1 PÖYTOGHÏ 8 - PIPÏLIA

¹ Kïkur nyu Solomon poyi Israel nko kintöghoghï löwïr cho pö ortïna pipö Israel, kïtuyö nko nyinte ompö Yerusalem, atökïsïtö Santuku Muma ECHOTYON Sayon* kanasyanta Daudi kutang Kö pö Tororöt.*

² Kïtuyechï pipö Israel löwïr tawu pöytoghin Solomon Ichon pö Tunkun ompö arawa mut nko odeny.

³ Otini kökipka kintöghoghichay, kïsït tïsï nko pipö Lawi Santukunay pö Muma

⁴ ntökwit Köyay pö ECHOTYON nko Emana nyo mi ECHOTYON nko tïkwïn löwïr cho tïlilöch cho kimi Emanoni.

⁵ Otini kituyechï pipö Israel löwïr nko pöytoghin Solomon, otini mi Santukunoni Muma, kutötö amörostin cho pö kechir nko tïch cho kimeyitisyocha

⁶ Kïsït nyu tïsï Santuku Muma ECHOTYON ntökwit Kö pö Tororöt, atolapay kutö Wölo Tïlil Tya,* ngwïnyi köpepoy pö kerupimtin.*

⁷ Kighïtö kerupimtin köpepoy kïkarta Santukunoni nko pölöwe.

⁸ Kikoghöch pölöwechoni nyoman, nyo kimuköy chi kïsïwïyi walisayikwa ompö Wölo Tïlil Tya, amelö kikïsïwïyi ompö woptö anka. Tökïmi pölöwechoni atoni nko nyete le ye.

⁹ Melö kimi kïgh nyonikïny Santukunoni pö Muma kïpoto koghichay le odeny töpölöl kitö Musa ori ompö kutïng pö Sinay, wölanye kiyomisö kegh ECHOTYON nko pipö Israel atanya kipkono chane koro Misri.

¹⁰ Otini kilïtunö tïsï Wölo Tïlil Tya, kinyïghï polta Kö pö Tororöt,

¹¹ ntömökumïcha tïsichay kwigh ighisyengwa ompöwölo kinyïghï ororyo ECHOTYON kot.

¹² Kïlenyona kïsagh Solomon ECHOTYON lö, “Nyi, ECHOTYON nyo kitö asis yïm ailenyi omöngöy polta nyo tuw.

¹³ Kotekunyi ye nyu kö nyo pö töngönchin nyo imöngenyi kokay.”

Ngölonchini Solomon pich

¹⁴ Kïwaghaka pöytoghintö Solomon kïtopön pïchay kimi kughyongöy akïsagh Tororöt kusoyön chane.

¹⁵ Kïlö ompö saghatenyi, “Nya kïsala ECHOTYON Tororöt pö Israel nyo kakïrip kiyomisötenyi nyo kimwochï paponyan Daudi, lö,

¹⁶ ‘Melö mi kanasyanta anka nyonikïny ompö koro Israel kïmïkul nyo kïteköy atökïlïkwï nyo kïsoghenanïn, kïngeta atakinye kyamïtunan pikachu koro Misri. Wölo kakïlinyi, Daudi atepaytena piköchan.’ ”

¹⁷ Atolapay kulet tagh Solomon kïmwa lö, “Kunan paponyan, Daudi lö oteköy Kö pö ECHOTYON Tororöt pö Israel.

¹⁸ Wölo kïlenchï ECHOTYON nyinte, ‘Kighanyi nyo karam otini kimökenyi teke kö nyo kïsoghenanïn,

¹⁹ wölo melö nyi nyo iteköy. Tekwanïn werïngu, kö nyo kïsoghenanïn.’

²⁰ “Kepuntö ye nyu ECHOTYON kiyomisötenyi nyo kimwa. Kotöpan ngacharuto paponyu le pöytoghintö Israel, akyatekan Kö pö Tororöt nyo kïsogho ECHOTYON, Tororöt pö Israel.

²¹ Kaghan tïkwïl ompö Kö pö Tororöt, wölo kitöni Santuku Muma nyo kikitö koghichay töpölöl pö kirurutyengu nyo kitö ECHOTYON papotïnecha atanye kimïtuna nyinte chane koro Misri.”

Saghata Solomon

²² Atolapay kïweghö Solomon tawu pïchay akughyongö ato kïpelo amöros akïsyol ewunechi

²³ akïsagh lö, “We ECHOTYON Tororöt pö Israel, melö mito tororöt anka nyo karkegh nko nyi ompö yïm parak anta ompö wöl ngwïnyi ngwïny! Iripenyi muma* nyo kyamanyi nko piköku aiporchï chane chomnyogh otini karïp chane kirurutköku ompö mïkulöwekwa kïmïkul.

