1 SAMWEL 14 - PIPÏLIA

¹ Kilenchï Yonatan asistanka ipinto karichi pö poryot, “Nyonö kepe kyoghyenö möngo pipö Pilisti nyinö mi antakwagh.” Wölo melö kimwochï kwanta Saulö,

² nyo kimi kïtöpo sörömu Kipea, ket pö makumanka* nyo mi Mikron, kimito nyinte nko mïrön cho ngata 600.

³ Aiya wero Aitup werto ompö Ikapod wero Pineas wero Eli nyo kile Tïsinto ECHOTYON ompö Syilo akiloköy epod.* Melö kinkït pich lö kökiwö Yonatan.

⁴ Kimi ghatya nyo kogh woptine kwodeny ompö kwenu adoket nyo kimököy Yonatan kuweröy tökïwö kutang möngo Pilisti, kikïkuro anka Poses kekurö anka Sene.

⁵ Kimi ghatya anka okumpö löt wölo topönöy Mikmas, kimi anka okumpö tagh wölo topönöy Kepa.

⁶ Kïlenchï Yonatan ipintonay pö karichi pö poryot, “Nyonö kepe möngonï pö sompenichï mi yi ate. Töptoy muköy ECHOTYON kungarakech, ompöwölo möminye kïgh nyo körtoy ECHOTYON kïsörï ompö pich cho chang anta kö ngörï.”

⁷ Kïlenchï chichay Yonatan, “Igha lenyini inonenyi, omitan nko nyi.”

⁸ Kïlö Yonatan, “Kyoghyenö wölini mi pïchini, akeporchï kegh chane.

⁹ Atolenchecha chane, ‘Akanya kepkanacha wöloni omitekwa,’ keghyongocha otini kakïmitö, mökïpetechanye wölini mi chane.

¹⁰ Wölo ato lö chane, ‘Apkana wölï kïmicha,’ Kepa, ompöwölo kikutö ECHOTYON chane moricha. Nyoni nyo lïku kiporunöt ompö acha.”

¹¹ Kuporchï kegh chane kwodeny pipö Pilisti, kïlö Pilisti, “Achï pipö Eprania kapkana pïrïmpotichay köwïngo kegh.”

¹² Kïkur Pilisti Yonatan nko chichay kipchini nyinte karichi pö poryot, akïlenchï, “Apkana wölï kïmicha atonyorunö kïgh nyo komöröy.” Kïlenchï Yonatan chichay kömi tïkwïl, “Rïpkanïn, ompöwölo kikutö ECHOTYON chane mori pipö Israel.”

¹³ Kïpusuna nyu Yonatan wölaye akïkughonuy, kïrïpöy nyinte chichay kipchini karichi pö poryot. Kiporyeghö Yonatan pipö Pilisti akupopchï ngwïny, kïpar nyu chane ipintenyi pö kari poryot.

¹⁴ Kïpar Yonatan nko chichay kiwetöy tïkwïl, pipö Pilisti ompö pörche nyo tagh cho ngata tömönut odeny cho ato ngata nïsï eka.

¹⁵ Kïkwongkwongisyö pich ompö möngot nko paren nko pich löwïr nko nyini le lïke kïmïkul nko pïchay kipoktö, kurïngring ngwïnya tïkwïl, kïkwongkwongisyö tya.

Kakïrïnta pipö Pilisti

¹⁶ Kïlö kiros ripi Saulö cho kimi Kipea nyo pö Penchamen, kiryöghsyetö Pilisti akïkwangkwang kegh.

¹⁷ Kïlenchï Saulö pich cho kimi tïkwïl, “Oyitö kegh, ngo nyo möminye nko acha.” Otini kiyit kegh chane, kïsöwï lö möminye Yonatan nko ipinto karichi pö poryot.

¹⁸ Kïlenchï Saulö Aiya, “Ipunö yi Santuku Muma* ECHOTYON.” Kipsötoy osiswechoni pipö Israel Santuku Muma.

¹⁹ Otini kitökïmi Saulö kïngölonöy nko tïsin, kïtasa pölonay kimi möngo pipö Pilisti, kïlenchï Saulö tïsintonay, “Mökïminye pöröyïn nyo kïtepöy kïgh Tororöt!”

²⁰ Kïnap kegh Saulö nko pich cho kimi nko nyinte akïpa kïporyeghö pipö Pilisti cho kimi kïpöröy kegh chane nko chane, ompöwölo kikwongkwongisyö chane tya.

²¹ Kiwöghökisyö pipö Eprania cho kökikïpa nko pipö Pilisti kutang möngengwa, kutang wölo mi pipö Israel cho kimi nko Saulö nko Yonatan.

²² Nyini kilïm pipö Israel cho kiwïnchï kegh komoswo Epraim lö, kiryögh pipö Pilisti, kïpa chane tïkwïl kïporyeghö pipö Pilisti.

²³ Kïporyotö ntökwit Pet Apen, kïsörï nyu ECHOTYON pipö Israel asisoni.

Ngal cho kighisyö otini kiwonyö poryot

²⁴ Kyam kömöy pipö Israel asisoni, ompöwölo kyomchï Saulö muma lö, “Chïpote chi anka tïkwïl nyo omisïyi asisï ntökwimön, ntökïtenö atakan pungköchan.” Kïlenyona möminye chi nyo kyomisyö asisoni kwimön.

²⁵ Kïpa pïchay löwïr ntökwit wuw nyo kinyïghï kumot.

²⁶ Nyini kilït wuw kïnyorï kumot cho yintoy, wölo möminye chi nyo kyonkoghtö ewunyi kïcheng ompöwölo kiwagh mumanay.

²⁷ Wölo melö kilïm Yonatan ngaleko kwanta otini kyomchini pich muma, kïlenyona kïsyorunö lïkïnyi kumat kite akwam, panini lawel kïsïch owesyö.

