1 SAMWEL 12 - PIPÏLIA

¹ Kïlenchï Samwel pipö Israel, “Kateran ngalekwa löwïr cho komwowanïkwa, kokonokwa ye nyu pöytoghin.

² Otïngetekwa ye nyu pöytoghin nyo mi nko akwa, kayositwan nyo le ani, akï mi werköchan nko akwa. Kyopöghisyewokwa kïngata mïnïngityenyan nko ye.

³ Mwagha ye nyu chi ompö ECHOTYON nko ompö pöytoghin nyo kakïl nyinte. Ngo nyo kyachengan edanyi anta sïkïryenyi? Anta ngo nyo kyalïsan anta opïrön? Anta ngo nyo kikonanïn asoya atökïkarta konyichan? Mwowunö ye atoyokun.”

⁴ Kïlö chane, “Möminye chi nyo kilïsanyi anta ipïr, anta ichenga kïgh.”

⁵ Kïlenchï Samwel chane, “ECHOTYON nko pöytoghin cho söwintönchini lö möminye kïgh nyo konyorchikwa morichan.” Kïlö chane, “Owöy, ECHOTYON nyo le söwintencha.”

⁶ Kïlenchï Samwel pïchay, “ECHOTYON nyo le söwinte, nyo kikïl Musa nko Aron, akumïtuna papotïnekwa koro Misri.

⁷ Oghyongenö nyu atoni torwokwok ompö tawu ECHOTYON. Achï ngal cho nömokwa: anane töngönchin cho kigh ECHOTYON atökïsörwokwa nko papotïnekwa.

⁸ Otini kiwö Yakopo Misri akïpïr pipö Misri chane, kïlokyï papotïnekwa ECHOTYON, kuyoktö ECHOTYON Musa nko Aron kumïtuna chane Misri akutö kïmang koronï.

⁹ Wölo kïwutyeghö chane ECHOTYON Tororötïngwa, kutö ECHOTYON chane mori Sisera yetïn pö lïko kanasyanta Asor nko mori pipö Pilisti nko pöytoghinto Moap cho kiporyeghö chane papotïnekwa akïrïnta.

¹⁰ Kïrirchï papotïnekwa ECHOTYON, akïlenchï, ‘Kikeghacha ngokï, ompöwölo kikïtaghacha ECHOTYON, akepöghisyechï Paaltin* nko Astarotin.* Wölo sörwecha ye nyu ompö mori pungköcha, atökepöghisyewuchanyi.’

¹¹ Kuyokwï ECHOTYON Yerupaal nko Parak nko Yepta nko Samwel atökïsörwokwa ompö mori pungkökwa ompö wop tïkwïl, amangakwa ompö kalya.

¹² Otini kyasïwekwa Naas pöytoghinto pipö Amon lö kingwïn kïporyeghonokwa ataghakwa ECHOTYON alekwa, ‘Kïmököy pöytoghin nyo pöytenech,’ akwanyï otïngökwa ECHOTYON Tororöt nyo le pöytoghintenkwa.

¹³ “Anyï ye nyu pöytoghin nyo kyakïlwakwa, nyay kyatepakwa, konokwa ECHOTYON pöytoghintenkwa ECHOTYON.

¹⁴ Tenöy ngala löwïr ompö akwa ato akonyïtökwa ECHOTYON apöghisyechï nyinte aterchï amapeny kirurutkachi. Arïp ECHOTYON Tororötïnkwa, akwa nko pöytoghintengwo.

¹⁵ Wölo atomoterchikwanye ECHOTYON kirurutkachi, kïkonokwa ECHOTYON sitöt le papotïnekwa.

¹⁶ Osisyenö nyu lasay atasïwena kïgh nyo ighöy ECHOTYON.

¹⁷ Olentan osiswo pekat chete nya? Wölo osoghan ECHOTYON kïkonï tïlöt nko rop, atonkïtunökwa lö echön ngokï cho kyoghchikwa ECHOTYON, otini kyatepakwa nyinte lö kïmököy pöytoghin.”

¹⁸ Kïlenyona kïsagh Samwel ECHOTYON, kïkonï ECHOTYON tïlöt nko rop asisoni, kuwagh pich tya ECHOTYON nko Samwel.

¹⁹ Kïlenchï pïchay löwïr Samwel, “Sagha ECHOTYON Tororötïngu akwompö acha, atömökïmeghöcha, ompöwölo kakïtasacha ngokicha ketep pöytoghin.”

²⁰ Kïlenchï Samwel pïchay, “Mowöghisyö, kïrkegh kaghakwa ghöyityö nyo tenö nyï, mopïstö ECHOTYON, wölo opöghisyechinö nyinte ompö mïkuliskökwa löwïr.

²¹ Amowöghökisyö atang wölo mi tororötino putintön cho mengörokokwanye anta sörwokwa, ompöwölo kwïle choni.

²² Kikuyomis ECHOTYON lö, möpïstonekwanye, ompöwölo kikïlakwa alïkunakwa pikachi kegh.

²³ Nya kïlowit ompö ani. Momukanye kokay ntoghchï ngokï ECHOTYON opïstan osoghwokwa. Wölo onetokwa or nyo karam nyo mïchini arïpakwa.

²⁴ Okonyïtö ECHOTYON apöghisyechï nyinte kïtenö osis ompö mïkuliskökwo löwïr anan tïkwïn cho echön cho kikwighwakwa nyinte.

²⁵ Wölo ato totösekwa tagh oghe ngokï, kepörokwa nko pöytoghintenkwa.”