1 SAMWEL 22 - PIPÏLIA

¹ Kupertegha Daudi kanasyanta Kat akïwïnchï kegh köpöno Adulam. Nyini kilïm werkökwa nko katangwa lö kimi wölini, kïpa kutang wölini.

² Kingwïn chi anka tïkwïl wölo mi nyinte nyo kitïng kömpölelyö anta pösön anta ngwonïn ompö mïkulöwunyi, kïlïkwï Daudi yetïntöngwa. Ki pich cho ngata 400 choni.

³ Kïweghö Daudi atoni kutang Mispa nyo mi Moap, akïlenchï pöytoghinto Moap, “Kaykay osominyi lö nya kungwïn paponyan nko yonyan kïtïpïyö nko nyi, ntökïtenö onkïtwan kïgh nyo ighwanïn Tororöt.”

⁴ Kïpïsyï Daudi yiyichi kumpur nko pöytoghinto Moap, kumpur chane nko nyinte ompö osis löwïr cho kiwïngo kegh Daudi köpön.

⁵ Kïlenchï werkoyonta nyo kikuro Kad Daudi, “Mempure köpönonï, wïyö tanga koro Yuda.” Kïwö Daudi kutang wuw pö Eret.

⁶ Kïlïm Saulö lö kikesöwï wölo mi Daudi nko pich walaka cho kimi tïkwïl. Kimi Saulö kïtöpo sankak ghït ompö Kipea ato sïtote akitïng ngotïnyi akimito mötworichi cho kiwit nyinte.

⁷ Kïlenchï Saulö mötworichi cho kighyongo otini mi nyinte, “Atere, pipö Penchamen, kolekwa muköy kïyï le wero Yese kïkonokwa paren nko pareni sapipun akwigh akwa alïkuna yetïntinechi pö lïk,

⁸ nka nyï kangalanenanïkwa nyo gha? Amöminye chi nyo kömwowanïn lö kikwam muma Yonatan nko wero Yese. Amöminye chi nyo yonganïn anta mwowanïn lö, mi Daudi kïyöröy pöröyïn atökïparanïn.”

⁹ Kïlö Doek nyo pö pipö Edom nyo kighyongöy nko mötwori Saulö, “Kyasïwan wero Yese ato kingwïn kanasyanta Nop, wölo mi Aimelek wero Aitup.

¹⁰ Kïtep Aimelek Tororöt kïgh nyo mïchini kwigh Daudi, atolapay kutö nyinte omisyö nko choko Kolyat chichay pö Pilisti.”

¹¹ Kïyonta Saulö pich, kïkurï tïsin Aimelek wero Aitup nko pikökwa nko tïsï cho kimi Nop, kïpka chane löwïr wölo mi nyinte.

¹² Kïlö Saulö, “Tera ye nyu, wero Aitup.” Kïlö Aimelek, “Owöy, we pöytoghin.”

¹³ Kïlenchï Saulö nyinte, “Ompö towökanïkwa nko wero Yese atö ketönyi nyinte omisyö nko chok aitepanyi Tororöt kïgh nyo mïchini kwigh nyinte, anyï ye nyu keyokwï möt akïmach kïparanïn?”

¹⁴ Kïlenchï Aimelek Saulö, “Möminye anta nyo ghanate ompö mötworiku le Daudi akep cheptöngu akïwowö ripiku akï konyïtote ompö kongu.

¹⁵ Melö asete onkït ato katepan Tororöt kïgh ompö nyinte. Wölo megheghchanïn mötworintengu, we pöytoghin anta piköchan, ompöwölo melö onkïtön ngalechï.”

¹⁶ Kïlö pöytoghintö, “Imeghenyi nyo mötïny, we Aimelek nko pikökwa.”

¹⁷ Kïmwochï pöytoghin ripintenyi nyo kighyongo kamasunyi lö, “Para tïsichï pö ECHOTYON, ompöwölo kengarak chane Daudi, kinkït chane lö kiperta Daudi amömwowanïcha.” Wölo kimachamcha mötworichi kïpar tïsi ECHOTYON.

¹⁸ Kïlenchï Saulö Doek nyo pö pipö Edom, “Para nyo le nyi tïsichï.” Kïpar asisoni Doek tïsï 85 cho kiloköy epod.*

¹⁹ Akïpar pich löwïr cho pö Nop kanasyanta tïsï: mïrön nko kor nko monïng nko tïch nko sïkïröy nko kechir.

²⁰ Wölo kichïwït wero Aimelek wero Aitup akong nyo kïkuro Apyatar akurïp wölo mi Daudi.

²¹ Kïmwochï Apyatar Daudi lö, “Kapar Saulö tïsi ECHOTYON lömïs.”

²² Kïlenchï Daudi Apyatar, “Nyini kyasïwan Doek nyo pö pipö Edom ompö wölini asisanye, osöwan lö mwochini Saulö nyo mötïny. Kigheghchinanïn ompö megha pikökwa.

²³ Mpurö nko ani amewöghisyö, ompöwölo chi nyo yöröy söpontönyan kïyöröy nyengu tïkwïl, ato iminyi nko ani ichinyi ripote.”