²⁴ Keripönyi kiyomisötengu nyo kimwochinyi paponyan Daudi. Ketïta ngölyon anka tïkwïl asisete nyo kimwochinyi nyinte.

²⁵ Nyo ye nyu, ECHOTYON Tororöt pö Israel, osoghinyi lö irip kiyomisötengu nyo kimwochinyi paponyan lö möngetonye ngacharu paytagh nyo pö Israel kö pö Daudi, ato mapenycha werkachi kirurutköku le Daudi.

²⁶ Kïlenyona ye nyu ECHOTYON Tororöt pö Israel, ikany kwitïta kïgh anka tïkwïl nyo kiyomisinyi mötworintengu paponyan Daudi.

²⁷ “Wölo, eimukenyi nyoman nya we Tororöt mönge ngwïny? Ato möghöminyinye mönge ompö nyini le yïm, kumuko nyu lö ne kïghaminyi Köyï kïmïnïng pö saghat kotekunyi?

²⁸ Wölo osoghinyi, ECHOTYON Tororötïnyu lö, iterwante saghatenyu aikonante möchutkachu cho osominyi asiswanete.

²⁹ Kaykay irip Kö pö Tororöt nangat nko pöghet yete kekïlanyi kesagheninyi. Iter sowutköchan cho omwowunyi ompö yeteyi.

³⁰ Iterwante sowutkachu nko cho pö piköku otini soghinyi chane akïmi kïtopönöy yeteyi. Iter ompö yïm wölini imöngenyi, ailöstoghchï piköku.

³¹ “Ato lelchï chi pöröryenyi akemïtï ntökwitï ato kïpelo amöros ompö Kongu akwam muma lö, melö lelate,

³² iter ECHOTYON ompö wölini le yïm, airwokyï mötworiku. Itö sitöt nyo le lelin nyo mïchini, aipïstö kïwechï kegh nyinö puryö lelut.

³³ “Ato rïnta punkökwo pikökwa pö Israel, ompöwölo kewunyi ngokï chane, akïkötö chane ngokikwa akïpka wölo imitenyi ompö rïngata kegh, ompö Köyete kïsogheninyi,

³⁴ iterchï chane sowutkökwa ompö yïm. Ailöstoghchï ngokikwa aikany kïmïlonchö chane ngat koronete kitönönyi papotïnekwa.

³⁵ “Ato iratanyi rop ompöwölo kewunyi ngokï piköku, akïkötö chane ngokikwa akïpka wölo imitenyi ompö rïngata kegh, ompö Köyete kïsogheninyi,

³⁶ iterchï chane sowutkökwa ompö yïm. Ailöstoghchï ngokikwa mötworiku pipö Israel ainet chane kwigh kïgh nyo tenate. Atolapay, itö rop koronete le nyengu, nyo kitönönyi piköku kïlïkwï nyingwa nyo mïlöy.

³⁷ “Ato itï kömöy kore anta sömew nyo gha anta nyar yomöt nyo layate pagh anta talam anta pokyï pung piköku anta itï sömewö anta kichïr ompö kwenungwa,

³⁸ iter sowutkökwa. Ato nyorï chi anka tïkwïl ompö piköku pö Israel nyarïl, akïsyol ewunekwa kutöngwï Köyete pö saghat,

³⁹ iter sowutkökwa. Iterchï chane ompö yïm wölini le möngengu, ailöstoghchï piköku aingarak chane. Ompöwölo nyi onkït nyo inkït mïkulis pö pich. Ighchï chi anka tïkwïl kïrïp kegh nko ighisyewutkachi,

⁴⁰ atökumï piköku kïkonyïtïnyi ompö osis löwïr cho möngöy chane koronete kitönönyi papotïnecha.

^41-42 “Kïkany atolïm ton nyo ngwïno kor nyo low ororyo kaynengu nko ighisyewutköku cho kighchinyi piköku Israel akungwïn kïsaghinyi ompö Kongu nyete,

⁴³ iterchï sowutkachi ompö yïm wölini imöngenyi. Aighchï nyinte kïrïp kegh nko sowutkachi, atökunkïtï kaynengu pipö ngwïny kïmïkul akïkonyïtinyi le piköku Israel. Nkïtu nyu chane lö kïsogheninyi Köyete kotekunyi.

⁴⁴ “Kïkany ato iyontenyi piköku kïset tökïporyö nko pungkökwa akïsaghinyi chane kïtopönöy kanasyantanï kekïlanyi Köyï kotekunyi,

⁴⁵ iter nyu sowutkökwa nko somutkökwa, itö rïntagh.

