1 TIMOTEO 4 - PIPÏLIA

Koneti putintön

¹ Mwoghöy Mïkulögh nyoman lö pïstoy pikö walaka kighanatengwa osis cho pkonöy, akï terchï mïkulïs cho le lïsï akïrïp kinetut pö oy.

² Kinetut cho lata choni chay ipsötoy pich cho le lïsï, cho kimeytoy choghïntinekwa kïlentöy chi kikïpela karïn nyo nöghöy lakat.

³ Netöy pïchoni lö, merokonye kekensyö amerokonye kyam omisyewut walaka. Kigh Tororöt omisyewutchoni kwam pich cho kikughan kunkïtï man otini kakumuchö kuyokyï nyinte sörö.

⁴ Karam kïgh anka tïkwïl nyo kigh Tororöt, möminye kïgh nyonikïny nyo kïtöghöy. Kïlenyona mïchini ketach kïgh anka tïkwïl akesagh keyokyï Tororöt sörö,

⁵ ompöwölo ighöy ngölyonto Tororöt nko saghat tïkuchoni kïlïkwï cho chömunote ompö tawu Tororöt.

Mötworinto Kristo* Yeso nyo karam

⁶ Ato inetanyi tupchenicho kinetutchï, ilïkunenyi mötworinto Kristo Yeso nyo karam, otini ipöghonyi kegh ngala kighanat nko kinetut pö man cho irïpenyi.

⁷ Kïrenö kegh ngal cho mönömöcha kegh nko ara Tororöt nko cho pö sölwontön. Kilö kegh aimöngisyö ompö kiwaghata Tororöt.

⁸ Tïngeto kikilöto por kinyiwutyenyi, wölo tïng kikilöto mïkulögh kinyiwut nyo wow tya ompö or anka tïkwïl, ompöwölo tïng kiyomisöto söpon nyo pö ye nko söpon nyo tökungwïnöy.

⁹ Pö man ngölyontonï akïmïchini kecham nyoman.

¹⁰ Kinoghyonecha ompö pöghisyö anka tïkwïl nyoman ompöwölo kiketönöcha kikönötenyo wölo mi Tororöt nyo söpöy akï nyo le Ghetinto pich lapay, kï mïr tya pich cho kikughan.

¹¹ Mwochinö chane ngalechï ainet kinetutchï.

¹² Mekany kïsasïn chi ompöwölo techinyi chumwak, wölo ilïkwï körkeyïn nyo karam ompö pich cho kikughan ompö ngalanatengu nko otöptöngu nko chomnyogh nko kighanat nko möngot nyo pö tïlilyö.

¹³ Inoghyö nyoman isomönchï aiyomchï ainet pich Kikirut ntökïtenö atwan.

¹⁴ Mepïstö pöghisyeghenö ropöwontengu nyo kinyorunyi atanya kingalan werkoy akukanaghinyi poyi kanisa morïn.

¹⁵ Kilchinö kegh ngalechï lasiny airötï kegh nyoman atökumï pich kïsïwa kiletatengu.

¹⁶ Irip kegh airip kinetatengu ailet tagh igh tïkuchoni. Ompöwölo ato ighanyi lenyoni, isörunenyi kegh nko pich cho lïmöy ngaleku.