1 SAMWEL 23 - PIPÏLIA

¹ Kemwochï Daudi lö, “Mi pipö Pilisti kïporyegho kanasyanta Keila akïchoröy pagh cho mi ghatoy.”

² Kïtep Daudi ECHOTYON lö, “Owan oporyeghö pïchï pö Pilisti?” Kïlenchï ECHOTYON Daudi, “Wïyö poryeghenö chane aisörï kanasyanta Keila.”

³ Wölo kïlenchï pikachi Daudi, “Kakemïghyecha ompö wölete le Yuda, lentöy ne nyu ato kïpecha Keila keporyeghö pipö Pilisti?”

⁴ Kïtep Daudi ECHOTYON ngat. Kïlenchï ECHOTYON nyinte, “Wïyö tanga Keila, ompöwölo otönan pipö Pilisti morikwa.”

⁵ Kïwö Daudi nko pikachi kutang Keila akïporyö nko pipö Pilisti akïrongwï tukakwa akïpar chane cho chang. Kïsörï nyu Daudi pipö Keyila.

⁶ Kip Apyatar wero Aimelek epod* otini kiperta kutang Keila wölo mi Daudi.

⁷ Kemwochï Saulö lö, köwö Daudi Keila. Kïlö Saulö, “Kikutö nyu Tororöt nyinte morichan, ompöwölo kökörchï kegh kanasyan nyo tïng kukot cho tekote.”

⁸ Kïmwochï Saulö pikachi kïpa Keila atökurich akïporyeghö Daudi nko pikachi.

⁹ Kunkïtï Daudi lö kitïng Saulö tötut kïpar nyinte, kïlenchï tïsintonay le Apyatar, “Ipunö yi epodnay.”

¹⁰ Atolapay kïlö Daudi, “We ECHOTYON Tororöt pö Israel, kalïman lö ngwïnöy Saulö Keila, atökunyar kanasyante akwompö ani.

¹¹ Osoghinyi ECHOTYON Tororöt pö Israel lö mwowante, tönanïn pipö Keila morichi? Ngwïnöy Saulö wölete le ato kalïman?” Kïlenchï ECHOTYON Daudi, “Ngwïnöy wölete.”

¹² Kïlö nyinte, “Tönanïn pipö Keila nko piköchan mori Saulö?” Kïlö ECHOTYON, “Töninyi.”

¹³ Kingeta Daudi Keila nko pikachi cho kingata 600, kïpa wölo kïpestata. Otini kilïm Saulö lö kikuperta Daudi, kïpïrönö kïrïp nyinte.

Daudi ompö komos

¹⁴ Kïwïnchï kegh Daudi wölo aghïgh ompö surkwen, cho mi komoswo surkwen pö Sip. Kiyar Saulö Daudi kïtenö osis, wölo metönye Tororöt nyinte morichi.

¹⁵ Kimïgh Daudi nyoman ompöwölo kimököy Saulö kïpöröy nyinte. Kimi surkwen pö Sip nyo mi Ores.

¹⁶ Kïwö Yonatan wero Saulö wölo mi Daudi ompö Ores, akuchïchim nyinte kutwayta kegh Tororöt.

¹⁷ Kïlenchï nyinte, “Mewoghisyö, ompöwölo melö muköy paponyan Saulö ntökïparinyi, ilïkunenyi pöytoghinto Israel, alïkwan rïpöwontengu, akunkït paponyan lenyoni.”

¹⁸ Kwam chane muma kwodeny ompö ECHOTYON. Kudong Daudi Ores, kïwö Yonatan kaw.

¹⁹ Kïpa pipö Sip kutang Kipea wölo mi Saulö, akïlenchï, “Mi Daudi kïwïngo kegh wölo aghïgh ompö Ores nyo mi kutïng pö Akila ewu tagh ompö Yesimon.

²⁰ Nyonö nyu, we pöytoghin, korencha ato imökenyi lenyoni atöketönöcha nyinte moriku.”

²¹ Kïlö Saulö, “Nya kuperurokwa Tororöt, ompöwölo kosyonchanïkwa.

²² Ape okïtunö lasiny otini mi nyinte, akï ngo nyo kasïwechï nyinte wölini, ompöwölo kakïmwowanïn lö lïsin nyinte.

²³ Omörörunö nyu lasiny wölo westegho nko wölo wïngo kegh, apkan nyu omwowanïn ngala man. Atowan nyu nko akwa, atomito kïnye kore, oyöran kïghömu koro Yuda kïmïkul.”

²⁴ Kïpa pïchay chane kuntaghogha Saulö kutang surkwen pö Sip. Kimito Daudi nko pikachi surkwen pö Maon, nyo mi Arapa, okumpö tagh ompö Yesimon.

²⁵ Kïwö Saulö nko pikachi kïyar nyinte. Kemwochï Daudi, kïlenyona kurïp kïwö kumpur köpön nyo mi surkwen pö Maon. Nyini kilïm Saulö kïrïp nyinte kutang surkwen pö Maon.

²⁶ Kuwit Saulö nko pikachi kutïngtö kareran, kïmi Daudi nko pikachi kareran kïngwïnto kegh atömönyorï Saulö. Otini kimi Saulö nko pikachi kuriköy Daudi atökïnam nyinte nko pikachi,

²⁷ kwitï chi akïlenchï Saulö, “Mïlena lawel ompöwölo kikupokyï pipö Pilisti kore.”

²⁸ Kïpïstö Saulö Daudi akïwö kïporyeghö pipö Pilisti, kïlenyona kekurö atoni Ghatya Chïwïtat.

²⁹ Kïweghö Daudi atoni akïmang köpönoti okumpö Enkedi.