1 SAMWEL 6 - PIPÏLIA

¹ Kitöpö Santuku Muma ECHOTYON koro pipö Pilisti aro mut nko odeny.

² Kikur Pilisti tïsï nko chepsoköytin akïtep lö, “Kidochane Santuku Muma ECHOTYON? Omwowecha kiyodocha kïwö otini kömitö nko ne?”

³ Kïlö chane, “Ato ayodekwa Santuku Muma Tororöt pö Israel, mayoda kwïle, ayoda nko ropöwonto ngokï. Osöpchenekwa nyu, ankïtukwa lö ompö ne tökonokwa ECHOTYON sitöt.”

⁴ Kïlö pipö Pilisti, “Ne ropöwonte nyo pö ngokï nyo kitönicha nyinte?” Kïwöghökyï chane lö, “Körkeyïn pö tösus mut cho pö koltin nko mïr mut cho pö koltin, kïrïp kegh nko pöytoghi Pilisti kï mut, ompöwölo kinamakwa tösuschoni löwïr nko pöytoghikwa.

⁵ Agha körkeyïntino tösus nko mïr cho kipokyï kor atö ororyö Tororöt pö Israel, töptoy ana muköy kuchïchuk sitenyi ompö akwa nko tororötinekwa korenkwa.

⁶ Ompö ne tökwoghïghitu mötöwekwa le cho pö pipö Misri nko Parao? Ntökïtenö kunyarnyar ECHOTYON chane, kïpïstö nyu pipö Israel kïpa.

⁷ Agha ye nyu nkari nyo tökïrel acheng tïch odeny cho opoghe cho tomöcha kwigh ighisyö arötyï nkari tïchoni ayoda moghe kïpa kaw.

⁸ Achenga Santuku Muma ECHOTYON atö nkari ori atolapay otö santukï nyo mi körkeyïntinechay pö koltin kamasunyi, chay kitöni ECHOTYON le ropöwo ngokï. Akanyakwa nyu kïwö.

⁹ Arosakwa nyu, ato wö kutang korenyi wölnö le Pet Syemes, onkïtï nyu lö nyinte nyï kökonecha ghöyityonï tenö nyï. Atomöwönye kenkïtucha nyu lö melö nyinte nyï kikonecha sitöt, wölo kengwïn ompö kel nyo gha.”

¹⁰ Kwigh pïchay lenyoni, kïcheng tïch odeny cho opoghe akïrötyï nkarinay akïkörchï moghe kaw.

¹¹ Kutö Santuku Muma nkari ori nko santukï nyo mi körkeyïntino mïr cho pö koltin nko tösus.

¹² Kïpa tuchay kïrïp or akonga kutang Pet Syemes akughïtyotoy, kimöwöghökisyöcha kutang kamas nko kamas Kirïp pöytoghi Pilisti ntökwit rotyo Pet Syemes.

¹³ Kimi pipö Pet Syemes kïkösöy nkanunekwa ompö wölo le mpöghogh, nyini kisyol konyikwa, kïsïwa Santuku Muma, kïngörekyö tya.

¹⁴ Kungwïn nkarinay ntökwitï para Yoswö nyo mi Pet Syemes akughyö ompö ato kimi ghatya nyo wow. Kïtörotör pïchay nkarinay, akïcheng tuchay kïropchï ECHOTYON amöros nyo kïpelöy.

¹⁵ Kïsïtï pipö Lawi Santuku Muma ECHOTYON nko santukï nyo mi kamas nyo kimi körkeyïntinechay pö koltin akutö ghatyanay wow. Kïropchï pipö Pet Syemes asisoni ECHOTYON amöros nyo kïpelöy nko amörostine walaka.

¹⁶ Kïmïlisyö pöytoghi Pilisti chay le mut Ekron asisini, otinö kikïsïwa cho kighisyö löwïr.

¹⁷ Kiyoktö Pilisti tösuswo koltin cho le mut kïle ropöwonto ngokikwa. Ki körkeyïn akonga akonga, ompö kanasyanta Asdod nko Kasa nko Askelon nko Kat nko Ekron.

¹⁸ Kiyoktö tïkwïl mïr cho pö koltin kïrïp kegh nko kanastina Pilisti, chay pö pöytoghichay le mut: Kanastin cho kikitekyï nïyet nko kanastin cho mïnkech cho mömicha nïyetwö. Tökïmitö le kiporunöt nko ye ghatyanay wow kikitö kamas Santuku Muma ECHOTYON ompö para Yoswö nyo pö Pet Syemes.

¹⁹ Kipar ECHOTYON pipö Pet Syemes cho le 70, ompöwölo kirumtö Santuku Muma ECHOTYON. Kïlokyö pich ompöwölo kapar ECHOTYON pich cho chang tya.

Santuku Muma ompö Kiryat Yearim

²⁰ Kïlö pipö Pet Syemes, “Ngo nyo muköy ngalechï pö Santuku Muma ECHOTYON, Tororötnï tïlil? Akïngeto yi kïwetöy wölo mi ngo?”

²¹ Kiyonta pich kïpa kïmwochï pipö Kiryat Yearim lö, “Kikuyokwï pipö Pilisti Santuku Muma ECHOTYON. Apkana achenga kïwö wölo omikwa.”