1 SAMWEL 5 - PIPÏLIA

¹ Nyini kicheng Pilisti Santuku Muma, kïsït kïngeta Epeneser ntökwit kanasyanta Asdod

² akutö koto tororötïngwa Dakon kïtöpö kamasu körkeyïnoni.

³ Kïnget pipö Asdod tökwoghö asis nyo kirïpöy akïlö kiros kikïtïnchï Dakon Santuku Muma ECHOTYON, kïcheng Dakon akutö atay kömito.

⁴ Wölo nyini kinget asisto odeny ngat, kïlö kiros kichïnta Dakon kïköpïghtö mu ompö tawu Santuku Muma ECHOTYON akïmïtïkö möt nko ewunechi kïchïnchï ket pö kukat, kïngötï portö onkït kïchïrmet.

⁵ Nka nyay mötïkönye tïsi Dakon ket pö kuka Dakon ompö Asdod anta chi anka tïkwïl nyo lïtöy kö pö Dakon nko nyete le ye.

⁶ Kyawesit ECHOTYON ompö pipö Asdod akutö sitöt Asdod nko seremwokachi akutö tösus.

⁷ Nyini kisïwa pipö Asdod kïgh nyo kigha, kïlö, “Mökïmïchininye kïtöpö nko acha Santuku Muma Tororöt pö Israel, ompöwölo kikwawesit nyinte ompö acha nko Dakon tororötïncha.”

⁸ Kïlenyona kïkur pipö Asdod pöytoghi pipö Pilisti löwïr akïlenchï, “Kido ne Santuku Muma Tororöt pö Israel?” Kïlö chane, “Nya kesït kutang kanasyanta Kat.” Kesït nyu santukunay pö Muma kutang Kat.

⁹ Otini kitïta Kat, kwawesit ECHOTYON ompö pipö kanasyantanoni, akïwira chane mïghö nyo wow, akuchopa tösus pïchoni cho mïnkech nko cho echön.

¹⁰ Kïlenyona kïsït Santuku Muma kanasyanta Ekron. Nyini kit Santuku Muma Tororöt Ekron, kïriryö pipö Ekron lö, “Kepï Santuku Tororöt pö Israel wölï kïmicha atökïparecha lömïs.”

¹¹ Kïkur pipö Ekron pöytoghi Pilisti, akïlenchï, “Ayodena Santuku Muma Tororöt pö Israel apa otö otini kömitö, atömöparecha lömïs.” Kimitö mïghö kanasyante kïmïkul, ompöwölo kichop ECHOTYON chane.

¹² Pich cho kimakïparcha, kï kyam tösuswö, kit nyu rirata pipö kanasyantanoni yïm.