWEL 10 - PIPÏLIA

¹ Tomönye kite kïma Naas pöytoghinto pipö Amon, kïlïkwï werïnyi Anun pöytoghin.

² Kïlö Daudi, “Oghchinan nyo karam Anun wero Naas, le wölo kighwanïn paponyi.” Kïlenyona kïyonta Daudi mötworichi kïpa kïsaghsagh nyinte ompö megheto kwanta. Kïpa nyu chane kutang koro pipö Amon,

³ wölo kïlenchï yetïntino pipö Amon pöytoghintengwa Anun, “Inonenyi so lö köyonï Daudi mötworichi kïsaghsaghinyi ompöwölo kikonyïtöy papongu? Ewo! Köyonï pïchï kïpka kïghot kanasyan, atökïwaghach.”

⁴ Kïnam Anun mötworichay pö Daudi akïrwak tamughayikwa kareran mut sïrokökwa kïngata löpisöy kwapta atolapay kïyon.

⁵ Kïnyorï chane arasï tya, nyini kilïm Daudi kïmwatïta kelenchï chane, “Ompurö Yeriko ntökïtenö kïpit tamughayikwa ngat.”

⁶ Otini kipköchï pipö Amon lö kilïkwï Daudi punyontengwa, kïsom cho pö Pet Reop nko pipö Sirya cho pö Sopa pipö lïk cho le 20,000, kïsom pöytoghinto Maaka cho le 1,000, kïsom pipö Top cho le 12,000.

⁷ Nyini kilïm Daudi choni, kïyonta Yoap nko pipö lïk löwïr nko cho le nyökon.

⁸ Kïpka pipö Amon atökïporyö ompö kuka kanasyan nko pipö Sirya cho pö Sopa nko cho pö Reop, kïmi pipö Top nko cho pö Maaka wölo le tömkö.

⁹ Otini kisïwa Yoap lö kimi poryot nyinte tagh nko löt, kïcheng pipö Israel cho le nyökon akutö okumpö pipö Sirya.

¹⁰ Kutö werïngwa Apisyay kuntöghoghchï pikö cho kingötï atökïporyeghö pipö Amon.

¹¹ Kïlenchï Yoap werïngwa, “Ato isïwenyi lö karich kïrïntanïn pipö Sirya ingwïn ingarakanïn, kïnyïl ato asïwan lö karich kïrïntinyi pipö Amon angwïnan angarakinyi.

¹² Inyakanitï nyoman akeporyö ompö piköcho nko kanastina Tororötïnyo. Nya kwigh ECHOTYON kïgh nyo sïwïyi nyinte lö karam.”

¹³ Kïrich nyu Yoap nko pich cho kimi nko nyinte pipö Sirya atökïporyö nko chane, wölo kïryagh pipö Sirya.

¹⁴ Nyini kisïwa pipö Amon lö kiryagh pipö Sirya, kïryagh chane tïkwïl ompö wölo kimi Apisyay akïlïtöy kanasyan. Kïmïla nyu Yoap kutöngwï Yerusalem ompö wölay kiporyegho pipö Amon.

¹⁵ Nyini kisïwa pipö Sirya lö kikïrïnta pipö Israel chane, kutuyö kegh.

¹⁶ Kuyoktö pöytoghin Adadeser kekurï pipö Sirya cho kimi kongasispa lalwa Yuparet, kïpka kutöngwï Elam nko Syopach yetïn pö lïko Adadeser nyo kintöghoghchini chane.

¹⁷ Nyini kikïmwochï Daudi, kutuyö pipö Israel akwoghyö Yordan kïwö Elam. Kïtat kegh pipö Sirya atökïporyö nko pipö Israel.

¹⁸ Kïryagh pipö Sirya, kïpar Daudi nko pikachi pipö Sirya cho kikötöy nkaritin 700 nko pipö angoletin cho le 40,000 akïpörchï Syopach nyo kile yetïn pö lïk atoni.

¹⁹ Otini kisïwa pöytoghï walaka cho kimi ngwïnyi mötwori Adadeser lö kikïrïnta Daudi chane, kwam mis nko pipö Israel akïpöghisyechï chane. Kuwagh nyu pipö Sirya kungarak pipö Amon ngat.