1 TIMOTEO 1 - PIPÏLIA

¹ Kakirwan ante Paulö kiyoktoghinto* Kristo* Yeso kïle wölini kimakta Tororöt Ghetintenyo nko Kristo Yeso nyo le kikönötenyo.

² Ompö Timoteo werïnyan nyoman ompö ara kighanat: Nya kïkoninyi Papo Tororöt nko Kristo Yeso Echotyontenyo, pöropchö nko kisyonöt nko kalya.

Keripö kegh kinetut pö putintön

³ Omökan töponenyi Epeso le wölanye kyosomtinyi, atanya kyowetan otöngöy Makedonia, ate taghena pich walaka cho mi wöloni menet kinetut pö putintön.

⁴ Mwochinö chane kuchal ngalechay pö tyankoy nko kinanat nyo pö kukötin cho chang cho kikuwer cho ipu kimölöto kegh amengörokönye pich ngalechoni kenagh tötut pö Tororöt cho kinkïtu ompö ara kighanat.

⁵ Keröte tamwaghan ngalechete, kï tökumuka angetnget ompö orinkwa chomnyogh nyo ngwïno mïkulögh nyo puryö lelut nko choghïn nyo karam nko kighanat nyo pö man.

⁶ Mi pikö walaka cho kikïpïstö kiyomisutchoni akïpechï kïrïp kikorön cho motïngcha tösunöt.

⁷ Möchöy chane kïlïku koneti Kirurut pö Tororöt, wölo möpköchinicha tïkuchini mwoghöy anta ompö chini rötini kegh lö kinetöy.

⁸ Kinkïtöcha lö karamach Kirurut pö Tororöt ato kïpöghisyeghö le otini mïchinote.

⁹ Mïchini kïpköchï pich lö kikïtat kirurut amelö ompö pich cho karamach wölo ompö pich cho penyöy kirurut nko cho mökonyïtöcha Tororöt nko mwokïyis, aketötyï cho puryö tïlilyö nko cho mökonyïtöy Tororöt, kikïtötï tïkwïl pich cho pöröy papotïnekwa

¹⁰ nka cheporestin nko mïrön cho le ptakalis nko pich cho choröy piko walaka nko putï nko cho mïrchini pich put anta kïnye anka tïkwïl nyo ighöy kïgh nyo chuniote nko kinetut pö man,

¹¹ kïle wölo mwoghöy Lökoy cho Karamach cho pö Tororöt nyo töror akusoyönote. Akï lökoyechoni cho kikonanïn nyinte amwatïta.

Sörö ompö kisyonöto Tororöt

¹² Oyokyinan sörö Kristo Yeso Echotyontenyo, nyo kökonanïn owesyö agh pöghisyenyi. Oyokyinan nyinte sörö ompöwölo keyitanïn mïchini opöghisyechan nyinte,

¹³ kïrkegh ato le tagh kyochïpön nyinte achop kong amwagh. Wölo kisyonchanïn Tororöt ompöwölo kitomönye osïkön kighanat, nyo kimonkïtönye kïgh nyo kyoghöy.

¹⁴ Kuyinwanïn Echotyontenyo pöropchenyi nyo puryö söröm akïkonanïn kighanat nko chomnyogh cho mi Kristo Yeso.

¹⁵ Pö man ngölyontonï akïmïchini kecham lasiny, lö kingwïn Kristo Yeso ngwïny atökïsörï mwokïyis akwani mwokïyonte nyo gha tya kïtïl pïchoni löwïr.

¹⁶ Wölo kisyonchanïn Tororöt atökuporï Kristo Yeso mïkukönötenyi nyo wow ompö ani, nyo ochï mwokïyon nyo gha kïsir. Lïku nyoni körkeyïn nyo pö pich lapay cho ghönöy nyinte ato le asïyech atökïtach söpon pö kokay.

¹⁷ Nya kïpöyit konyït nko ororyo, pöytoghinto kokay, nyo mömeghöy, amökïsïwïyi ompö kong, Tororöt nyo le nyinte onkït amömi anka, kokay nko kokay! Amen.*

¹⁸ Kokoninyi kiyomisötonï, werïnyu Timoteo, kïrïp kegh nko ngala werkoynön cho kikïmwa kutöngunyi. Pöghisyeghenö ngalechoni le kari lïk, atemuka poryenö poryot nyo karam.

¹⁹ Ripö kighanatengu ompö choghïn nyo karam. Mi pikö walaka cho möterchïnicha choghïntangwa, söromunyi kunyar kighanatengwa.

²⁰ Pich cho lenye choni kï ompö Umenayo nko Aleksanda. Kyonkoghchan pïchoni le odeny Onyöt tökïpköchi chane lö, memwoghönye chi Tororöt.