1 PÖYTOGHÏ 2 - PIPÏLIA

¹ Otini kilekïtitu osiswö cho kimach kïrapas Daudi, kurur werïnyi Solomon lö,

² “Karich ato amachan oweghö ngwïnyinï, kïlenyona inyakanitï, nya kesïwin lö ichï mïrön

³ airip lasiny tïkwïn cho möcheninyi ECHOTYON Tororötïngu ighe airip nko kirurutkachi nko kikirutkachi, kïrïp kegh nko kirurut pö Musa, atenyorunö perur ompö kïgh anka tïkwïl nyo ighenyi nko wölo iwetenyi.

⁴ Atökïkaman ECHOTYON kiyomisötenyi nyo kimwowanïn lö, ‘Ato rip werköku kirurutköchan ompö mïkulöwekwa kïmïkul nko söponwekwa kïmïkul, kïmelö potöy chi nyo töpo ngacharu Israel nyo pö paytagh.’

⁵ “Ainkïtönyi ngat kïgh nyo kighwanïn Yoap wero Seruya, kïgh nyo kighchï yetïntino Israel odeny cho pö lïk, Apner wero Ner nko Amasa wero Yeter. Kitach nyinte ompö osiswo kalya, kisön cho kikïmïlta ompö osiswo poryot, akïnyïra kisönchoni angweto muyenyi nko kweghkachi.

⁶ Ighchinö nyu nyinte ompö ngöghomnyengu, mepïsyï nyinte kïtöpö ntökïrapas ompö yosïn.

⁷ “Wölo isyonchï werpö Parsilay nyo pö Kiliad nya kïtuyö chane nko pich cho iyomisïyenyi tïkwïl. Kighwanïn chane nyo karam ato kyorïponan wölo mi werïnkwa Apsolom.

⁸ “Akïmi tïkwïl Syimey wero Kera nyo pö ara Penchamen, nyo ngwïno kanasyanta Paurim. Kichïpanïn nyinte asisoni kyowetan Maanaim. Wölo otini kingwïn nyinte kïrökwï akïnyorchanïn lalwa Yordan. Kyowolwolchan nyinte ompö tawu ECHOTYON lö mopöranye.

⁹ Wölo meyitö ye lö mötïngnye ngokï, ompöwölo ichinyi chi nyo ngöghom. Imukenyi nkïtune kïgh nyo mïchininyi ighchine nyinte, isïwa lö kakïpar chichoni.”

Megha Daudi

¹⁰ Kïrapas Daudi aketïpchï kanasyan nyo kikïkurteghö nyinte.

¹¹ Kökikïpayta nyinte Israel könyis tömönut angwan. Kipayta ompö Epron könyis mut nko odeny, kïpayta ompö Yerusalem ompö könyis 33.

¹² Kïlenyona nyu kïtöpö Solomon ngacharuto kwanta Daudi. Kïtasa paytaghtanyi kwawesit.

Megha Adonicha

¹³ Atolapay kïwö Adonicha nyo kile kame Akit wölo mi Patsyepa yoto Solomon. Kïtep Patsyepa nyinte lö, “Kengwïnanyi ompö kalya?” Kuyokyï lö, “Owöy kalya.”

¹⁴ Atolapay kïlö, “Otïngetan kïgh nyo omökan otepinyi.” Kuyokyï kamanay lö, “Tepa.”

¹⁵ Kïlenchï Adonicha, “Inkïtönyi lö kitö lïku nyinyan paytagh, akunkït chi anka tïkwïl ompö koro Israel lenyoni. Wölo kïwöghökisyö ngala otini kipöyit paytaghta werïncha, ompöwölo ki machata ECHOTYON lenyoni.

¹⁶ Kïlenyona ye nyu, otïngetan teput akonga nyo otepinyi, ametaghenante.” Kuyokyï kamanay lö, “Tepa.”

¹⁷ Kïlö Adonicha, “Kaykay tepkante pöytoghin Solomon kïkonanïn Apisyak, chepay ngwïno Syunem opön, onkïtön lö melö töghoninyi.”

¹⁸ Kuyokyï Patsyepa nyinte lö, “Karam nyoman, owetan omwochini pöytoghin ngaleku.”

¹⁹ Otini kitïta Patsyepa wölini kimi pöytoghintö Solomon atökïngalan nko nyinte akwompö Adonicha, kïnget pöytoghintonay akïtaroch kame, kungïrukö ompö tawu kame ompö könyït atolapay kïtöpö ngacharunyi pö paytagh akïmwatïta kepï ngachare anka nyo pö kame. Kïtöpö kame ewunyi nyo pö okumpö tagh.

²⁰ “Kïlö kame otïngetan kïgh nyo mïnïng nyo otepinyi ametaghenante.” Kuyokyï pöytoghintonay lö, “Tepa, we yo, melö otögheninyi.”

²¹ Kïlenchï, “Nya kwip werïnkwa Adonicha Apisyak chepay ngwïno Syunem.”

²² Kuyokyï Solomon kame lö, “Kölö ne tetepanyi otönön Apisyak Adonicha? Nkï lekït somchinönyi nyinte pöyunöte tïkwïl! Poretyencha nyinte. Akï mi nko nyinte tïsin Apyatar nko Yoap wero Seruya!”

²³ Atolapay kuwalwal kegh pöytoghintö Solomon ompö kaynata ECHOTYON lö, “Opöran Adonicha kwamanïn Tororöt ompö kïyete kösomanïn!

