1 SAMWEL 11 - PIPÏLIA

¹ Kipusta Naas pöytoghinto pipö Amon atö kïporyeghö kanasyanta Yapes nyo mi Kiliad. Kïlenchï pipö Yapes Naas, “Kyama mis atelïkunanyi pöytoghintencha.”

² Kïlenchï Naas chane, “Oman mis nko akwa ato achamakwa oködötön konyikwa löwïr cho pö okumpö tagh, atö otönön arasï koro Israel kïmïkul.”

³ Kïlenchï poyi Yapes nyinte, “Pïswech osis mut nko odeny keyoktenöcha pich kïpa koro Israel kïmïkul. Atomöminye chi nyo muköy kïsörwecha, kelïkucha cheku.”

⁴ Nyini kit pïchay Kipea koro Saulö, kïmwatïta ngalechay, kuteghyö pich akïriryö.

⁵ Kingwïno Saulö par kïrïpu eghin, kïlö Saulö, “Kam ne pïchï tökïriryö?” Kemwochï nyinte ngala pïchay pö Yapes.

⁶ Nyini kilïm nyinte ngalechoni, kungwïnchï mïkulöwu ECHOTYON ompö owesyö, kïngwanit lö kat nörekyenyi.

⁷ Kïcheng eghin odeny cho kikïrötyï mïchoki akïtanatan, akuyoktö pich kwip kïghömï koro Israel akïlö, “Chi anka tïkwïl nyo möngetunye akïrïp Saulö nko Samwel kïwö poryot, keghchini eghinechi lenyoni!” Kïmïghyö chane ompö kïgh nyo töptoy kimököy ECHOTYON kwighöy kïpkanta akonga löwïr.

⁸ Otini kituyechï Saulö chane Pesek, ki 300,000 pipö Israel, kï 30,000 pipö Yuda.

⁹ Kïlenchï chane pïchay pö Yapes kikiyokwï, “Olenchinö pipö Yapes, ‘Onyorunekwa sörunöt asïyech otini keghyö asis.’ ” Nyini kimwochï pïchay ngalechoni pipö Yapes, kïngörekyö nyoman.

¹⁰ Kïlenchï pipö Yapes Naas, “Kïlïkucha cheku asïyech, ateghwechanyi kïgh nyo isïwïyenyi lö karam.”

¹¹ Nyini le tökwoghö asisto odeny, kïtat Saulö pikachi kïpeghategha söpïchis sömök, akupokyï möngo pipö Amon nyini le kiwasan, akïpar chane ntökughyö asis. Ketoytoyö cho kingötï kïkuroteghö kegh moryönö.

¹² Kïlenchï pipö Israel Samwel, “Ngo chay kimwa lö, ‘Muköy lö ne Saulö ntökïpaytecha?’ Amïtuna pichoni, atökeparacha.”

¹³ Wölo kïlö Saulö, “Möminye chi nyo kïpöröy asete, ompöwölo kösörï ECHOTYON Israel.”

¹⁴ Kïlenchï Samwel pich, “Apkana kepe Kilkal atökechïchima paytaghpa Saulö ngat.”

¹⁵ Kïlenyona kïpa pïchay lapay kutang Kilkal, akïkïl Saulö ompö wöloni kïlïkwï pöytoghin. Akutötö ropöwo pöghisyö, kïngarak Saulö nko pipö Israel löwïr ompö atoni.