⁴⁶ “Kïkany ato iwunyi piköku ngokï, ompöwölo möminye chi nyo meghöy ngokï, ainarekanyi aipïsyï pungkökwa kïpar chane akïnam, kïrany kïlïkwï pïnot ompö kor pungkökwa, kïrkegh kö low anta kö lekït,

⁴⁷ iterchï piköku sowutkökwa. Atokötö chane ngokikwa ompö korononi, akïsaghinyi, akïnganyta ngokikwa nko ghöyityengwa, iterchï chane sowutkökwa, we ECHOTYON.

⁴⁸ Kïkany ato kötö chane ompö man akïsaghinyi kïtopönöy koronete kitönönyi papotïnecha nko, kanasyantanï kekïlanyi nko Köyï kotekunyi,

⁴⁹ iterchï sowutkökwa ompö yïm wölini imöngenyi aitö chane rïntagh.

⁵⁰ Ilöstoghchï ngokikwa nko penyatengwa, aigh pungkökwa kusyonchï chane.

⁵¹ Ompöwölo piköku chane akï mïlanköku cho kimïtunenyi koro Misri, kïpkana kwenu mapa töngönchin.

⁵² “Osoghinyi, ECHOTYON Kimuktoghin lö isyonchï piköku Israel nko pöytoghintengwa kïtenö osis, aiterchï sowutkökwa ato rirchinyi chane.

⁵³ Nyi nyo kikïla chane pipö ngwïny kïmïkul kïlïkwï mïlanköku lenyini kimwochinyi chane ompö kuti mötworintengu Musa, otini kimïtunenyi papotïnecha koro Misri, we Echotyon TORORÖT.”

Saghata söröm

⁵⁴ Nyini kiwany Solomon kïsagh ECHOTYON, kughyongö ato kïpelo amöros, otini kimi nyinte kïkïtïngo akïsyolöy ewunechi yïm.

⁵⁵ Atolapay kusoyön tuyonay pö Israel kïmïkul ompö kut nyo wow lö,

⁵⁶ “Nya kïsala kaynata ECHOTYON nyo ketö kalya pikachi Israel, kïrïp kegh nko kiyomisötenyi. Möminye ngölyon nyo le ompö akonga nyo köngötï metïta ompö kirurutkachi löwïr cho pö töngönchin, cho kimwowï mötworintenyi Musa.

⁵⁷ Osoghan ECHOTYON Tororötïnyo lö tötöpö nyinte nko acha lenyini kitöpö nyinte nko papotïnecha atömöpïstecha anta chalecha.

⁵⁸ Osoghan nyinte kïkonecha machat nyo kigho kïgh anka tïkwïl nyo mököy nyinte kerïpa kirurutkachi löwïr cho kimwochï papotïnecho.

⁵⁹ Osoghan ECHOTYON lö, tötïpï ngalechï pö saghatenyan tawunyi pöghet nko nangat, asoghan ngat lö tesyonchï nyinte pipö Israel nko pöytoghintengwa ompö möchutkökwa cho pö osis löwïr.

⁶⁰ Atökumï pipö ngwïny kïmïkul kunkïtï lö, ECHOTYON onkït nyo le Tororöt, möminye anka.

⁶¹ Osoghan alïkukwa pikachi cho ghönote ompö tawu ECHOTYON Tororötïncha kïtenö osis, arïp kirurutkachi löwïr chete omwowokwa asete.”

Kakisoyön Kö pö Tororöt

⁶² Atolapay kïtuyö pöytoghintö Solomon nko pich löwïr akïpelchï ECHOTYON amörostin ompö atoni.

⁶³ Kiyenchï tïch 22,000 cho le ropöwo pöghisyö nko kechir 120,000. Kigh lenyoni pöytoghintö nko pipö Israel löwïr otini kisoyönöy Kö pö Tororöt.

⁶⁴ Kusoyön asisoni ngat kiror, ato le tawu Kö pö Tororöt akutöteghö amörostin cho kikïpel löwïr, choni kï: amörostino pagh, sunet pö kyak kïlïkwï ropöwo pöghisyö. Kigh lenyoni ompöwölo ki mïnïng tya ompö tïkuchoni ato kïpelo amörostin nyo kikigha taghoy.

⁶⁵ Kyama Solomon nko pipö Israel löwïr Ichon pö Tunkun Kö pö Tororöt ompö osis mut nko odeny. Kighamïtuna kegh pich kïngetunö Amat ntökwit rotyo Misri.

⁶⁶ Ato mi asis nyo kirïpöy sörömu osiswechay, kimwochï Solomon chane kïpa kestonikwa, kusoyön chane pöytoghintengwa akïpechï kegh kestonikwa, kingörechote akïturonchote ompö mïkuliskökwa ompö köromnyö nyo kighchï ECHOTYON mötworintenyi Daudi nko pipö Israel löwïr.