1 TESALONIKE 3 - PIPÏLIA

¹ Otini kimökemukechanye kemïkukön, kenanacha nyu lö karam kepökokyecha Atene opïn,

² keyonucha wölo omitekwa werïncha Timoteo nyo kïpöghisïyi nko acha kwomtoy Lökoy cho Karamach cho pö Kristo,* kungwïn kukilokwa akïcherakwa ompö kighanatengwo

³ atömanyakorit chi anka tïkwïl ompö kwenunkwa ompö nyörilwokchete. Onkïtökwa akwane lö machata Tororöt nyörilwokchoni ompö acha.

⁴ Ompöwölo kikïnyaghacha kemwowokwa atanye kitökemitenöcha nko akwa lö tökechopecha kong onkïtökwa lö kigha lenyini kikïmwaghacha.

⁵ Nka nyoni kini kighanïn oyonï Timoteo. Kimomukanye omïkukönöy ngat nka nyoni kyoyokwan nyinte kungwïn kuros wölo kitöptö kighanatenkwa atömötöp ana ntökïtyamakwa työmin akwigh ighisyencha nyo kikïsïnga kïlïkwï kwïle!

⁶ Wölo otï le ye kamïlegha Timoteo wöloni akwipkecha nyinte lökoy cho kighecha kengörökyenö cho pö paraku kighanatenkwa nko chomnyenkwa. Kömwowecha nyinte lö omitekwa ononecha kïnomnyö, akïmwowecha lö, kyamakwa emö ompö acha lenyini kyamecha emö ompö akwa.

⁷ Kïlenyona, nyu tupchenicho, kekilecha kighanatenkwa otini kïmitecha nyarïl nko kiwongunöt.

⁸ Ompöwölo kichicha sötote ye ato achïchïmakwa lasiny ompö Echotyon.

⁹ Kimukecha ye keyokyine tororötïnyo sörö ompö akwa. Kiyokyinecha nyinte sörö ompö ngörekyö nyo kïtïngetecha ompö tawunyi ompö akwa.

¹⁰ Kïmitecha kesoghöy nyinte nangat nko pöghet ompö mïkulöwuncha kïmïkul lö töpïswecha nyinte kepkana kesïwena kegh nko akwa atöketöswokwa kïgh anka tïkwïl nyo rarteghate ompö kighanatenkwa.

¹¹ Kïsoghecha lö töyotwecha or Paponyo Tororöt nko Echotyontenyo Yeso nyo kïpkononecha wöloni omitekwa!

¹² Kïsoghecha lö teghakwa Echotyon achama kegh akwane, acham pikö walaka löwïr, akïtasa chomnyenkwa lasiny kïkarkegh nko nyincha nyo kïtïngetecha ompö akwa,

¹³ atökwigh mïkuliskökwa kïchïchïm, atalïkuna pich cho motïngcha lelut, atotïlilitunö ompö tawu Tororötïnyo akï Paponyo, otini ketï Echotyontenyo Yeso nko pikachi löwïr cho tïlilöch.