1 SAMWEL 31 - PIPÏLIA

¹ Kïporyö pipö Pilisti nko pipö Israel ompö kutïng pö Kilpoa, kepar pipö Israel cho chang, kïryagh pipö Israel cho kingötï.

² Kïyon pipö Pilisti ntökïnyorï chane, kïpar werpö Saulö: Yonatan nko Apinadap nko Malkisyua.

³ Kïtasa poryot tya ompö Saulö, kïrich pung nyinte akïwut kïlïkwï kotyon.

⁴ Kïlenchï Saulö ipinto karichi pö lïk, “Ngwïsuna chokengu aiparanïn, atamapka sompenichï pö Pilisti kïparanïn akïnyernyerenanïn.” Wölo melö kicham chichay, ompöwölo kiwagh. Kïcheng Saulö chokenyi akïpar kegh.

⁵ Nyini kisïwa chichay lö kikïma Saulö, kïcheng chokenyi akïpar kegh tïkwïl.

⁶ Kïma Saulö asisoni nko werkachi sömök nko ipinto karichï pö lïk nko pikachi löwïr.

⁷ Nyini kisïwa pipö Israel cho kimi woptö anka nyo pö mpöghoghyo Yesrel nko cho kimi Yordan okumpö kongasis lö kiryagh pipö Israel akikepar Saulö nko werkachi, kïpïstö kanastinekwa akïryagh. Kïpka pipö Pilisti kïmang kanastine.

⁸ Ato le asïyech ato kipetöy pipö Pilisti kïpïtöy pïchay kimeghö, kïnyorï Saulö nko werkachi sömök kimeghö ompö kutïng pö Kilpoa.

⁹ Kïmut möt pö Saulö akïngwïs karichi pö lïk, akïyonta pich kïpa koro pipö Pilisti kïmïkul kïmwochï lökoyechï karamach tororötinekwa nko pikökwa.

¹⁰ Kutö kari Saulö cho pö lïk kö nyo kïsogho Astarot* akïwudochï portanyi nayatu kanasyanta Pet Syan.

¹¹ Nyini kilïm pipö Yapes Kiliad ngal cho kighchï pipö Pilisti Saulö,

¹² kïpa pich cho le nyökon oghö kïyech akïsïtï por pö Saulö nko cho pö werkachi sömök cho kimi nayatu Pet Syan akïpka kïpela Yapes.

¹³ Atolapay kïcheng koye akïpa kïtïpchï ngwïny ket pö sankak nyo mi Yapes, akïkïrur ompö osis mut nko odeny.