²⁸ Kïlenchï chi Yonatan, “Kikwamecha kömöy wölo komchï papongu pich muma lö, ‘Chïpote chi nyo omisïyi asisete.’ ”

²⁹ Kïlö Yonatan, “Wechï keghchï paponyan pich kïgh nyo gha! Rose lö konyorwan owesyö otï kaman kumat kite.

³⁰ Ntökam pich pöröweko pungkökwa chï köpörï asete? Kötö tya Pilisti cho kötökikepar.”

³¹ Kiparata chane Pilisti asisoni kïngata Mikmas ntökwit Ayalon, akökikwam pich kömöy nyoman.

³² Kïlenyona kupulchï pich kechir nko eghin cho le pöröw akïyeng akwam nko kisönkö.

³³ Kemwochï Saulö lö, “Keghchï pich ECHOTYON ngokï ompöwölo kam peny nyo mi kisön.” Kïlö Saulö, “Ochikwa wïchtoghï. Otörengunö yi kogh nyo wow.

³⁴ Ape omwochinö pich lö, ‘Nya kïrongwï chane tukakwa nko kechiryekwa, atökïyenga yete akwam. Tömeghchï ngokï ECHOTYON kwam pany kïmi nko kisön.’ ” Kïrongwï chane löwïr tukakwa aghononi akïyenga atoni.

³⁵ Kïtekyï Saulö ECHOTYON ato kïpelo amöros, ki pö tagh nyoni kïtekyï nyinte ECHOTYON.

³⁶ Atolapay kïlö Saulö, “Kepe keröytenö akepokyï Pilisti akepar ntökïyech amökepïstö kïsöp ompö akong.” Kïlö pïchay, “Igha kïgh nyo isïwïyenyi lö karam.” Wölo kïlö tïsin, “Kenyagha ketepa ECHOTYON.”

³⁷ Kïtep Saulö Tororöt lö, “Owan opokyï pipö Pilisti nya? Itöninyi chane mori pipö Israel?” Wölo kimöwöghökyïnye ECHOTYON Saulö asisoni.

³⁸ Kïlenchï Saulö kintöghoghichay, “Apkane yi atökekïtö lö ngokï ne cho keghisyö asisï.

³⁹ Kuwalwal kegh ompö kaynata ECHOTYON nyo söru pipö Israel lö, ato kö werïnyan Yonatan nyo kegh, kïmeghöy nyo mötïny.” Wölo kimöminye chi ompö pïchoni nyo kiwöghökyï nyinte kïgh.

⁴⁰ Kïlenchï Saulö pïchay, “Otöpïyokwa wop akonga, otöpan nko werïnyan Yonatan woptö anka.” Kïlenchï pïchay Saulö, “Igha kïgh nyo isïwïyenyi lö karam.”

⁴¹ Kïlenyona kïlenchï Saulö ECHOTYON Tororöt pö Israel, “Ompö ne tetaghanyi wöghökyinö mötworintengu asisete, we ECHOTYON Tororöt pö Israel? Ato mitenanïn ghöyityonï anta werïnyan Yonatan, iwöghökwï ompö Urim, wölo ato piköku Israel, iwöghökwï ompö Tumim.” Kuporï nyu lö Saulö nko Yonatan, kïchïwïtyö pich wakaka.

⁴² Kïlö Saulö kepara kwegh kuporï lö, “Ngo ompö ani nko Yonatan.” Kuporï lö Yonatan.

⁴³ Kïtep Saulö Yonatan lö, “Mwowante lö keghanyi ne.” Kïlenchï Yonatan kwanta, “Kyosyorunan lïkïp kumat kite achamchaman, kïlenyona ani nyo omeghöy.”

⁴⁴ Kïlenchï Saulö nyinte, “Nya kïtïghanïn Tororöt ato memeghanyinye.”

⁴⁵ Wölo kïlenchï pich Saulö, “Meghöy Yonatan ompö ne? Akwanyï nyinte nyo karïnta poryonï ompö pipö Israel. Kiwolwolecha ompö kaynata ECHOTYON lö, möminye putyontenyi nyo le ompö akong nyo chïntoy asete, ompöwölo kïgh nyo kegh nyinte asete kï ompö owesyö ECHOTYON.” Kïlenyona kïsorï pich Yonatan asisoni atömökïtïgh.

⁴⁶ Kïpïstö Saulö kïrïp pipö Pilisti, kïpa nyu Pilisti kutang korengwa.

Paytaghpa Saulö nko katanyi

⁴⁷ Otini kitor Saulö kïpayta Israel, kïporyeghö pungkachi cho kimi woptin löwïr. Kiporyeghö pipö Moap nko Amon nko Edom nko pöytoghi Sopa nko pipö Pilisti. Kirïnta nyinte ompö wölini kiset.

⁴⁸ Kiporyö nyinte ompö nyakanat akïpar pipö Amalek akïsörunö Israel moriko pungkökwa.

⁴⁹ Chï kï kaynötut pö werpö Saulö nko tipichi: Yonatan nko Ispi nko Malkisyua. Kikuro cheptö nyo le poret Merap kekurö nyo mïnïng Mikal.

⁵⁰ Kikïkuro korkenyi Ainoam chepö Aimaas. Kikïkuro yetïntanyi pö lïk Apner wero Ner mamato Saulö.

⁵¹ Kikïkuro papoto Saulö Kis, kekurö papoto Apner Ner. Kis nko Ner kï werpö Apiel.

⁵² Kingwan poryot ompö osiswo Saulö ompö Pilisti. Kïlenyona ato kisïwa Saulö lö kimi chi nyo awes anta nyakan, kukir kïpöyit lïkenyi.