2 KORINTO 12 - PIPÏLIA

¹ Okwolan nyu kegh, kïrkegh kömelö kömïchini! Wölo ongölonan ye ompö paraku sïwïyagh nko ngongut cho kiporwanïn Echotyon.

² Onkïtön chi akonga nyo pö Kristo* nyo kikimït könyis taman nko angwan cho kakuwer kïwö ntökwit yïm nyo pö sömök. (Melö onkïtön lö ekighisyö ngalechoni nyoman nya anta ki sïwïyagh. Tororöt nyo nkït.)

³ Oyokyinan kegh ngat amwagh lö, onkïtön lö kikimït chichoni ntökwit ngwen. (Wölo melö onkïtön lö ekighisyö ngalechoni nyoman nya anta ki sïwïyagh. Tororöt nyo nkït.)

⁴ Kïlïma nyinte wöloni ngal cho wïngote cho kimelö kimïchini kïngalana ptangengmöt kutinyi.

⁵ Okwolonan nyu kegh chi nyo lata nyoni amelö ompö ante kegh, kïpoto pat ompö nyörkölelyenyan.

⁶ Ntökile nyo kyomökan okwolöy kegh, kitömolïkunanye sölwö nyonikïny, ompöwölo kötomwoghan ngala man. Wölo momökanye okwolöy kegh, ompöwölo momökanye chi anka tïkwïl kutöroranïn tya kïtïl wölini sïwïyi nyinte wölo alatan nko ompö ngal cho lïmenanïn nyinte.

⁷ Wölo kikïkonanïn kichïrpa por nyo lata kata atömotöp ntökwighanïn ngalechoni echön kikïngongwanïn atamas. Pöghisïyi kichïrnoni le kïgh nyo köyonï Onyötö kïmunganïn atökïpïranïn atömotörorön kegh tya.

⁸ Kyasaghan Echotyon kïnyïl sömök ompö ngölyontononi lö töchengenanïn,

⁹ wölo kïlenchanïn, “Mïchininyi pöropchenyan onkït ompöwölo itïtoy lasiny owesyenyan ompö nyörkölelyö.” Ochan nyu ngarakate tya okwolan kegh nyörkölelyenyu atökïtöpö owesyo Kristo parakunyan.

¹⁰ Kïlenyona, ochömonan kegh nyörkölelut nko chïput nko nyörilwok nko kinyarilata kong nko kiwongunöt ompö Kristo, ompöwölo otini ochan nyarkalal, kï atoni ato ochan awes.

Kesus Paulö pipö Korinto

¹¹ Kalïkwan so sölwö? Wölo akwa choni kochikwanïn, kötömïchinokwa ompö asalanïn. Ompöwölo, kïrkegh kömelö ochan kïgh, wölo melö ochan apteghate tya kïtïl choni okuronekwa, “kiyoktoghï cho echön.”

¹² Kighisyeghö möcheyut nko töngönchintin kwenunkwa ompö mïkukönöt nyo wow nyo kïniniot nyoman lö ochan kiyoktoghin.*

¹³ Ne nyo kimonyorukwanye kïtïl kaniseni walaka nya kïpoto wölo kimokonokwanye nïkisïn nyo pö kingarakat nyo kitokonunekwa? Olöstewante, ompöwölo kyomulokwa mantanoni!

¹⁴ Omitan ye nyu kïpsach orutowokwa akï pantanyan nyete nyo pö sömök amelö osusokwa. Ompöwölo akwa cho omöran melö tïkukwa. Ompöwölo melö mïchini kïyörchï monïngö yïyikwa kaplawachtin, poto yïyi monïng cho yörchini monekwa.

¹⁵ Omitan kïpsach nyoman opöghisyeghö tïkuchan löwïr akokonwan kegh nyoman ompö tösunöto mïkulöwekwa atamukan angarakakwa. Ochömanïkwa so kite ompöwölo kachamakwa lasiny?

¹⁶ Ochömekwa ye nyu lö melö kyatungenakwa nïkisyö. Wölo manan mwoghöy chitö anka lö, “Ketönekwa Paulö ngöghöp ompöwölo chïrer.”

¹⁷ Ekwoyï ato kyopenokwa kïgh nya ompö chi anka tïkwïl ompö pïchanye kyoyonwokwa?

¹⁸ Kyasaghan Tito kungwïnchokwa nko tupchenyo anka. Kingwïn so Tito kïmas tïkukwa? Monkïtökwanye so lö kintöghoghwecha Mïkulöwunoni akerïpecha or akonga?

¹⁹ Töptoy olentekwa kïmitecha keghetöy kegh nko nyete le ye ompö tawunkwa! Wölo kïmwoghocha ngalechoni tawu Tororöt otini kakeghömecha nko Kristo akï kïgh anka tïkwïl nyo kighecha chamankachu, keghecha atökungarakakwa.

²⁰ Owöghan lö töptoy ato atwan wöloni otomwan kyasisitukwa atïpï otöp nyo melö komökan, kwighanïn nyu nyoni asisitwan nko wölo komöktokwa. Owöghan lö töptoy otomunan omitekwa nko syala nko nyonyintön nko nörekyö nko nyïtat nko söngeryö nko chïput nko semsem nko kwolöto kegh nko kiwulyot.

²¹ Owöghan lö töptoy ato atwan rutoghtö nyo rïptoy, kwighanïn Tororötïnyu osïkan arasï tawunkwa. Orirchan nyu pich cho chang cho kökikwigh ngokï atole tagh, wölo kitomöcha kïkötö sïmnyontöno tïkwïn cho kigh chane amelö kikïrö kegh chane alomi nko ngoki cheporesnan cho kigh.