1 TIMOTEO 3 - PIPÏLIA

¹ Pö man mwaghatanï lentöy: Ato pïrchini chi kïlïkwï kintöghoghinto kanisa, kï kamak pöghisyö nyo pïchigh nyoman.

² Mömïchininye kïntöghoghinto kanisa kïsïch kaynat nyo gha nyonikïny. Mïchini kwip korka akonga kïpoto akï chi nyo ripöy kegh, chi nyo röröy ngal lasiny akï tïng konyït nko otöp nyo karam, chi nyo toköy to akï nyo muköy kunetisïyi,

³ chi nyo melö ptamasyan anta poryeghin wölo nyo talase akï chi pö kalya, chi nyo melö chömo kegh ropïyen.

⁴ Mïchini tïkwïl kïlïkwï chi nyo muköy kïpayta katanyi akunet monechi terchini nko konyït ompö ngal lapay.

⁵ Ompöwölo ato memukönye chi ntökïpayta katanyi kegh, muköy lö ne kïpöytoy kanisa Tororöt?

⁶ Mömïchininye kïlïkwï kintöghoghin chi nyo lekït ato keghan Kristo,* ompöwölo tomönye kïkil ompö ara kighanat atömep kegh yïm akïnyorï kirwok le wölo kikirwokyï Onyöt.

⁷ Mïchini kïlïkwï nyinte chi nyo tïng konyït ompö tawu pich cho melö pipö kanisa, atömönyorï arasï akupïtyï ngöghöpo Onyöt.

Kingörokï ompö kanisa

⁸ Mïchini pich cho ngöroköy kanisa tïkwïl kïlïkwï pich cho kikonï kegh lasiny akï cho mösököy ngölyep, pich cho kighönöy. Mömïchinicha kïlïkwï pich cho tömesyot anta cho sururchini ropïyen.

⁹ Mïchini kïkaman chane ngölyontonï pö kighanat kikengongchï chane ompö choghïn nyo karam.

¹⁰ Mïchini ketyam chane nyo tagh, ato rumï lö muköy, kepïsï kwigh pöghisyononi.

¹¹ Mïchini tïkwïl kingöroki cho le kor kïkonï kegh lasiny akïlïkwï cho ghönote akïtïng otöp nyo karam amelö kiswomï.

¹² Mïchini kingörokinto kanisa nyo le mïrön kwip korka akonga kïpoto, akïlïkwï chi nyo muköy kïpayta monechi nko katanyi kuten,

¹³ ompöwölo sïköy kaynat nyo karam kingöroki kanisa cho ighöy pöghisyengwa kuten akumuköy kwomtoy ompö nyakanat ngaleko kighanatengwa nyo tïng ompö Kristo Yeso.

Wïngat nyo wow

¹⁴ Okönan lö orutoghunan wöloni atolekït wölo kakirwakwa kinetutchete,

¹⁵ nyo ato mangwïnanye lawel, kïtenö kïnye kyonkïtukwa wölo mïchini kïtöptö chi anka tïkwïl ompö kwenu pipö Tororöt, nyo le kanisa Tororöt nyo satate akï pchörï nyo tighöy man.

¹⁶ Kimukecha kemwagha lö wow nyoman wïngata nyo pö kighanatenyo nyo kighönöy Tororöt lö, Kurumï nyinte ompö por pö ptangengmöt, keporï Mïkulögh lö pö man, kisïwa malayken nyinte. Kyamta ngalechi kïghomï pipö koros, kughan nyinte pipö ngwïny, akesït kïwö yïm parak ompö ororyö.