2 KORINTO 11 - PIPÏLIA

¹ Wechï komökan lö tomïkukönökwa nko ani kite kïrkegh kochan sölwö. Kaykay omïkukönwante kite!

² Omchinokwa nyonyintön, le wölo lata Tororöt tïkwïl, ompöwölo alatekwa chepkïltït nyo kakelotokönchï mïrönö akong onkït, nyoni kï Kristo.*

³ Wölo owöghan lö, le wölo kilïsta moroya Awa ompö ngöghomnyo putintönenyi, kumuköy kunyar kinonutkökwa ntopïstekwa kighanatengwo nyo pö man ompö Kristo.

⁴ Ato ongörökyikwa chi kïtïkon nyo kengwïn kwomwokwa Yeso anka nyo sis melö nyï kyomtocha anta atakakwa mïkulögh nyo sis melö nyay kyatakakwa anta atakakwa lökoy walaka cho melö kyatakakwa!

⁵ Molenchï kegh ochan mïnïng tya kïtïl pïchoni lentöy kïchï, “Kiyoktoghï cho echön.”

⁶ Töptoy mochanye ngölonin, wölo otïngetan kinkïtöt. Kakiporucha akwa ngölyontononi lasiny ompö wop anka tïkwïl kïnomyö.

⁷ Melö kyaghachan kïgh atanye kyomwokwa Lökoyo Tororöt cho Karamach, kyopön kegh ngwïny atamukan osyolokwa parak. Kyalelan so?

⁸ Kipaghanïn kanisen walaka atanye kyopöghisyewokwa lata nyoni ato kyasaran kanisenichoni tïkukwa atömanyïn angarakakwa.

⁹ Kïkany atanye kyomitan nko akwa, kïmelö kyosusenokwa kingarakata ropïyen. Kipkanïn werköcho cho kipkono Makedonia kïgh anka tïkwïl nyo kyomökan. Kyoripön kegh lasiny atömokonokwa nïkisïn anka tïkwïl akïtomitan oghöy lenyoni.

¹⁰ Kïle ato mi manpa Kristo orinyan, kïmöminye chi nyo muköy kïköranïn tömangalanan wop anka tïkwïl ompö koro Akaya kïmïkul.

¹¹ Ekwompö ne köny tomwoghan lenyoni? Kamwaghan so lenyoni ompöwölo mochömokwanye? Nkït Tororöt lö ochömokwa.

¹² Oletan tagh oghöy le nyete oghan ye atömotönön pöroyïn pich cho yöröy pöroyïn nyo kwolöy kegh lö pöghisïyi chane le acha.

¹³ Ompöwölo chane kï kiyoktoghi putintön. Ighöy kegh chane lö kïchï kiyoktoghi Kristo.

¹⁴ Amelö töngönchin ompöwölo ighöy kegh nyinte Onyötö kïlïku malaykayanta löpoyïn!

¹⁵ Kïlenyona nyu, molenchï kegh kïgh nyo pö töngönchin ato wöghökisyö mötworichi kïlïkwï mötwori man. Nyoru chane ato le söröm kïgh nyo mïchini, kïrïp kegh nko ighisyewutkökwa.

Kiwongunöto Paulö le kiyoktoghin*

¹⁶ Omwoghan ngat lö tömötöp chi ntökunan lö ochan sölwö. Wölo ato ananakwa lenyoni atachanïkwa kïnye le sölwö pat atosïkön kïgh nyo mïnïng nyo okwolo kegh.

¹⁷ Omwoghan ye nyu ngölyon nyo melö kötömököy Echotyon omwoghan. Nyoni kï ngölyontonï pö kwolöto kegh, kamwaghan pat le chi nyo le sölwö.

¹⁸ Wölo ompöwölo mi pich cho chang cho kwolöy kegh ompö ara por, okwolan kegh tïkwïl lenyoni.

¹⁹ Ochikwa akwane ngöghomöch nka nyoni omitekwa omïkukönchini sölwöy ompö ngörekyö!

²⁰ Omïkukönchinekwa chi nyo ighokwa olïkune sekey anta masenakwa nyinte tïkukwo anta tönokwa ngöghöp anta tönokwa arasï anta cho röpochokwa tokoch.

²¹ Ochöman ante ompö arasï lö kikïchicha nyörkölölech! Wölo ato mi chi anka tïkwïl nyo mukyini lö tokwolö kegh kïgh ongölonan le sölwö omukyinan ante tïkwïl.

²² Pipö Eprania so chane? Ochan tïkwïl. Pipö Israel so chane? Ochan tïkwïl. Pipö ara Apraam so chane? Ochan tïkwïl.

²³ Mötwori Kristo so chane? Ochan tïkwïl, angölonan lenyoni le chepoyï, lö ochan mötworinto Kristo kïtïl chane! Kaghan ighisyö nyo aghïgh tya, kikïtorchanïn chela kïnyïl cho chang tya akemungenanïn syaritin kïnyïl cho chang tya. Kyachïwïtan meghat kïnyïl cho chang.

²⁴ Kimungenanïn pipö Yaudi syaritin 39 kïnyïl mut.

²⁵ Kikïmungenanïn lïkip kïnyïl sömök, kewirenanïn koghïn kïnyïl akonga, kunyarenanïn meli ompö nanam kïnyïl sömök, atöpan wöloni nangat kïyech nko pöghetunyi kwimön.

²⁶ Kyomitan tapan kïnomnyö nyo pö puser pö lalwatïn nko tapanpa chelölos nko nyo pö piköchan pipö Yaudi nko nyo pö pipö punton. Kyosïkan tapan kanastin nko wölo le surkwen nko wölo le nanam, anyorunö tapan kongot cho le putï!

²⁷ Kyopöghisyan awongwï kïnyïl cho chang. Kyowestan akimonyorwanye rïwön kïnyïl cho chang. Kyamanïn kömöy nko maral, akïruran kïnyïl cho chang, ampur wölo kaghït amotïng sïra.

²⁸ Amelö ki ngalechoni pö sany opïn, kyasïngan ighisyewut pö kanisen löwïr kïtenö osis.

²⁹ Ato nyarkalal chitö anka, ochan nyarkalal tïkwïl. Ato kïlelchï chitö anka, owongunan ante tïkwïl.

³⁰ Ato muko okwolön kegh, okwolonan kegh nyörkölelyenyu.

³¹ Nya kusoyönö kaynata Tororöt kokay nyo le Papo pö Echotyon Yeso. Nkït nyinte lö momïranye put.

³² Kyomitan Damaska akimi chi nyo kiripöy kanasyantanoni nyo kile pröyönto Areta wowïnto korononi. Kitö wowïnoni chichoni kïrip kanasyantanoni atökïnamanïn.

³³ Wölo kereytanïn ompö köröp akelutanïn sany ompö pïntö nyo kimi nayat achïwïtan nyu morichi.