1 SAMWEL 26 - PIPÏLIA

¹ Kïpa pipö Sip wölo mi Saulö ompö Kipea akïlenchï, “Mi Daudi kïwïngchini kegh kutïng pö Akila nyo mi Yesimon okumpö kongasis.”

² Kïwö Saulö kutang surkwen pö Sip nko nyökon 3,000 kïyar Daudi.

³ Kïmang Saulö kutïng pö Akila nyo mi kamasu or ompö Yesimon okumpö kongasis. Wölo kïtöpö Daudi wölnö le surkwen. Nyini kinkïtï lö mi Saulö kïyörotoy Daudi,

⁴ kïyonta ghotï kïpa kurosï Saulö, kïsöwï lö nyoman kikungwïn.

⁵ Kïwö Daudi ntökwit wölini kimöngöy Saulö, akïsïwa wölo kirïwöy Saulö nko Apner wero Ner kintöghoghinto pikachi pö lïk. Kimi Saulö kïrïwöy kwen kïruyö pikachi kuwit nyinte.

⁶ Kïtep Daudi Aimelek chi pö Ititi nko Yoap werto ompö Apisyay wero Seruya lö, “Ngo nyo wetöy wölo mi Saulö nko ani?” Kïlö Apisyay, “Owetan nko nyi.”

⁷ Kïwö Apisyay nko Daudi möngo Saulö aghononi, akïnyorï nyinte mi kïrïwöy kwenu möngot akipörtochï ngotïnyi ngwïny atolekïtö mötïnyi, kïrï Apner nko pipö lïk kuwit nyinte.

⁸ Kïlenchï Apisyay Daudi, “Ketö Tororöt aghonete punyontengu moriku, nya atoran nyinte ngotïnyi kïwudochï ngwïny, amelenchï kegh otoran kïnyïl odeny!”

⁹ Wölo kïlenchï Daudi Apisyay, “Mepar, ompöwölo nyoru chi sitöt nyo pöröy chi nyo le kïlana ECHOTYON.”

¹⁰ Akïlö ngat Daudi, “Owolwolan ompö kaynata ECHOTYON lö, pöröy ECHOTYON nyinte anta itïta asistanyi nyo meghöy anta kïpara poryot.

¹¹ Melö chömöy ECHOTYON aparan chi nyo le kïlanenyi, wölo chenga ngatït nyo lekïto mötïnyi nko söteto pögh akepa.”

¹² Kïcheng Daudi ngatay nko söteto pögh cho kilekïtö möt pö Saulö akïpa. Möminye chi nyo kisïwa anta söwï anta nget, kimi chane rïwön, ompöwölo kitö ECHOTYON rïwön nyo nïkis.

¹³ Kïwö Daudi ato le antakwagh, akughyongö kutïng parak ato low ompö chane,

¹⁴ akïkur lïkonay pö Saulö nko Apner wero Ner, akïlenchï, “Mengitönwanïnyinye so Apner?” Kïlö Apner, “Ngo nyï ngetöy pöytoghin nya?”

¹⁵ Kïlenchï Daudi Apner, “Olentan kechinyi chi nyo le nyakan ompö Israel nya? Kwompö ne nyu tömeripönyi echotyontengu pöytoghin? Ompöwölo kengwïn chi kïlïtï möngot atökïpar nyinte.

¹⁶ Melö karam kïyï keghanyi. Owolwolan ompö kaynata ECHOTYON lö mïchini meghanyi, ompöwölo merïpönyinye echotyontengu, nyo le kïlana ECHOTYON. Mi onö ye ngotpa pöytoghin nko sötenyi pö pögh, chay kömi ato lekïto mötïnyi.”

¹⁷ Kïsöwï Saulö kuti Daudi, kïlö, “Nyi nyoni nya werïnyu Daudi?” Kïlö Daudi, “Ani nyete echotyontenyu pöytoghin.”

¹⁸ Akïlö ngat, “Ompö ne terïpsetenenyi mötworintengu? Kaghan ne nyo gha nya?

¹⁹ Tere ye nyu pöytoghin ngal cho mwoghöy mötworintengu. Ato ECHOTYON nyo keghinyi ighwanïn le nyï, otöninan ropöwo kalya, kïnyïl ato pich, kïchïpote chane ompö ECHOTYON, ompöwölo kayonenanïn chane koro ECHOTYON tömonyorwan mïlat akïlenchanïn, ‘Wïyö pöghisyechinö tororötin walaka.’

²⁰ Kïlenyona, mecham omeghchan kor nyo low ompö ECHOTYON, ompöwölo kengwïn pöytoghinto Israel kïyar kïmïtyan, le chi nyo sökosöy törit ompö kutïngkot.”

²¹ Kïlö Saulö, “Kaghan nyo gha, mïlenanyi werïnyu Daudi, mowunyinye kïgh nyo gha, ompöwölo kesïwenyi lö, pö tösunöt söpontönyan asisete. Kalïkwan sölwö, kalelan tya.”

²² Kïlenchï Daudi, “Anyï ngotïngu we pöytoghin! Nya kungwïn chi kïcheng.

²³ Töni ECHOTYON chi anka tïkwïl ropöwontenyi ompö mantanyi nko kighanatenyi, ompöwölo ketöninyi ECHOTYON oghonete morichan, wölo melö kaparinyi nyo le kïlana ECHOTYON.

²⁴ Kïle ato pö tösunöt söpontöngu ompö ani, nya kïpöyit tösunöt söpontönyan ompö ECHOTYON akïsörwanïn nyinte ompö kömpölelut löwïr.”

²⁵ Kïlenchï Saulö Daudi, “Nya kusoyönïn ECHOTYON werïnyu! Ighenyi tïkwïn cho chang akïpïntoy.” Kïwö Daudi arenyi, kïmïla Saulö katanyi.