2 KORINTO 3 - PIPÏLIA

Mötwori muma* nyo rel

¹ Kökitoröcha so ngat kekwol kegh achane? Kïmökecha so palalatina kipartagh cho porwecha akwa, anta palaltin cho pkono wölo omitekwa le pikö walaka?

² Ochikwa akwane palalyantencha, palalyan nyo kikekirchï mïkulöwecha tökusomön chi anka tïkwïl ato sïwa.

³ Rumunote nyoni lö ochikwa palalyanta Kristo* nyo kikir nyinte akïkonecha ketötenö. Melö kikikira winö palalyantanoni, wölo kikikira Mïkulöwu Tororöt nyo satate amelö kikikirchï paraku keronytina, wölo kikikirchï paraku mïkulis pö pich.

⁴ Kimukecha kemwoghe lenyoni ompöwölo kïtighocha kegh Tororöt ompö ara Kristo.

⁵ Amelö kimukecha ketigho kegh owesyenyo achane, wölo ngwïno owesyencha kïmïkul wölo mi Tororöt,

⁶ ompöwölo nyinte nyo kighecha kemuka kepöghisyechinö muma nyo rel, muma nyo melö pö kirurut cho kikikir, wölo nyo pö Mïkulögh. Ompöwölo ipu meghat kirurut cho kirote, wölo ipu Mïkulögh söpon.

⁷ Kikïkonï kirurut akekir paraku keronytin, wölo ato mi löt kwipï meghat. Ki wow ororyeto kirurutchoni nyoman nyo kimelö kitökumuk pipö Israel ntökïtopön tokochu Musa lötok akwompö kwerkwerïn pö ororyononi kimi kulingotoy pat. Kïkany nyu ato kikonï ighisyo kïyoni kikonï meghat ororyö nyo wow lenyoni,

⁸ kïtïng nyu ighisyo Mïkulögh ororyö nyo wow tya!

⁹ Kïkany nyu ato kitïng ororyö ighisyo nyo kipï kirwok, kïrumu nyu lö tïng ororyö nyo wow tya ighisyo nyo konecha sörunöt!

¹⁰ Kengwïn ye nyu ororye anka nyo wow tya kïköchï ororyö nyo kungwïn akikïwechï kegh.

¹¹ Ompöwölo ato kitïng kïgh ororyenyi nyo kimi kulingotoy pat, kïtïng ororyö nyo wow tya nyo mötïny, kïgh nyo ngötu kokay.

¹² Kïngölonecha ompö nyakanat nyo wow ompöwölo kïtïngetecha kikönöt nyo lata nyoni.

¹³ Melö kighecha le Musa nyo kimötïnye kuyenö tokochunyi ananka atömasïwa pipö Israel kikwerkwerchin nyo kimi kulingotoy.

¹⁴ Wölo kiwöngisyö kinonutkökwa, ompöwölo otini kisomönöy muma nyo pö köny, kïtökïmi anankanoni körtoy mötöwekwa. Ompöwölo melö kïngwïsöy anankanoni kïpoto ato tuyö chi nko Kristo.

¹⁵ Kïrkegh ompö nyete le ye, kïtökuyenote kinonutkökwa kïnomnyö otini kisomönöy Kirurut pö Musa.

¹⁶ Wölo kïngwïstoy anankanoni ato waghaka chi wölo mi Echotyon.

¹⁷ “Echotyon,” ye nyu ompö yete kï Mïkulögh, akï wop anka tïkwïl wölo mi Mïkulöwu Echotyon, kïmi kityakata.

¹⁸ Kïlenyona nyu, kiportocha löwïr cho tomöcha keyenö tokochwecho ororyo Echotyon le ato kïsïwïyegho kiyo, wöghökecha nyu ororyononi ngwïno wölo mi Echotyon (Nyoni kï Mïkulögh) kekara kegh nko nyinte lasiny, ompö ororyö nyo wow tya.