1 SAMWEL 7 - PIPÏLIA

¹ Kïpka pipö Kiryat Yearim kïcheng Santuku Muma* ECHOTYON, akïsïtï kö pö Apinadap nyo kimi kutïng. Akutïlil chane Eleasar wero Apinadap kïrip Santuku Muma ECHOTYON.

Kapayta Samwel koro Israel

² Kuwer könyiswö cho le tömönut odeny kïngeta kïtöpö Santuku Muma ECHOTYON Kiryat Yearim. Kïmi pipö Israel kïlokyini ECHOTYON kimököy kingörokut.

³ Kïlenchï Samwel pipö Israel löwïr, “Ato komïlonchekwa wölo mi ECHOTYON ompö mïkulögh akonga, anategha nyu tororötinechay le to nko Astarot* ompö kwenunkwa atang wölo mi ECHOTYON apöghisyechï nyinte onkït. Atökïsörunenok mori Pilisti.”

⁴ Kwistö pipö Israel Paaltin* nko Astarotin, akïpöghisyechï ECHOTYON onkït.

⁵ Kïlenchï Samwel pipö Israel, “Onyoryechinö löwïr Mispa, atö osoghwok ECHOTYON.”

⁶ Kïlenyona kïnyoryeghö Mispa löwïr, akïram pögh akïmïlchï tawu ECHOTYON, kïkïrur asisoni chane, akïlö, “Kikeghchicha ECHOTYON ngokï.” Kurwokyï nyu Samwel pipö Israel ompö Mispa.

⁷ Nyini kilïm pipö Pilisti lö könyoryechï pipö Israel Mispa, kïpa pöytoghi pipö Pilisti kïpusta atökïporyeghö chane. Otini kilïm pipö Israel kïmïghyö nyoman.

⁸ Kïlenchï pipö Israel Samwel, “Mepïstö isagh ECHOTYON Tororötïncha, atökïsörwecha ompö mori pipö Pilisti.”

⁹ Kïyeng Samwel wawa kech nyo tökïrerïyi akutö ECHOTYON kïmïkul le amöros nyo kipelöy, akïsagh ECHOTYON kungarak chane, kïterchï ECHOTYON saghatenyi.

¹⁰ Otini kimi Samwel kutötoy amörosnay, kïrikwï pipö Pilisti atökïporyeghö pipö Israel, wölo kuteghchï ECHOTYON pipö Pilisti ompö tïlöt nyo wow, nyo kigh chane asisoni kïkwongkwongisyö. Kirïnta pipö Israel chane.

¹¹ Kingeta pipö Israel Mispa, kïrïpata pipö Pilisti akïparata ntökwit Pet Kar to.

¹² Kïcheng Samwel kagh akïpölchï kwenu Mispa nko Syen. Kïkurö koghay Epeneser akïlö, “Kengarakecha ECHOTYON nko nyete le ye.”

¹³ Kikïrïnta nyu pipö Pilisti, amökuwercha ngat koro Israel. Kirïnta ECHOTYON chane ompö paytaghpa Samwel.

¹⁴ Keyokwï kanastin löwïr cho kichenga pipö Pilisti Israel, kïngata Ekron ntökwit Kat, kuyokwï Israel korengwa kïngetunö mori pipö Pilisti. Akimi kalya kwenu Israel nko pipö Amori tïkwïl.

¹⁵ Kïpayta Samwel pipö Israel ompö könyiswechi löwïr.

¹⁶ Kiwetöy köny anka tïkwïl Petel nko Kilkal nko Mispa, akurwokyï chane ompö kanastinechï kï sömök.

¹⁷ Akiwetöy Rama, ompöwölo kimi katanyi wölini, kirwokyï pipö Israel ompö wöloni tïkwïl. Kïtekyï ato kïpelo amöros ECHOTYON ompö wölini.