1 PÖYTOGHÏ 6 - PIPÏLIA

¹ Kitor Solomon kïtek Kö pö Tororöt* otini kiwer könyiswö cho le 480 kïngeta kiwuwunö pipö Israel koro Misri, ompö könyito angwan nyo pö paytaghpa Solomon, ompö araweto odeny nyo kïkuro Sip.

² Anyï wölo kitenö köyoni kitekyï Solomon ECHOTYON: koghïntö kï miten 27, töpesïntö kï miten mut nko angwan, nayatu kï miten 13.5.

³ Kïlïkwï kuke nyo kïlïto kö pö kikorön miten 4.5 ato kïröytö kï miten 9 töpesïntö karkegh töpesïnto köyoni wölo le tagh.

⁴ Kitïng nïyetwo Kö pö Tororöt tïrisyen cho töntönech wölo le sany kïtïl wölo le ori.

⁵ Aketek kori walaka cho kiwit parakuto köyoni, kuwit nayatu köyoni kïnamata kegh nko nïyetweko kot ompö woptin löwïr ompö Kö pö Tororöt nko kot nyo pö ori, aketek kori walaka cho mi köyoni wölo le sany ompö woptine löwïr.

⁶ Kïlïkwï töpesïntö nyo pö kot nyo pö ngwïny miten odeny nko kwen kïlïkwï töpesïntö nyo pö kot nyo pö kwen miten odeny nko kwen kitek kïgh nyo lata miröwon nyo kitopön okumpö sany ompö woptine löwïr, atömötuyö ketichoni nko nïyetweko köyoni.

⁷ Kökikepat koghïn cho kikïteka Kö pö Tororöt ompö wölini kïwöso koghïn, kikïnya kepat ompöwölo melö kikïmököy kelïma chöghöto nyuntï ompö köyoni anta oywö anta kïgh anka tïkwïl nyo pö karïn.

⁸ Kimi kukat okumpö tagh nyo kïlïto kot nyo pö kwen ompö Kö pö Tororöt, akimi ngat ore nyo kïpustegho atöketïta koropa nyo pö odeny. Kïngeta are anka koropanoni pö odeny akïpusta ntökwitïta koropeto sömök.

⁹ Kïkany otini kiwany pöytoghintö Solomon kïtek Kö pö Tororöt, kïtat ket yïm kö okumpö ori cho le pïrompur nko mpawtina tarakit.

¹⁰ Akïtek Kö pö Tororöt korïn cho mïnkech kuwit kot kïmïkul. Kilïkwï koghïn nyo pö kö anka tïkwïl ompö korichoni le sömök kikïtap miten odeny nko kwen nyo kikïtek, aketek korichoni kïnam pïrompïrtinechoni pö tarakit.

¹¹ Atolapay kïlenchï ECHOTYON Solomon,

¹² “Ato irïpanyi kirurutköchan löwïr, owunyi kïrïp kegh nko kiyomisötenyan nyo kyomwochan papongu Daudi.

¹³ Omöngan nko pikachu pö Israel ompö Kö pö Tororöt nyete pö saghat ketekwaninyi, amelö topïstonan chane.”

¹⁴ Kïlenyona kïtek Solomon Kö pö Tororöt kuwonyö.

Minata Kö pö Tororöt ori

¹⁵ Kikiluma mpawtina tarakit kot okumpö ori kïngeta ngwïny ntökwit monchök, atolapay kutö mpawtina saypras.

¹⁶ Akuluma mpawtina tarakit kot nyo kimi lötu Kö pö Tororöt, nyo kikïkuro Wölo Tïlil Tya.* Ki ngata koghïntanyi miten mut nko angwan, akeluma mpawtina tarakit kïngeta ngwïny ntökwit monchök.

¹⁷ Ki ngata miten 18 kot nyo kimi tawu Wölo Tïlil Tya.

¹⁸ Kikiluma kot mpawtina tarakit cho kikighchï mïkon nko tapïkoy ntömökïrumïnye koghïn ompö nayat.

¹⁹ Ki köyoni pö ori nyo kikitö Santuku Muma* ECHOTYON

²⁰ Ki miten mut nko angwan koghïnto köyoni pö ori, kï miten mut nko angwan töpesïntanyi, kï miten mut nko angwan kutok. Kikiluma koltin cho pïchighöch kot kïmïkul, akïteka tarakit ato kïpelo amöros.

²¹ Kiluma Solomon Kö pö Tororöt koltin wölo le ori, akumurteghö sïrïmtino koltin tawu köyoni pö ori akuluma koltin.

²² Kuluma koltin Köyoni kïmïkul nko ato kïpelo amöros ompö Wölo Tïlil Tya.

²³ Kikigha keti arol kerupimtin* odeny cho kitïng köpepoy aketö Wölo Tïlil Tya, ki miten angwan koghïntö nyo pö akonga.

^24-26 Ki miten odeny kapepche anka tïkwïl ompö koghïn, ki miten angwan kïngata walta nyo pö kapep akonga ntökwit nyinö anka. Kikarkegh tyonchoni kwodeny laras.

²⁷ Kutö kerupimtinechay nyo pö ori, akïkany kughïtö köpepokökwa. Kiswany kapepcheto anka nayat akonga, kïswany kapepcheto anka nayatu anka kïswany kegh köpepokökwa ompö kwenu köyoni.

²⁸ Akïmala koltin kerupimtinechoni.

²⁹ Kïmina nayatu Kö pö Tororöt okumpö sany nko okumpö ori körkeyïntino kerupimtin nko sos nko tapïkoy.

³⁰ Akïmala koltin köyoni wölo le ngwïny.

³¹ Atolapay kwigh tekech odeny cho pö keti arol, cho pö kukat nyo kïlïto Wölo Tïlil Tya. Kitïng karerantin mut ketït nyo kimi kukat parak.

³² Kwighchï tekechkö kwodeny körkeyïntino kerupimtin nko cho pö sos nko cho pö tapïkoy akïmala löwïr koltin.

³³ Kwighchï lenyoni wölo kïlïto atökepa Kö pö Tororöt, kitö keti arol cho kitïng karerantin angwan.

³⁴ Kimi tekechkö odeny cho kikïnyökïmöy cho kikigha saypras,

³⁵ cho kikighchï körkeyïntino kerupimtin nko cho pö sos nko tapïkoy akemala koltin.

³⁶ Atolapay kïtek kot nyo pö ori kuwit ortïn sömök cho pö koghïn cho kikipat nko ore akonga nyo pö keti tarakit.

³⁷ Kikïpal kitoröto Kö pö Tororöt könyi angwan ompö arawa Sip ompö paytaghpa Solomon.

³⁸ Kikiwany ketek Köyoni pö ECHOTYON könyi taman nko akonga, ompö arawa Pul, nyoni kï arawa mut nko sömök, kikiwany kegh kïgh anka tïkwïl kïrïp kegh nko tatatenyi. Kitek Solomon köyoni könyis mut nko odeny.