1 SAMWEL 4 - PIPÏLIA

¹ Kïpa pipö Israel kïporyeghö pipö Pilisti, kïtek möngot pipö Israel Epeneser, kïtek möngot pipö Pilisti Apek.

² Kupokyï pipö Pilisti pipö Israel, akwotini kiporyö, kerïnta pipö Israel, akepar pich cho ngata 4,000.

³ Nyini kimïlisyö möngot pipö lïk, kïtep kegh poyi Israel lö, “Ompö ne tökïpïsyï ECHOTYON pipö Pilisti kïrïntecha? Kepe kesïtunö Santuku Muma ECHOTYON nyay mi Syilo, atömanyïl kungwïn kwenuncha atökïsörwecha ompö owesyo pungköcho.”

⁴ Keyonta pich kïpa Syilo kïsïtï Santuku Muma ECHOTYON Kimuktoghin, nyo mi kerupimtin.* Kïrïpï werpö Eli odeny Opni nko Pineas Santuku Muma nyo pö ECHOTYON.

⁵ Nyini kitï Santuku Muma ECHOTYON möngot kuteghyö pipö Israel tya kurïngring korö.

⁶ Otini kilïm pipö Pilisti kighumöto kiteghat, kïlö, “Pö ne kiteghatanï mi möngo Eprania?” Nyini kipköchï chane lö kikwitï Santuku Muma ECHOTYON möngot,

⁷ kïmïghyö chane nyoman, akïlö, “Kengwïn tororöt möngengwa. Heywey kikyam nyarïl! Ompöwölo kitomönye kwigha kïgh nyo lata nyete asistanka.

⁸ Heywey kikyam nyarïl! Ngo nyo sörwecha ompö owesyo tororötinechï owesöch? Nka chete tororötinechay kipara pipö Misri ompö sömewut cho sisinchö ompö surkwen.

⁹ Onyökönitunö akwa Pilisti aporyö le mïrön, atömalïkwï sekeyi pipö Eprania, le ato ki sekeyikwa chane onyökönitunö aporyö le mïrön.”

¹⁰ Kïporyö pipö Pilisti akïrïnta pipö Israel, kïryagh chane akïtoyö kïwö chi anka tïkwïl katanyi. Kikïpar pipö Israel cho pö lïk cho kipegho kelyön cho le 30,000.

¹¹ Kenam Santuku Muma Tororöt akepar werpö Eli odeny, Opni nko Pineas.

Megha Eli

¹² Kurïpö chi akong nyo pö ara Penchamen wölay kikïporyegho ntökwit Syilo asisini le akonga. Kipal sïrokachi akutö terïtyon mötïnyi kuporï nyarïltanyi.

¹³ Otini kitïta nyinte kutomtö Eli töpo ngacharunyi ompö or kamas kikönyisïyi, ompöwölo kökimïgh akwompö Santuku Muma. Nyini kitïta chichay möngot akïmwatïta ngalechay, kïlokyö pich ompö kanasyante kïmïkul.

¹⁴ Nyini kilïm Eli kiteghat kïlö, “Pö ne kiteghatanï?” Kïwö chichay lawel akïmwochï Eli.

¹⁵ Kitïng Eli könyis 98, kikikar nyinte kimökurosïtonye.

¹⁶ Kïlenchï chichay Eli, “Koperunan wölini mi poryot, nyete le asete.” Kïlö Eli, “Keghane nya werïnyu?”

¹⁷ Kïwöghökwï chichay kepï lökoyechay lö, “Kayon pipö Pilisti pipö Israel akï chang pich cho kakïpar kömeghö werköku kwodeny tïkwïl, Opni nko Pineas, akikecheng Santuku Muma Tororöt.”

¹⁸ Nyini kilö chichay kikecheng Santuku Muma, kïchïntegha Eli ngacharunyi kïweghö patagh ompö kukat kamas. Kïmïrö kat akïma, ompöwölo kikikïyosit akï ki chi nyo narate. Kikikurwokyï nyinte Israel könyis tömönut angwan.

Megha mïsïk pö Pineas

¹⁹ Kimirsïyi potïchtanyi nyo pö Eli, koko Pineas, akirich kïlusyö. Nyini kilïm nyinte lökoyechay pö namata Santuku Muma Tororöt nko megha potïchtanyi nko pontenyi, kungwïnchï kichïr pö lusyogh, kïlusyö.

²⁰ Nyini kirich kïma kokonay, kïlenchï kama echö nyinte, “Meway, ompöwölo keyiyönyi worö.” Wölo kimowöghökwïnye anta yang.

²¹ Kikurö monïngay Ikapod, nyoni kï, “Mökïminye ororyö Israel!” Ompöwölo kikecheng Santuku Muma nko ompö megheto potïchtanyi nko pontenyi.

²² Kïlö, “Mökïminye ororyö Israel, ompöwölo kikecheng Santuku Muma Tororöt.”