2 KORINTO 9 - PIPÏLIA

Kingarakat nyo kitöni pipö Kristo*

¹ Möminye machata atasan akirwakwa ompö ighisyononi pö kingarakat oghchinekwa pipö Tororöt.

² Onkïtön lö otïngetekwa machat, akyokwolan kegh tawu pipö Makedonia ompö akwa ompö ngölyontononi. Kyomwochan chane lö, “Kïmi tupchenicho cho pö Akaya kïpsach kungörokisyö könyinay kewer.” Kenget nyu pich cho chang tya ompö chane kikilötenkwa.

³ Nka nyoni koyonwan ye werköcho chete atömöwaghaka kwolötencha nyo kïkwolocha kegh akwa kïlïkwï kwïle, otïpï nyu kïpsach nko kingarakatengwo le nyanye kyomwowokwa.

⁴ Tömötöp ato angwïnan nko pipö Makedonia kelö momitekwanye kïpsach, kïnyorunecha nyu atoni arasï, ompöwölo kïtighecha kegh akwa tya!

⁵ Nka nyoni kasïwan lö mötïnye oyonwan werköcho chete kïnya kïrutowokwa kïtomö angwïnan atökïpka kïror ropöwontenkwa nyanya kyoyomisukwa atökïrorwanïn ropöwontononi atokïrumï lö kyokonukwa akwane ompö machatengwo amelö ompöwölo kakichikyokwa.

⁶ Anana lö, chi anka tïkwïl nyo kötkötöy kösïgh cho ngörï, kïkösöy cho ngörï kïkany nyo kötkötöy cho chang kïkösöy cho chang.

⁷ Akanya nyu kutötö chi anka tïkwïl kïrïp kegh nko machatenyi melö ompö chopat anta ompö kichikyin, ompöwölo chömöy Tororöt chi nyo tötoy kïgh ompö ngörekyö.

⁸ Akumuköy Tororöt kïkonokwa tïkwïn cho chang kïtïl cho komökekwa atamuka otïngetenö kïnomnyö kïgh anka tïkwïl, atatasa tagh angaraka ighisyö anka tïkwïl nyo karam.

⁹ Kïle wölo mwoytoy Kikirut lö, “Töni nyinte chopot ompö chongïn töpo köromnyenyi kokay.”

¹⁰ Konokwa nyu lenyoni tïkwïl Tororöt kösïgh cho omökekwa, Tororöt nyo töni ngorinto par kösïgh nko makatin cho pö omisyö akwigh choni löwïr kïpit akïkonï ilö nyo wow nyo opöghokwa pich.

¹¹ Ighokwa nyinte alïkuna sïkön ompö kïgh anka tïkwïl atamuka atasa tagh osïkö tïkwïn cho opögho pich kïnomnyö, atökumï chane kïsal Tororöt ompö ropöwekwa cho chang cho sïkenokwa chane.

¹² Ompöwölo, melö ngöroköy ighisyenkwa nyoni karam pich cho kakughan Tororöt opïn, wölo ighöy pich cho chang tïkwïl kïsal Tororöt.

¹³ Akwompöwölo rumunote kikïniniot nyo pö ighisyenkwa, kïchongitu nyu pich cho sölöy Tororöt ompö kighanatenkwa nyo otïngetekwa ompö Lökoyo Kristo cho Karamach nko tïkwïl ompö tïkwïn cho otöninekwa chane nko pikö walaka.

¹⁴ Kïlenyona nyu, soghwokwa chane ompö lïmchin nyo mi mïkulöwekwa ori, ompöwölo kikonokwa Tororöt pöropchö nyo sis.

¹⁵ Keyokyinö nyu Tororöt sörö ompö ropöwontenyi nyo mötïngnye söröm!