²⁴ Kïlenyona ye nyu, le otini söpöy ECHOTYON nyini keghanïn otöpö ngacharu paponyu Daudi nyo chïchïmate, akutö paytagh piko orenyan kïrïp kegh nko kiyomisötenyi. Meghöy Adonicha asisete nyo mötïny!”

²⁵ Kïlenyona kïmwochï pöytoghintö Solomon Penaya kïwö kïpar Adonicha.

Megha Apyatar nko Yoap

²⁶ Atolapay kïlenchï pöytoghintö Solomon tïsintonay le Apyatar, “Wechinö kegh wölnö le Anatot. Mïchini meghanyi, wölo melö otïghinyi ye, ompöwölo kikasananyi Santuku Muma* ECHOTYON atanye kitökïsöpöy paponyan Daudi aiwongunenyi tïkwïn cho kisïngo nyinte.”

²⁷ Kïlenyona kïyon Solomon Apyatar ompö ighisyo tïsintön nyo pö ECHOTYON atökïpïntö ngölyonto ECHOTYON nyo kimwagha Syilo ompö Eli nko monechi.

²⁸ Nyini kilïm Yoap ngalechoni, nyo kichömöy Adonicha wölo kitöghöy Apsolom, kuperta kutang Ema nyo mi ECHOTYON* akïwö kïnam kuyo ato kïpelo amöros.

²⁹ Kemwochï pöytoghin Solomon lö kikuperta Yoap kutang Ema nyo mi ECHOTYON* akïmi ye ato kïpelo amöros. Kïmwochï pöytoghintö Penaya wero Yeoyada lö, “Wïyö tïghö nyinte!”

³⁰ Kïlenyona kïwö Penaya akïlït Emanay mi ECHOTYON akïlenchï Yoap, “Kamwa pöytoghintö lö nyonö!” Kuyokyï Yoap nyinte lö, “Ewo, omeghchinan yete.” Kïmïla Penaya wölo mi pöytoghintö akïmwochï ngalechaye kamwa Yoap.

³¹ Kïlenchï pöytoghintö Penaya, “Ighchinö Yoap kïrïp kegh nko ngölyontenyi. Tïghö nyinte aitïp tömamecha nko kato paponyan kisön pö pich cho melö kitïng lelut cho kimïlta Yoap.

³² Tököy ECHOTYON ompö Yoap kisön pö pich odeny cho kipar nyinte cho le nyökon kïtïl nyinte amelö kinkït paponyan Daudi: Apner wero Ner nyo kintöghoghchini pipö lïko Israel nko Amasa nyo kintöghoghchini pipö lïko Yuda.

³³ Kïlenyona omöy kisön pö pïchoni Yoap nko monechi kokay. Wölo töpo kalya ka Daudi nko monechi nko ngacharunyi pö paytagh kokay.”

³⁴ Kïwö nyu Penaya wero Yeoyada akïtïgh Yoap aketïpchï nyinte konyi nyo kimi wölo le wuw.

³⁵ Kutö pöytoghintonay Penaya wero Yeoyada kuntöghoghchï pipö lïkenyi kïtöpö atay kimi Yoap akutö tïsin Sadok kuker Apyatar.

Megha Syimey

³⁶ Kïyonta pöytoghintö chi wölo mi Syimey kïlenchï, “Tetkyinö kegh kö Yerusalem atemanga wöloni, wölo meweghö atoni itang kareran.

³⁷ Ompöwölo asisoni kengetenyi atoni aioghyö champilwa Kidron imeghenyi nyo mötïny, akï nyinte kegh nyo kigheghchini.”

³⁸ Kuyokyï Syimey pöytoghintonay lö, “Karamach ngalechoni kemwaghanyi. Orïpan ngalechoni we echotyon pöytoghin.” Kïtöpö Syimey Yerusalem ompö osis cho chang.

³⁹ Otini kiwonyö könyiswo sömökï, kïryagh sekeyi Syimey cho le odeny wölo mi Akis wero Maaka, pöytoghinto Kat, kemwochï Syimey lö, “Mi sekeyköku koro Kat.”

⁴⁰ Nyini kilïm lenyoni, kïrat sïkïryenyi akïwö wölo mi Akis ompö Kat akïyar sekeykachi. Otini kinyorï kumïtï chane kïpka katanyi ngat.

⁴¹ Otini kïlïm Solomon lö kingeta Syimey Yerusalem akïwö kutang Kat akïmïlegha wöloni,

⁴² kïkur pöytoghintonay Syimey akïlenchï, “Olentan kyowolwolunyi ompö ECHOTYON arirunyi lö, ‘Asisoni kengetanyi iwö kore anka, imeghenyi nyo mötïny?’ Ilenchaninyi atanye, ‘Karamach ngalechoni. Orïpan lenyoni.’

⁴³ Kwompö ne tömeripönyi kiwalwalatengu nyo kimwaghanyi ompö ECHOTYON airïp ngalechanya kyomwowunyi?”

⁴⁴ Akïlenchï pöytoghintonay ngat Syimey, “Inkïtönyi ompö mïkulöwungu kïgh anka tïkwïl nyo gha nyo kighchinyi paponyan Daudi. Anyï ye nyu ghokunyi ECHOTYON ghöyityengu.

⁴⁵ Wölo kisoyönöy pöytoghin Solomon akïtöpo ngacharu Daudi nyo pö paytagh kokay ompö tawu ECHOTYON.”

⁴⁶ Atolapay kïmwochï pöytoghintonay Penaya wero Yeoyada kïwö kïtïgh Syimey. Kïchïchïm nyu paytaghpa ompö mori Solomon.